Рори Макалрой “Тоглогчдын АШТ”-д аваргаллаа

Twitter Print
2019 оны 03-р сар 19-нд 12:43 цагт
Мэдээний зураг,

Мэргэжлийн гольфийн хамгийн том цуврал PGA-н энэ улирлын 12 дахь тэмцээн “Тоглогчдын аварга шалгаруулах тэмцээн”-ий аваргын нэр тодорлоо. Тэмцээний сүүлийн тойргийн тоглолтууд явагдсаны дараа Хойд Ирландын гольфчин Рори Макалрой -16 оноотой цомын эзэн боллоо. 46 дахь удаагийн тоглогчдын аварга шалгаруулах тэмцээн Флорида мужийн Понте Ведра Бийч гольфийн талбайд уламжлалын дагуу зохион байгуулагдлаа.

Энэ тэмцээний 2 удаагийн аварга алдарт тайгер вүүдс сүүлийн тойргийн эхлэлийг хийж, 69 цохилтоос -3 оноог авснаар -6 оноотой болж, 30-р байрт оржээ. Вүүдс сүүүлийн тойрогт 4 удаа бөрди хийсэн ч, 14 дэх нүхэндээ нэмэх оноо авсан байна. Дэлхийн чансааны 12-т бичигдэж байгаа Тайгер Вүүдсийн хувьд хамгийн сүүлд тоглогчдын аварга шалгаруулах тэмцээнд 2013 онд -13 оноотойгоор түрүүлж байжээ.

Оксфордын их сургуулиас мэргэжлийн ангилалд орж, өнгөрсөн онд европын цувралын 2 ч тэмцээнд түрүүлсэн Английн гольфчин Эдди Фефферелл сүүлийн тойргийн оргил амжилтыг үзүүлж, 66 цохилтоос -6 оноо авчээ. 28 настай англи эр 2 дахь нүхэндээ нэмэх оноо авч, тааруу эхлэлийг хийсэн ч, 7 дахь нүхнээс эхлэн 7 удаа бөрди хийсэн байна. Америкийн гольфчин Жим Фурик сүүлийн тойрогт 67 цохилтоос -5 оноог авч, улмаар тэмцээнийг тэргүүлэгч Рори Макаройгоос ганцхан цохилтын зөрүүгээр удаалсан байна. Сүүлийн тойрогт 5 удаа бөрди хийсэн Жим Фурик чансааны 300 оноо авч, шагналыг сангаас 1 сая 350 мянган ам доллар хүртжээ.

Сүүлийн тойргийг тэргүүлэн эхлүүлсэн Хойд Ирланд гольфчин Рори Макалрой боломжоо алдалгүй 70 цохилтоос -2 оноог авчээ. 4 дэх нүхэндээ дабл боги хийж, уналтанд ороод байсан тоглолтоо сэргээж, Рори Макалрой 6, 9, 11, 12, 15, 16 дахь нүхэндээ хасах оноог авснаар цомын эзэн болжээ. Дэлхийн чансааны 6-р байр луу ухраад байсан Рори Макалрой энэ тэмцээний түрүүг авснаар 4-т бичигдэж эхэллээ.

Чансааны 500 оноо, 2 сая ам долларын эзэн болсон Рори Макалрой карьерийнхаа 24 дэх цомоо өргөжээ. Өнгөрсөн жил энэ тэмцээнд -18 оноотой түрүүлж байсан Америкийн гольфчин Уэбб Симпсон -10 оноог авч, 16-р байраар тэмцээнээ өндөрлүүлжээ. Ирэх 7 хоногт Флорида мужийн Пэлм Харбор гольфийн тадбайд Валспарын аварга шалгаруулах тэмцээн болно.

А.Алтанчимэг

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.