Чансаа олгодог “Эрчим кап 2018” даамын тэмцээн боллоо

Twitter Print
2018 оны 05-р сар 14-нд 15:07 цагт
Мэдээний зураг,

Монголын даамын холбоо, “Алтан хүү” клубээс хамтран зохион байгуулдаг чансааны оноо олгох ээлжит тэмцээн “Эрчим Кап 2018” энэ сарын 11-13-ны өдрүүдэд Техник технологийн дээд сургууль дээр боллоо. Хоёр дахь жилдээ зохиогдсон энэхүү тэмцээнд 68 даамчин ухаанаа уралдуулсан бөгөөд Монголын 7 их мастер цолтон бүгдээрээ оролцсон нь онцлог байлаа.

Швейцарь системээр 9 өрөг өрсөлдөж дүнгээ гаргахад гавьяат тамирчин ОУИМ Д.Эрдэнэбилэг 15 оноогоор тэргүүлж, ДДХМ Ц.Хашчулуун 15, ОУИМ Г.Ганжаргал 14, ДДХМ Ц.Сүхбат, спортын мастер С.Мөнх-Оргил нар 13 оноогоор удааллаа. Эмэгтэйчүүдээс ОУИМ М.Нямжаргал 12 оноогоор түрүүлж, ДДХМ Г.Хэрлэнмөрөн 12, ОУИМ Э.Мандахнаран 11 оноогоор шагналт байранд шалгарлаа. Тэмцээний ахмадын ангилалд СМ Л.Гансүх, Д.Дорж, охидын ангилалд ДДХМ Э.Хүслэн, хөвгүүдийн ангилалд СМ Б.Пүрэвбаатар нар тэргүүлсэн байна. Дашрамд сонирхуулахад эрэгтэй, эмэгтэй ангилалд аваргалсан ОУИМ Д.Эрдэнэбилэг, М.Нямжаргал нарын төрсөн өдөр өнөөдөр буюу тавдугаар сарын 14-нд тохиосон юм.  

Тэмцээнийг Ардын боловсролын тэргүүний ажилтан, математикч Д.Доржсүрэн агсны гэр бүл, үр хүүхдүүд ивээн тэтгэсэн бөгөөд цаашид уламжлал болгон жил бүр зохион байгуулахаар болжээ. Монголын даамын холбооноос энэ онд чансааны оноо олгох 10 цуврал тэмцээнийг зохион байгуулах бөгөөд хамгийн өндөр оноо цуглуулсан 14 тамирчин оны шилдгийг шалгаруулах супер шагналын сан бүхий “Final 2018” шигшээ тэмцээнд оролцох эрхийг авах юм.  

А.Алтанчимэг, MNC телевиз

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.