Иран улс ёс зүйн цагдаагийн газрыг татан буулгажээ

Twitter Print
2022 оны 12-р сар 05-нд 11:10 цагт
Мэдээний зураг,

Иран улсын Ерөнхий прокурор Мохаммед Жафар Монтазеригийн мэдэгдсэнээр Иран улс ёс зүйн цагдаагийн газрыг татан буулгахаар болжээ.

Эмэгтэйчүүдийн хувцаслалтын журмын хэрэгжилтийг хариуцсан Ёс зүйн цагдаа нарын саатуулсан эмэгтэй амиа алдсан явдал өнгөрсөн 9-р сард гарсан билээ. Үүнтэй холбоотойгоор Иран даяар иргэд эсэргүүцлийн хөдөлгөөн өрнүүлсээр 3 сар болж байгаа юм.

22 настай Махса Аминийг Ёс зүйн цагдаа нар толгойны алчуур зүүх тухай журмыг зөрчсөн хэргээр баривчлан саатуулсан ба бүсгүй хоригдож байхдаа нас барсан нь олон нийтийн уур бухимдлыг төрүүлсэн юм.

Мохаммед Жафар Монтазеригийн хэлснээр Ёс зүйн цагдаа нь хууль зүйн яамны харьяа бус Ираны Дотоод хэргийн яаманд харьяалагддаг бөгөөд Ёс зүйн цагдаагийн албыг татан буулгаж байгаа гэжээ.

Түүнчлэн Ираны парламент эмэгтэйчүүдийн толгойн алчуур зүүх тухай хуулийн заалтыг дахин хэлэлцэх аж. Нөгөөтээгүүр Ёс зүйн цагдаагийн газар татан буугдсанаар олон арван жилийн турш мөрдөгдөж ирсэн ёс журам өөрчлөгдөнө гэсэн үг биш юм. Анх Махса Аминийгийн үхэлтэй холбоотойгоор эмэгтэйчүүдийн зохион байгуулсан эсэргүүцлийн жагсаал цуглаан нь өнөөдөр ядуурал, ажилгүйдэл, тэгш бус, шудрага бус байдал, авлига хээл хахуулийн эсрэг иргэдийн хөдөлгөөн болон өргөжсөн байна.

Ёс зүйн цагдааг татан буулгаснаар Ираны эрх баригчид нэг ёсны буулт хийж байгаа ч энэ нь иргэдийн эсэргүүцлийн жагсаал цуглааныг зогсооход хангалттай эсэх нь тодорхойгүй байгаа билээ.

Нөгөө талаас Ираны эмэгтэйчүүд Ираны засгийн газар огцорч, дэглэм солигдохоос нааш эсэргүүцлийн хөдөлгөөнөө зогсоохгүй хэмээн мэдэгджээ.

Иран улсад 1979 оны Лалын хувьсгалаас хойш биеэ авч явах байдалтай холбоотой дүрэм журмыг хэрэгжүүлэгч "ёс зүйн цагдаагийн алба" олон хувилбараар үйл ажиллагаагаа явуулсаар иржээ.

2006 оноос эмэгтэйчүүдийг богино өмд, уранхай жийнс зэрэг "эрээ цээргүй" хувцас өмсөхийг хориглосон журмыг хэрэгжүүлэх үүднээс ёс зүйн цагдаа нар гадуур явж байгаа иргэдийн хувцаслалтанд хяналт тавьж эхэлсэн аж.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.