Бясалгал хийх олон арга техник байдаг

Twitter Print
2022 оны 05-р сар 27-нд 10:12 цагт
Мэдээний зураг,

Бясалгал хийх олон арга техник байдаг. Ямар нэгэн төвлөрлийн цэг олж сонгоод түүн дээрээ хичээнгүйлэн анхаарлаа төвлөрүүлэх. Жишээ нь хамраараа амьсгалах үедээ тэр мэдрэмжээ ажиглах, зүрхний чакра, эсвэл билгийн мэлмий дээрээ төвлөрөх, кундалин, эсвэл ханан дээр цэг зураад түүнийгээ ширтэх, лаа эсвэл зул бадрааж түүнийг ажиглах г.м. Аль нь ч бай гол зорилго нь тархин дахь элдэв бодол шуугианыг намсгаж чимээгүй болгох.

Харин яагаад ухаан санаагаа нам гүм болгох ёстой гэж... Яагаад гэвэл тэр л аниргүйд бидний жинхэнэ аялгуу, гэрэл гэгээ тодорч ирдэг. Өөрөөр хэлбэл гадна ертөнцийн чимээ шуугиан, түүнээс улбаалсан элдэв бодол, сэтгэлийн цалгианд бид дотоод өөрийн бурханлиг яруу хэмнэл, хэлбэлзлээ олж мэдрэх боломжгүй болсон байдаг.

Тэр дотоод аялгуу, бурханлиг хэлбэлзлийг олж мэдрэхийн ач тус гэвэл мэдээж материаллаг баялаг өгөхгүй. Гэхдээ ямар ч баялгаар үнэлэх аргагүй дотоод амар амгаланг чи олох болно.

Үүнийг бичих болсон минь энэ цаг дор бид өөрсдийн хэлбэлзлээ өргөж дээшлүүлж, хөгжих, тэр хэрээр эргэн тойрондоо эерэг үйлдэл, бодол, энерги түгээж энэ нийгэм, улс орон, эх дэлхийдээ өөрийн гэрлийг түгээх ёстой чухал цаг үед бид амьдарч буй билээ. Тэгэхээр ингэж бодож, мэдэрч байгаа хэн боловч чадах мэдэхийн хэрээр бясалгал гэдгийг сонирхож, хөгжил дэвшлийг өөрөөсөө эхлэх нь чухал юм. Хэрвээ чи сайн сайхан амьдрал, орчин, нийгмийг хүсэж л байгаа бол тэр чинь чиний миний, бидний дотоод ухаарал, зөв хэлбэлзлээс л эхэлдэг. Зөв хэлбэлзэлтэй хүнд буруу муу бодол төрдөггүй. Тийм орон зай тийм хүний ухаан санаанд байхгүй гэсэн үг.

Тэгэхээр бясалгал төвлөрөл хийнэ гэдэг нь тухайн хүн л ганцаараа ашиг тус хүртэх бус, эргэн тойрны бүх хүмүүс, оршихуй тэрхүү эерэг, дэвшсэн хэлбэлзэл, энергийн хүчинд өөрчлөгдөж эхэлдэг.

Хэрвээ сайн төвлөрч чадвал бид дотроо ямар сайхан аялгуу, тод тунгалаг гэрэл агуулж явдгаа олж мэдэж болно. Цаашлаад энэ ертөнцийн бүхий л оршихуйнууд хоорондоо холбоотой, нүдэнд л харагдахгүй болохоос биш, бүгд нэгдмэл нэг юм гэдгийг олж ухаарах болно.

Бидний монголчуудын хувьд манай сайхан эх орон бол жинхэнэ энергийн өндөр хэлбэлзэл, урсгалтай, заяасан нутаг гэж боддог. Европын оронд бясалгаж төвлөрөхөд хэдэн цаг шаардагдаж байж хүрэх түвшинд Монгол нутагтаа очиж бясалгахад цаг ч хүрэхгүй хугацаанд төвөггүй хүрэх боломжтой. Энэ нь манай улсад газрын хэвлийд нь энерги үүсгэж байдаг талстууд их байдагтай холбоотой гэдэг яриа ч байдаг.

Бас нөгөө талаасаа материаллаг баялаг ихтэй улс оронд билиг ухааны хөгжилд шамдах хүсэл төрөх нь бага байдаг. Харин эсрэгээрээ ядуу тарчиг амьдралтай газар гэгээнтнүүд олноороо төрдөг гэгддэг. Жишээ нь Энэтхэг улс байна.

Амьдрах, хөгжих нөхцөл хэр хүнд бна тэр хэмжээгээрээ гэгээрэлд хүрэх боломж их, хөгжиж чадах түвшин өндөр байдаг гэдэг.

Яг л бидний амьдарч буй энэ цаг үе нь хүн бүр чадах хэмжээгээр өөрсдийн билиг ухаан, сүнслэг хөгжилд шамдах хамгийн сайн цаг гэж боддог шүү.

Хүн бүр зул мэт бадран гэрэлтвээс энэ амьдрал, эх дэлхийд маань гэрэл гэгээ дүүрэх болно.

БИД АЛТАН ЭРИНД АМЬДАРЧ БАЙНА...

Намхайдоржийн Цогтмандах

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.