Нью Йорк хот аадар борооны улмаас үерт автжээ
Өнгөрсөн баасан гарагт АНУ-ын Нью Йорк хотод орсон их хэмжээний аадар борооны улмаас хотын метроны буудлууд, гудамж талбай, хурлны замууд усанд автаж, Ла Гуардия нисэх онгоцны буудлыг хаалга барихад хүргэжээ.
Хотын зарим хэсэгт 200 мм хүртэл хур тунадас орсон ба Бруклин дүүрэгт нэг цагийн дотор 63.5 мм хур тунадас оржээ. Нью Йорк хотын уур амьсгал хамгааллын газрын комиссар Рохит Аггарвалагийн мэдээлснээр тус хотын ус зайлуулах систем цагт 44 мм хур тунадас л зайлуулах чадалтай аж.
Ассошиэйтэд Пресс агентлагийн мэдээлснээр Нью Йорк хотноо баасан гарагт зөвхөн хэдхэн цагийн дотор сарын дунджаас хоёр дахин их хэмжээний хур тунадас орсноос болж зарим автозам, метро, галт тэрэгний шугамыг хаахад хүрчээ.
Хотын онцгой байдлынхан усанд автсан байшин барилгууд, машин дотор гацсан иргэдийг аврах ажиллагааг явуулсан ба Нью Йорк, Лонг Айлэнд, Нью Жерсигмйн Хобокен хотуудад онц байдал зарлахад хүрсэн байна.
Өнгөрсөн 9-р сард Нью Йорк хотноо нийт 356 мм хур тунадас орж, 1882 оноос хойш хамгийн их хур тунадас орсон 9-р сар болж байгаа аж.
Эх сурвалж: Reuters
Содномцэрэнгийн Энхзаяа
Энэ мэдээ танд таалагдаж байвал LIKE хийгээрэй. Танд баярлалаа.
