УИХ-ын гишүүн асан С.Баярцогт ном гаргажээ

Twitter Print
2019 оны 11-р сар 04-нд 12:24 цагт
Мэдээний зураг,

УИХ-ын гишүүн асан С.Баярцогт өнөөдөр хэвлэлийн бага хурал зарлаж, дуулиан дагуулсан “Оюутолгой”-н гэрээтэй холбоотой шинэ товхимол гаргасан талаараа мэдээллээ.

Тус номны нэр нь “Оюутолгой төслийн 2008 оны гэрээ, холбогдох бичиг баримт” бөгөөд 500 гаруй хуудастай аж. Улмаар тухайн үеийн гэрээ, холбогдох бүх бичиг баримтыг англи монгол хэл дээрх хувилбараар нь эмхэтгэсэн байна. Уг ном нь Оюутолгойн гэрээг байгуулсан 10 жилийн ойтой давхцаж буйгаараа онцлог аж.

Номыг цөөн хувиар  хэвлэсэн байна. Хэвлэлийн бага хурлын эхэнд тэрбээр "Оюутолгойн гэрээг байгуулсны 10 жилийн ойг тохиолдуулаад Оюутолгойн гэрээг байгуулахад оролцсон нийт ажилтан алба хаагчид, батласан УИХ-ын бүрэлдэхүүн, С.Баяр болон С.Батболдын Засгийн газрын бүрэлдэхүүнд баяр хүргэе" гэсэн юм.

Харин номоо таван шалгааны улмаас хэвлэхээр болжээ. Энэ талаар С.Баярцогт “2018 онд АТГ-аас энэ гэрээг хийсэнтэй холбогдуулаад эрүүгийн хэрэг үүсгэж, тэр дороо намайг 73 хоног хорьсон. Үндэслэл нь энэ гэрээнд Монголд ашигтай нэг заалт оруулж, Монгорл Улсад үр өгөөжийг нь 434 тэрбум төгрөгөөр нэмэгдүүлснийг буруутгасан. Надад юу гэж бодогдсон бэ гэвэл энэ гэрээний зүйл заалтыг ойлгохгүй байгаа юм байна, сайн мэдэхгүй байгаа юм байна гэх бодол төрсөн. Дараа нь АТГ энэ хэрэгтэй холбоотой 4 бүлэг шинжээч томилсон. Банкны салбарын эдийн засагч нар, МУИС-ын хуулийн багш нар, аудитын компанийн төлөөлөл, татварын ерөнхий газрын байцаагч нараас бүрдсэн 4 хэсэг шинжээч томилсон. Энэ шинжээч нарын гурван хэсэг нь энэ гэрээний талаар сөрөг дүгнэлт гаргаагүй. Татварын газрын шинжээчид бол олон хууль зөрчиж, хохирол учруулсан байна гэх дүгнэлт гаргасан. Үүнээс энэ гэрээг хэрэгжүүлэх ёстой төрийн албан хаагчид мэдлэггүй, мэдээлэлгүй байна гэж бодогдсон.

Arguujin Gankhuu-н зураг.

Шийдвэр гаргагчид маань буруу мэдээлэл аваад, өөрсдөө ойлгохгүйгээсээ болоод буруу шийдвэр гаргах гээд байна. Татварын ерөнхий газраас 41 зүйлийг хөндсөн байгаа юм. Энэ 41 зүйлийг нягтлаад үзэхээр 97 хувь нь алдаатай, үлдсэн нь хэрэгжилттэй холбоотой.Маш их өрөөсгөл алдаатай дүгнэлтэндээ үндэслээд шүүх шийдвэрээ гаргавал, ямар эрсдэл учирч байна вэ гэвэл бид Оюутолгойгоос авах ёстой олон төрлийн татваруудаа дутуу авах эрсдэл үүсч байна. Олон арван тэрбум ам.долларын татварыг дутуу авах гээд байна. Сэрэмжлүүлэх зайлшгүй шаардлага үүсч байгаа юм.

Гэрээгээ судлахгүй, уншихгүй юм байж гэрээг хэрэгжүүлэх үйл явцад гарсан зөрчил, үл ойлголцлыг дандаа гэрээндээ нялзайгаад байна. Би Т.Аюурсайхан гишүүнд их талархалтай байгаа. Шинжээчийн материал гэдэг бол мөрдөн байцаах үйл явцад байгаа хавтаст материалд байгаа учраас би ярих эрхгүй. Харин Аюурсайхан гишүүн бүгдийг нь задлаад яриад өгсөн.

Цөөн хувь хэвлэсэн учраас редакц болгонд нэг нэгийг өгье. Мөн том номын сангууд, МУИС, татварын байгууллага гээд газруудад өгнө. Энэ бол олон жил хэрэглэгдэх эх сурвалж, материал болно. 2000 оноос хойш гэрээ хийгдэх хүртэл бүх зүйлийг бичсэн байгаа. Зүйл заалтаар нь шинжээчийн дүгнэлтийг бас оруулсан байгаа” гэлээ.

Сэтгүүлчдийн зүгээс асуулт асуух гэсэн боловч тэрбээр "Энэ ном 500 хуудастай зүйл заалт тус бүрээр нь дэлгэрэнгүй тайлбарласан байгаа. Тиймээс эхлээд номоо унш. Хоёрдугаарт, та нар ихэнх нь жаахан хүүхэд байна. Энэ гэрээг хийгдэх үед оюутан эсхүл сурагч байсан байх. Тиймээс эхлээд номоо уншаад ойлгосны дараа би асуултанд хариулж, ярилцахад бэлэн байна" гэсэн юм.

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Зочин

      (202.131.227.178) 2019-11-06 23:45
      • 0
      • 0

      20к хувьсагчаа нэг бүрээр нь тайлбарлаарай

      Хариулах