Дэлхийн хоёр их удирдагч В.Путин, Си Жиньпин нар...

Twitter Print
2018 оны 06-р сар 09-нд 16:22 цагт
Мэдээний зураг,

Дэлхийн хоёр хүчирхэг гүрэн, удахгүй 20 жилийн дараа нийт үйлдвэрлэл, хөрөнгийн хэмжээгээр АНУ-ыг гүйцэн түрүүлж, дэлхийд хамгийн том, баян эдийн засагтай агуу гүрэн болох нь тодорхой болж байгаа БНХАУ-д хойд хөрш ОХУ-ын Ерөнхийлөгч В.Путин энэ 2018 онд гурав дахь удаагийнхаа айлчлалыг гурав хоногийн хугацаагаар хийж эхлээд байгаа билээ. Түүнийг өөрийнх нь гол холбоотон, дотных нь анд БНХАУ-ын дарга Си Жиньпин угтан авч, хүндэтгэл үзүүлсэнийхээ дараа “Найрамдал” одонгоороо энгэрийг нь мялаасан байдаг. Өнөөдөр дэлхийд цэрэг зэвсэглэл, хурдацтай өсөн нэмэгдэж байгаа үйлдвэрлэл, Африк болон Европ тив дэх хөрөнгө оруулалтаараа манай өмнөд, хойд хоёр хөрш АНУ-ыг ч сандаргаж байгаа билээ. Одоохондоо хөрөнгө санхүү, үйлдвэрлэлийн хэмжээ, цэрэг зэвсэглэлээрээ дэлхийд тэргүүлэгч АНУ-ын зүгээс ОХУ болон БНХАУ-ын эсрэг Худалдааны хориг тавьж, тэдний АНУ-д нийлүүлж байгаа бүтээгдэхүүнүүдэд хязгаарлалт тогтоогоод байгаа бол тун удахгүй БНХАУ-ын зүгээс АНУ-д “Худалдааны дайн” зарлаж ч болзошгүй гэдгээ Си Жиньпин дарга хилэнтэйгээр мэдэгдэж эхлээд байгаа юм.

Худалдан авах чадвараар тооцсон ДНБ-ээрээ дэлхийд 6-рт ордог эдийн засаг, эрдэс баялгийн асар их нөөцтэй, дэлхийд хамгийн том газар нутагтай, дэлхийн хоёр том цөмийн гүрний нэг нь манай хойд хөрш ОХУ нь Европ руу нийлүүлэх Байгалийн хий, газрын тосон бүтээгдэхүүнээ эрс нэмэгдүүлэхээр Австри зэрэг улстай харилцан тохиролцоод байгаа бол мөн л худалдан авах чадвараар тооцсон ДНБ-ээрээ дэлхийд 1-рт ордог эдийн засаг, дэлхийн № 1 экспортёр, дэлхийн хамгийн том валютын нөөцтэй, мөн дэлхийд хамгийн олон хүн амтай орон болох манай өмнөд хөрш БНХАУ-ын зүгээс АНУ-аас огтхон ч айж сандарсан зүйлгүй, Худалдааны дайн зарлахад бэлэн болоод байгаа билээ.

1990-ээд оны үед эдийн засаг нь дэлхийд 35-40–р байранд байсан Хятадыг бага шиг амжилт олно гэж бодож байснаас биш, харин цахиур хагалж АНУ-тай өрсөлдөх түвшинд хүрнэ гэж хэний ч санаанд ороогүй юм. Хятадын эдийн засаг сүүлийн 30 жилд маш өндөр хурдцаар байнга өсч, 2016 онд номинал ДНБ-ээрээ дэлхийд 2-рт орох болсон. Тун удахгүй, ойролцоогоор 10 гаруйхан жилийн дараа Хятадын эдийн засаг АНУ-ынхаас даван гарч, дэлхийн хамгийн том эдийн засаг, хөрөнгө санхүүгийн бөөгнөрөл болох нь тодорхой гэж дэлхийн дүн шинжилгээний олон байгууллагууд санал нэгтэй үзэж байгаа юм.

ЗХУ задарсны дараа Орос нэг хэсэг хөл толгойгоо алдаж, эдийн засгийн түвшингөөрөө 40-50-р байранд ортлоо хойш шидэгдэж байсан удаатай. Гэтэл Б.Ельцинийг залгамжлан гарч ирсэн өнөөдрийн ОХУ-ын Ерөнхийлөгч В.Путины ухаалаг бодлогын үр дүнд 2017 онд дэлхийд 6-рт орох болтлоо дахин сэргэж чадсан нь үнэхээр гайхалтай амжилт мөн. Хэдийгээр Барууны аналитикууд Оросын эдийн засгийн сүйрлийг улиг болтол бичиж байсан боловч тэд цаг ямагт алдаж байжээ. Оросыг “Зах хязгаарын гүрэн”-ээс хэтрэхгүй гэж Барууныхан шоолж байсныг үл харгалзан Оросууд эдийн засгаа сэргээн босгож чадав. Аль 2014 оноос ОХУ-ын эсрэг хориг арга хэмжээ авч эхэлмэгцээ “Орос мөдхөн сөнөнө” гэж нотолж байсан ч өнгөрсөн дөрөвхөн жилд Оросын эдийн засаг үнэхээр чамгүй далайцтай өсчээ.

Нөгөөтэйгүүр Сирийн иргэний дайны үр дүнд Ойрхи Дорнод дахь Оросын байр суурь гайхалтай ахицтайгаар бэхжин батжив. Хэдхэн жилийн өмнө ОХУ-ыг “ Их найм”-аас “Санал нэгтэй” хөөж байсан бол одоо эргүүлэн оруулах тухай ихээхэн идэвхитэй ярилцах болов.

ОХУ-ын байдал ийнхүү эрс сайжирч байгаатай уялдан өчигдөрхөн БНХАУ-ын дарга Си Жиньпин БНХАУ-ын нийслэл Бээжин хотноо ОХУ-ын Ерөнхийлөгч В.Путинтэй уулзаж, уламжлалт найрсаг харилцаа, стратегийн хамтын ажиллагаагаа баримталж, олон салбар дахь хамтын ажиллагаагаа өргөжүүлж, шинэ эриний БНХАУ, ОХУ-ын харилцааг өндөр түвшинд хөгжүүлэхээр санал нэгдэж байгаагаа илэрхийлцгээв.

В.Путиныг ОХУ-ын Ерөнхийлөгчөөр улиран сонгогдсонд БНХАУ-ын төрийн тэргүүн Си Жиньпин дахин баяр хүргээд, үүрэгт ажлаа дахин хүлээн авсны дараах анхны гадаад айлчлалаа БНХАУ-д хийж буйд талархал илэрхийлсэн нь цаанаа нарийн учиртай юм. Уулзалтын эхэнд Си Жиньпин дарга хэлэхдээ “БНХАУ, ОХУ хоёр нь иж бүрэн стратегийн түншлэлийн төлөвшсөн, тогтвортой, хүчтэй харилцаа тогтоолоо. Олон улсын нөхцөл байдлаас үл хамааран хоёр орон үргэлж бие биенийхээ язгуур эрх ашгийг хүндэтгэн хамгаалж, олон салбарт хамтын ажиллагаагаа эрчимжүүлэн, Олон улсын харилцааны шинэ загварыг бий болгож, хүн төрөлхтний хувь заяаг хамтран цогцлоон байгуулах үндсэн үүргээ гүйцэтгэж байна. Хятадын тал Оросын талтай хамт дээд зиндааны харилцан итгэлцлээ гүнзгийрүүлж, олон салбарт хамтын ажиллагаагаа өргөжүүлэн, нийгэм соёлын солилцоог ахиулж, Олон улсын үйл хэрэг дэх уялдаа холбоогоо эрчимжүүлэх ёстой. Мөн Хятад, Оросын найрсаг харилцааг үеийн үед уламжлан хөгжүүлж, хоёр улсын стратегийн уялдааг бэхжүүлэн хөгжүүлж, хоёр улс, хоёр ард түмэнд үр шимийг нь байнга хүртээхийг хүсэж байна” гэсэн байна.

Тэрээр цааш нь “Бидний хамтын хүчин чармайлтаар Хятад, Оросын олон салбарын хамтын ажиллагаа эрчтэй хөгжин, үр ашигтай ажиллаж байна. "Нэг бүс нэг зам"-ын бүтээн байгуулалтыг Евразийн эдийн засгийн холбоотой уялдуулах ажилд зохих үр дүн гарч эхэллээ. Хоёр тал бүхий л салбарын хамтын ажиллагаандаа шинэ санаа, шинэ загвар нэвтрүүлж, өндөр түвшний улс төрийн харилцааны давуу талаа хамтын ажиллагааны үр шим болгон хувиргаж, нийгэм, соёлын салбар дахь хамтын ажиллагаагаа гүнзгийрүүлэн, хоёр ард түмний эв найрамдлыг гүнзгийрүүлэх хэрэгтэй” гэсэн байсан.

Тэгвэл ОХУ-ын Ерөнхийлөгч В.Путин хариуд нь “ОХУ, БНХАУ иж бүрэн стратегийн түншийн харилцаагаа хөгжүүлэх нь ОХУ-ын дипломат бодлогын тэргүүлэх чиглэл юм. Хоёр орны харилцаа түүхэн шинэ түвшинд хүрч, улс хоорондын харилцааны үлгэр жишээ болж, Олон улсын энх тайван, тогтвортой, аюулгүй байдлыг хамгаалахад чухал үүрэг гүйцэтгэж байна. Хятад улстай худалдаа, хөрөнгө оруулалт, эрчим хүч, дэд бүтцийн бүтээн байгуулалтын салбар дахь хамтын ажиллагаагаа хөгжүүлэхийг Оросын тал хүсч байна. Шанхайн хамтын ажиллагааны байгууллагын ээлжит дарга орны хувиар гишүүн орнуудынхаа хамтын ажиллагааг хөгжүүлэх талаар гаргасан БНХАУ-ын хүчин чармайлтыг Оросын тал өндрөөр үнэлж, Чиндаогийн дээд уулзалт амжилттай болно гэдэгт бүрэн итгэлтэй байна. Хоёр тал бүс нутаг, тэрчлэн олон улсын үйл хэрэг, НҮБ, БРИКС зэрэг олон талт хамтын ажиллагааны хүрээн дэх зохицуулалтаа эрчимжүүлэхийг хүсэж байна” гэсэн байна.

Хоёр орны төрийн тэргүүн нар Хятад, Оросын олон салбарын хамтын ажиллагааны зөвлөлийн албаны хүмүүс болон хоёр орны Гадаад харилцааны сайд нарын тайланг сонсож, Солонгосын хойгийн асуудал, Ираны цөмийн асуудал зэргээр санал солилцжээ.

Уулзалтын дараа хоёр орны төрийн тэргүүн "БНХАУ, ОХУ-ын хамтарсан мэдэгдэл"-ийг үзэглэж, хоёр талт хамтын ажиллагааны баримт бичгүүдэд гарын үсэг зурах ёслолд оролцсон бөгөөд хамтдаа гадаад, дотоодын сэтгүүлчидтэй уулзсан байсан. Хоёр төрийн тэргүүний эхний уулзалтын дараа Бээжин хот дахь Ардын их хурлын ордонд БНХАУ-ын "Найрамдлын одон" гардуулах арга хэмжээ ёслол төгөлдөр болж, БНХАУ-ын дарга Ши Жиньпин ОХУ-ын ерөнхийлөгч Владимир Владимирович Путинд "Найрамдлын одон" гардуулжээ.

ХКН-ын Төв хорооны УТТ-ны байнгын гишүүн, Төв хорооны нарийн бичгийн дарга нарын газрын гишүүн, Нам болон үндэсний шагналын хорооны дарга Ван Хүнин, ХКН-ын Төв хорооны УТТ-ны байнгын гишүүн, Төрийн зөвлөлийн ерөнхий сайдын орлогч Ханьжэн нар одон гардуулах ёслолд оролцсон байна лээ.

Энэ үеэр Си Жиньпин дарга “БНХАУ-ын "Найрамдлын одон" бол гадаадын иргэдэд олгодог үндэсний хэмжээний хамгийн дээд шагнал юм. Энэ шагналыг Хятадын хөгжил шинэчлэлийг дэмжих, Хятад болон даян дэлхийн улс орнуудын солилцоо, хамтын ажиллагааг эрчимжүүлэх болон дэлхийн энх тайвныг хамгаалахад асар их хувь нэмэр оруулсан гадаадын иргэнд олгодог юм. Ноён В.Путин бол дэлхийн хэмжээнд томоохон нөлөө бүхий их гүрний удирдагч, Хятадын ард түмний дотнын найз, сайн анд билээ. В. Путиний олон жилийн дэмжлэг, хүчин чармайлтаар БНХАУ болон ОХУ-ын харилцаа Олон улсын өөрчлөлт, сорилтуудыг даван туулж, улс төр, стратегийн харилцан итгэлцэл тасралгүй гүнзгийрэн, олон салбарын ажил хэрэгч хамтын ажиллагаа эрчтэй хөгжиж, хоёр ард түмэн илүү дотно харилцаатай болсон. БНХАУ, ОХУ-ын өндөр зиндааны харилцаа хоёр ард түмэнд үр өгөөжөө өгч байгаа нь өнөөгийн их гүрнүүдийн харилцаа, хөрш орнуудын найрамдлын үлгэр жишээ болж, Олон улсын харилцааны шинэ загвар бий болгох, хүн төрөлхтний хувь заяаны хамтын цогц байгуулахад чухал үүрэг гүйцэтгэж байна, "Найрамдлын одон" гэх энэхүү нэр хүндтэй шагнал бол ерөнхийлөгч В.Путинд үзүүлж буй Хятадын ард түмний эрхэм дээд хүндэтгэл, Хятад-Оросын агуу их ард түмний гүн зузаан найрамдлын бэлгэ тэмдэг юм” гэсэн байна.

Одон гардуулахын өмнө Ван Хүнингийн уншиж танилцуулсан дээд одон гардуулах Хятад улсын даргын зарлигт "БНХАУ-ын үндэсний одон, үндэстний яруу алдрыг урамшуулах тогтоол"-ын дагуу, БНХАУ-ын "Найрамдлын одон" шагналыг ОХУ-ын Ерөнхийлөгч Владимир Владимирович Путинд олгож, БНХАУ, ОХУ-ын найрамдал, иж бүрэн стратегийн хамтын ажиллагааны түншийн харилцааны хөгжилд оруулсан Ерөнхийлөгч В.Путиний олон жилийн хүчин зүтгэл, алдар гавьяаг үнэлж байна” гэжээ.

Путин талархал илэрхийлж хэлсэн үгэндээ “Си Жиньпин дарга БНХАУ-ын анхны "Найрамдлын одон"-г надад олгож байгаад сэтгэл тун өндөр байна. Энэ нь миний хувьд хамгийн дээд шагнал төдийгүй, ОХУ, БНХАУ-ын иж бүрэн стратегийн хамтын ажиллагааны түвшин, хоёр орны ард түмний гүн зузаан нөхөрлөлийн илэрхийлэл болж байна. Бид хоёр орны иж бүрэн стратегийн түншийн харилцааг эрхэмлэн дээдлэх ёстой. Хоёр орны төрийн тэргүүн нарын нөхөрлөл, хоёр ард түмний найрамдал бол стратегийн хамтын ажиллагааны үндэс суурь юм. Энэ эрхэм дээд шагналыг би нандигнан хадгалж, Си Жиньпин даргын хамт ОХУ, БНХАУ-ын улам их хөгжил дэвшлийн төлөө хичээн зүтгэх болно” гэжээ.

Үүний өмнө ОХУ-ын Ерөнхийлөгч В.Путин БНХАУ-ын төв телевизэд ярилцлага өгөхдөө “Ноён Си Жиньпин дарга бол миний хамгийн сайн найз нөхөр юм. Түүнтэй тогтоосон олон жилийн нөхөрлөл, хамтын ажиллагаа нь манай хоёр ард түмний хөгжил цэцэглэлтэд хамгийн үнэтэй зүйл юм. Бид хойшид ч улам дотноор хамтран ажиллах болно” гэсэн байсан. Ийнхүү тасралтгүй өсөн нэмэгдэж байгаа үйлдвэрлэл, цэрэг зэвсгийн хүчирхэгжилт, хөрөнгө оруулалтын хэмжээ далайцаараа удахгүй дэлхийд тэргүүлэгч болох БНХАУ болон хойд хөрш ОХУ-ын хамтын ажиллагаа бүх талаар АНУ-ыг хол орхин тэргүүлж, дэлхийд хамгийн хүчирхэг хоёр холбоотон улам л ойртон нягтарсаар байна. Үүнд дэлхийд хамгийн нөлөө бүхий удардагчид болох ОХУ-ын Ерөнхийлөгч В.Путин болон БНХАУ-ын дарга Си Жиньпин нарын гүн зузаан нөхөрлөл айхтар сүрхий жин дарж байгааг удахгүй эхлэх Шанхайн хамтын ажиллагааны байгууллагын Чиндаогийн дээд хэмжээний уулзалтын үеэр Азийн орнууд болон дэлхий нийт анхааралтай ажиглан харах нь тодорхой юм. Ямартай ч манай хоёр хөршийн удирдагчид улам л ойртон нягтарч, харин дунд нь хавчуулагдсан Монголыг хэрхэх вэ гэдгээ харилцан ярилцаж шийдвэрлэх нь ойртсоор л байх шиг. Юу ч гэсэн Монгол Улсын Ерөнхийлөгч Х.Баттулга Шанхайн хамтын ажиллагааны байгууллагын Чиндаогийн дээд хэмжээний уулзалтыг ажиглах, хоёр хөршийнхөө удирдагчидтай уулзаж ярилцахаар өмнөд хөршийг зорьсон. Харин хоёр хөршийн маань удирдагчид Монгол Улсын Ерөнхийлөгчийг хэрхэн хүлээн авах, ямар санал дэвшүүлэх нь ойрын ганц хоёрхон хоногт тодорхой болох бизээ...

Сэтгүүлч Д.Энхтүвшин

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.