Монголын тамирчид Дунай мөрний эргээс дөрвөн медальтай ирнэ

Twitter Print
2019 оны 11-р сар 04-нд 11:03 цагт
Мэдээний зураг,

Чөлөөт бөхийн 2019 оны 23 хүртэлх насны Дэлхийн аварга шалгаруулах тэмцээн Унгарын нийслэл Будапештийн “Ludovika Arena”-д болж өндөрлөв.

Чөлөөт бөхийн эмэгтэйчүүдийн төрөл аравдугаар сарын 30-наас арваннэгдүгээр сарын 1-нд боллоо. Гурав дахь удаагийн тэмцээний эмэгтэйчүүдийн төрөлд 32 орны 148 тамирчин 10 жинд өрсөлдсөн юм. Манай улсаас есөн тамирчин (59 кг-д П.Отгонбаяр бэртлийн улмаас яваагүй) зодоглосноос 65 кг-ын жинд Баянхонгор аймгийн тамирчин ОУХМ Ө.Пүрэвүрэн мөнгө, 53 кг-ын жинд “Хилчин” спорт хорооны тамирчин Н.Анударь хүрэл медаль хүртэв. Ийнхүү манай 23 настнууд маань Дунай мөрний эргээс нэг мөнгө, гурван хүрэл, нийт дөрвөн медальтай нутгийн зүг хөлгийн жолоо залахаар болжээ.

Манай эмэгтэй бөхчүүд нэг мөнгө, нэжгээд хүрэл медаль, таван шагналт байртай 71 оноогоор багаараа зургадугаар байрт оров. Эмэгтэй чөлөөт бөхийн дэлхийд ноёрхдог Японы бөхчүүд Унгарын нийслэлд 230 оноогоор тасархай тэргүүллээ. Наран улсын бүсгүйчүүд долоон алт, хоёр мөнгө, нэг хүрэл, бүгд медальтай нуцаг буцаж байна. Үлдсэн гурван алтыг БНХАУ-ын Луо Ланнуан, Палиха Палиха, Кубын “шинэ од” Милиямис Марин Портриль нар хүртсэн.

Багийн дүнгээр урд хөрш БНХАУ (2 алт+2 мөнгө+1 хүрэл) 105 оноогоор хоёр, Украин (+1 мөнгө+3 хүрэл) 103 оноогоор гуравдугаар байрыг эзлэв. Энэ удаагийн “U-23”-ын ДАШТ-д оролцсон Монголын баг тамирчдын замын зардлыг бүрдүүлэхэд МЧБХ-ны ерөнхий нарийн бичгийн дарга Б.Батбаяр, үндэсний шигшээ багийн багш нар идэвхи санаачилга гарган шуурхай ажилласан.

Замын зардлыг шийдвэрлэж өгсөн УИХ, Засгийн газрын гишүүн, УУХҮЯ-ны сайд, МЧБХ-ны ерөнхийлөгч Д. Сумьяабазар, УИХ, ЗГ-ын гишүүн, БСШУСЯ-ны сайд Ё.Баатарбилэг, БСШУСЯ-ын дэд сайд Г.Ганбаяр, гавьяат тамирчин Ц. Шаравжамц даргатай БТСГ, “Токио Олимп” сангийн захирал Ганзориг, Б. Өнөбаатар нарт халуун талархал илэрхийлье.

ЭМЭГТЭЙЧҮҮДИЙН ДҮН: 50 кг (19 бөх): 1. Кика Кагата (Япон) 2. Зики Фенг (БНХАУ) 3. Надежда Соколова (ОХУ), Мари Дюфур (Канад) ...9. Цогт-Очирын Намуунцэцэг (Монгол)

53 кг (15): 1. Харүна Окүно (Япон) 2. Поожа Гехлот (Энэтхэг) 3. НАНДИНЦЭЦЭГИЙН АНУДАРЬ (МОНГОЛ), Зейнеп Йетгил (Турк)

55 кг (14): 1. Луо Ланнуан (БНХАУ) 2. Саки Игараши (Япон) 3. Андреа Ана Бетрис (Румын), Марина Седнева (Казахстан) ...13. Баяраагийн Халиунаа (Монгол)

57 кг (12): 1. Саэ Нанжо (Япон) 2. Алина Акобиа (Украин) 3. Марина Симонян (ОХУ), Ханна Тэйлор (Канад) ...7. Болдсайханы Хонгорзул (Монгол)

59 кг (19) кг: 1. Юмэка Танабе (Япон) 2. Анастасия Ничита (Молдав) 3. Грейс Кеннет (Канад), Ангелина Лысак (Украин)

62 кг (16): 1. Юзүка Инагаки (Япон) 2. Кайла Миракл (АНУ) 3. Ирина Рингач (Молдав), Илона Прокопевниук (Украин) ...15. Хүрэлхүүгийн Болортуяа (Монгол)

65 кг (12): 1. Мисүзү Ёномото (Япон) 2. ӨЛЗИЙСАЙХАНЫ ПҮРЭВСҮРЭН (МОНГОЛ) 3. Мадина Бакбергенова (Казахстан), Ирина Кольяденко (Украин)

68 кг (14): 1. Масако Фүрүичи (Япон) 2. Мэйси Килти (АНУ) 3. Наталия Стрзалка (Польш), Ван Юингин (БНХАУ) ...8. Энхсайханы Дэлгэрмаа (Монгол)

72 кг (12): 1. Милиямис Марин Портриль (Куба) 2. Ван Шиаокиан (БНХАУ) 3. Евгения Захарченко (ОХУ), Мэй Шиндо (Япон) ...7. Энх-Амарын Даваанасан (Монгол)

76 кг (15): 1. Палиха Палиха (БНХАУ) 2. Юка Кагами (Япон) 3. Хуи Ци Чан (Тайвань), Айпери Медет Кызы (Кыргызстан) ...5. Ганбатын Ариунжаргал (Монгол)

Эх сурвалж: Монголын Чөлөөт бөхийн холбоо

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Sfinx

      (112.72.13.249) 2014-03-20 20:09
      • 0
      • 0

      Түрүүлбэл билүү 13-аас дээш давбал АВАРГА өгнө гэсэн үү

      Хариулах