Sinopharm компанийн Вероселл вакциныг ДЭМБ бүртгэж авчээ

Twitter Print
2021 оны 05-р сар 08-нд 08:25 цагт
Мэдээний зураг,

ДЭМБ-аас Хятадын Sinopharm компанийн коронавирусын эсрэг Вероселл вакциныг яаралтай үед хэрэглэх журмаар бүртгэн авчээ. Энэ талаар тус байгууллагын Ерөнхий захирал Тедрос Гебрейсус өнгөрсөн баасан гарагт хийсэн хэвлэлийн бага хурлын үеэр мэдэгдсэн байна. Тэрээр, "Өнөөдөр ДЭМБ коронавирусын халдварт өвчний эсрэг яаралтай үед хэрэглэхийг зөвлөж буй эм бэлдмэлийн жагсаалтанд Бээжингийн Sinopharm компанийн вакциныг бүртгэн авлаа.

Ингэснээр тус вакцин нь ДЭМБ-аас коронавирусын халдварт өвчний эсрэг хэрэглэхэд чанарын шаардлага хангасан, аюулгүй бөгөөд үр дүнтэй гэсэн сертификат авсан 6 дахь вакцин болж байна." хэмээн онцолжээ.

Тедрос Гебрейсусын мэдэгдсэнээр КОВИД-19 өвчний эсрэг дархлаажуулалтанд хэрэглэх эм бэлдмэлийн тоог нэмсэнээр олон улсын КОВАКС хөтөлбөрийн дагуу нийлүүлэх вакцины тоо нэмэгдэх аж.

Түүнчлэн ДЭМБ-аас зөвшөөрснөөр Sinopharm компанийн коронавирусын эсрэг вакциныг бусад улс орнуудад зөвшөөрч, коронавирусын халдварын эсрэг дархлаажуулалтанд хэрэглэх явц эрчимжих боломжтой аж.

ДЭМБ-ын Ерөнхий захирлын туслах Марианжела Симаогийн мэдэгдсэнээр Sinopharm компанийн коронавирусын эсрэг вакциныг бүртгэн авснаар ДЭМБ эрүүл мэндийн салбарын ажилчид болон эрсдэлт бүлгийн иргэдээ коронавирусын эсрэг халдвараас хамгаалах гэсэн улс орнуудад вакцины хүртээмжийг нэмэгдүүлэх нөхцлийг бүрдүүлж өгчээ. Тэрээр, "Бид Sinopharm компанийг олон улсын КОВАКС хөтөлбөрт оролцож, коронавирусын эсрэг вакциныг улс орнуудад эрх тэгш нийлүүлэх явдалд туслахыг хүсч байна."гэжээ.

ДЭМБ-аас бүртгэн авсан коронавирусын эсрэг эм бэлдмэлд Sinopharm компанийн вакцинаас гадна Pfizer/BioNTech, Moderna, Johnson & Johnson компаниудын вакцин, AstraZeneca компанийн 2 төрлийн вакцин тус тус багтаж байна.

Харин ОХУ-ын Спутник-Ви коронавирусын эсрэг вакциныг ДЭМБ-аас одоог хүртэл бүртгэж аваагүй ба эх сурвалжуудын мэдээлж байгаагаар Спутник-Ви вакциныг ирэх 6 эсвэл 7-р сарын сүүлээр бүртгэн авч магадгүй аж. Учир нь ДЭМБ-д Спутник-Ви вакцины судалгаа шинжилгээний тухай баримтууд бүрэн ирээгүй аж.

Эх сурвалж: finanz.ru/novosti/aktsii/voz-odobrila

Орчуулсан: Содномцэрэнгийн Энхзаяа

mongolcom.mn

 

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.