Хонгорзул цэцгийн домог

Twitter Print
2018 оны 01-р сар 08-нд 10:29 цагт
Мэдээний зураг,

Нэгэн удаа Газрын хаан ганц хүүгээ хань ижилтэй болгох нууцхан хүсэлдээ хөтлөгдөн тэнгэрийн болон, лусын хаадыг гүнж, дагинасаа дагуулан ирэхийг санал болгож гэнэ. Тэд хариуд нь бидний уулзалтанд гүнж, ханхүү нар оролцдоггүйг та мэдэж байгаа тиймээс чадахгүй нь ээ гэхэд....

Газрын хаан би нэг л удаа та хоёроос гуйя. Үүнийг л зөвшөөрөөч та хоёр надаас бас хүссэн нэг нэг зүйлээ гуйгаарай хэмээн зөвшөөрөхийг ятгав. Арга буюу Тэнгэрийн хаан, Лусын хаан хоёр зөвшөөрч гүнж, ханхүү нараа дагуулж ирэхээр болжээ. Тэнгэр, Газар, Лусын хаадын уулзалт нижгэр болж гурван өдөр дараалан бороо орж байгаль дэлхий урьд байгаагүйгээрээ сэргэж цэцэг, жимс үлгэрийн юм шиг ургаж байв.

Лусын гүнжид ханхүүгийн уншдаг уран сайхан өгүүллэг, үлгэр, домгийг багтаасан ном судар ихэд таалагдсан бол Тэнгэрийн гүнжид газрын одод болох ишин дээрээ бүжин найгасан үлэмж гоо цэцэгс хамгаас илүү сэтгэлийг нь татаж байв.

Уулзалтын үеэр Тэнгэрийн гүнж аавдаа хандаж Газрын хааны ханхүүд сэтгэлтэй болсноо хэлж энд үлдэх тухайгаа хэлэхэд аав нь эрс татгалзав.

Гурав дахь өдрийн шөнө бороо зогсож ханхүүгийн ордны гадаа Тэнгэрийн гүнж Лусын гүнж тэр гурав хамгийн ариун нандин зүйл хайрын талаар ярилцаж байтал Тэнгэрийн гүнж гэнэт сэтгэл нь догдолж цурхиран уйлав. Ханхүү түүнийг аргадан нулимсыг арчиж сэтгэлтэйгээ хэлжээ... Гэвч Тэнгэрийн болон Лусын гүнжүүд урьд өмнө хэзээ ч газрын ханхүүгийн гэргий болж байгаагүй аж.

Ханхүү гүнж хоёр ихэд гуниглав. Үүр цайж Тэнгэрийн хаан болон Лусын хаан гүнж ханхүү нараа дагуулан явах болоход Тэнгэрийн гүнж алга болсон байлаа. Түүнийг Газрын хаад ийш тийш илч довтолгон өдөр шөнөгүй хайлгажээ. Эцэст нь Тэнгэрийн хаан үүр цүүрээр Газрын хааны ордны үүдэнд санаашран сууж байгаад нар мандахад тэдний үүдэнд нэгэн цэцэг дэлбээлж байгааг хараад түүнээс охиныхоо гэгээн ариухан хонгорхон харцыг олж харав.

Аав руугаа уучлал хүсэх мэт харан дэлбээлж байгаа охиныхоо амьсгалыг мэдэрсэн Тэнгэрийн хаан түүнийг тасдаж аваад явахыг хүссэнгүй. Харин нэг хүслийг нь биелүүлнэ гэж амласан Газрын хаан ханхүү хоёрыг дуудан, Ханхүүд хандан Миний гүнж чамд чин сэтгэл алдран танай ордны үүдэнд үлджээ. Түүнийг насан туршдаа чин сэтгэлээр хайрлаж яваарай, ганцхан үүнийг л хүсье.

Түүнийг битгий ганцаардуулаарай энэ цэцэгт миний охины ХОНГОРЗУЛ гэдэг нэрийг өгөөрэй гэж хэлээд бодлогошрон бодлогошрон байж өөрийн эрхгүй нулимс дусаан тэнгэрийн цээлд хорогдон хорогдон, гуниглан гуниглан одов. Ханхүү тэрхүү цэцгийг ажиглан хартал яг тэр шөнийн ярилцаж байхад Тэнгэрийн гүнжийн нулимс унагасан газар цэцэг дэлбээлсэн байлаа.
Үүнийг харсан Лусын гүнж хоёр найзынхаа чин хайрыг хүндэтгэж өнө мөнхөд услаж явахаа амлаж.

Өнөө хүртэл ХОНГОРЗУЛ цэцэг Тэнгэр Газар Лусыг холбосон ганц цэцэг гэж хүндлэгдсээр ирсэн түүхтэй. Ханхүү ч насаараа гэргий авалгүй ХОНГОРЗУЛАА харж хайрлаж явсан домог байдаг. ХОНГОРЗУЛ цэцгийн өргөстэй болсон түүхийг өөрийн гүнжээ муу муухай бүхнээс хамгаалах гэсэн аавынх нь сэтгэлийн нулимс нь ХОНГОРЗУЛ цэцгийн ишин дээр уусан урсахдаа өргөс болсон гэдэг ба Тэнгэрийн гүнжийн цэвэр ариун сэтгэл Газрын ханхүүгийн чин үнэнч сэтгэлийг ХОНГОРЗУЛ цэцгээр билэгдэн чин хайрын цэцэг, ордны титэмт цэцэг, тэнгэрийн гүнж цэцэг, тэнгэрийн дагина цэцэг хэмээн хүндэтгэн нэрлэж ирсэн хуучны домог байдаг...

Аяа, чин хайрын нулимснаас төрсөн цэвэр ариун ХОНГОРЗУЛ цэцгийн домог ийм буюу...

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.