П.Баярхүү: Улаанбаатар хотын нийтийн тээврийг өөрийн гэсэн өнгө төрхтэй болгох хэрэгтэй

2017 оны 04-р сар 19-нд 17:29 цагт
Мэдээний зураг,

Нийслэлийн ЗДТГ, Азийн хөгжлийн банкны “Улаанбаатар хотын тээврийн чадавхыг бэхжүүлэх” ТА-8212MON техникийн туслалцааны багийн хамтарсан семинар өнөөдөр Шангрила-д боллоо. 

Тус арга хэмжээнд нийслэлийн Засаг даргын орлогч П.Баярхүү, Азийн Хөгжлийн банкны Нийтийн тээврийн мэргэжилтэн Ки Жүн Ким, ЗТХЯ-ны Авто тээврийн бодлогын хэрэгжилтийг зохицуулах газрын дарга С.Батболд, Сангийн яамны Хөгжлийн санхүүжилтийн газрын дарга Б.Доржсэмбэд, ЭХЯ-ны Бодлого хэрэгжилтийг зохицуулах газрын дарга Б.Насантогтох, Замын цагдаагийн албаны Техник замын хяналтын хэлтсийн дарга Ч.Жаргалсайхан, НЗДТГ-ын Бодлого төлөвлөлтийн хэлтсийн дарга Г.Өлзийбаяр, НАЗГ-ын орлогч дарга Б.Индра, Нийслэлийн нийтийн тээврийн орлогч дарга Х.Булган болон бусад албаныхан оролцлоо.

Арга хэмжээг нийслэлийн Засаг Даргын орлогч П.Баярхүү нээж хэлсэн үгэндээ “Бид 2016-2020 он гэхэд Улаанбаатар хотоо өндөр технологид суурилсан, өөрийн өвөрмөц дүр төрх бүхий Зүүн хойд Азидаа санхүү эдийн засгийн бүс нутаг болгохоор зорин ажиллаж байна. Энэ ажлын хүрээнд BRT төслийг хэрэгжүүлэхээр болсон. Улаанбаатар хотын нийтийн тээврийг өөрийн гэсэн өнгө төрхтэй болгох хэрэгтэй гэж үзэж байгаа учраас бид дээрх төслийг хэрэгжүүлэхээр зорьж байна. Улаанбаатар хот өвөлдөө маш хүйтэн, нийтийн эзэмшлийн зам талбайн тохижилт сайнгүй, нийтийн тээврийн хэрэгслийн хүртээмж, соёл муу байгаагаас үүдэн иргэд нийтийн тээврийн хэрэгслээр зорчихоос аль болох татгалзаж байна. Энэ төсөл маань үүнийг шийдэж өгнө гэж харж байгаа. Бидний үзэж байгаагаар Зүүн дөрвөн замаас Баруун дөрвөн зам, тэр дундаа МУБИС –аас УИД хүртэлх замд байрлах автобусны буудлуудыг сүүлийн үеийн шилэн пассадтай болгох, барилгууд руу холбож, иргэдийнхээ дулаан, аюулгүй, тав тухтай зорчих нөхцөл боломжийг бүрдүүлэхийн тулд уг төслийг хэрэгжүүлэхийг зорьж байна.

Энэ далимыг ашиглаад  төслийн багийн бүрэлдэхүүнийг БНХАУ –ын И Чан хотод очиж туршлага судлах боломжоор хангаж өгсөн Азийн Хөгжлийн банкны хамт олонд баярлаж талархаж байгаагаа илэрхийлье” гэсэн юм.

Азийн Хөгжлийн банкны Нийтийн тээврийн мэргэжилтэн Ки Жүн Ким “2012 оноос хойш хийгдсэн BRT-ын зураг төслийн ажил нь хуучирсан байсныг шинэчилж нарийвчилсан зураг гаргаж өнөөдөр ийнхүү тайлангуудаа танилцуулахад бэлэн боллоо. Уг төслийн хүрээнд Герман улсаас ирсэн авто зогсоолын тусгай мэргэжилтнүүд ажиллаж байгаа. Улаанбаатар хотын авто зогсоолын төвүүдийн байршлаас хамаарсан төлбөрийг  судалж, авто зогсоолын менежментийг хэрэгжүүлэхээр зорьж байна. Судалгаанууд нь нэлээд үндэслэлтэй, дүн шинжилгээ хийхэд боломжийн байгаа.  Мөн үүн дээр өрхийн судалгааны дүнг танилцуулсны дараа нэлээд зүйл тодорхой болно. Гол асуудал бол Их тойруу, Нам Ен Жү –ийн гудамж зэрэг нь маш их хөдөлгөөнтэй шугамд хийгдэх ажлууд байна. Энэ хоёр шугамыг зэрэг ажиллуулах боломжгүй учраас  гурав дахь шугам буюу 7 буудлаас хотын төв чиглэлийн авто зогсоолын ажлыг Азийн Хөгжлийн банкны төслөөр хэрэгжүүлэх гэж байна” гэлээ.

Нийслэлийн Авто замын хөгжлийн газрын орлогч дарга Б.Индра “Өнөөдөр BRT төсөл хэрхэн хэрэгжих талаар холбогдох байгууллагуудын төлөөллүүд танилцуулга хийж байна. BRT төслийн төлөвлөлттэй холбогдуулан авто зам, тусгай замын нийтийн тээврийг аль хэсгээр хэрхэн зорчуулах, авто зогсоолын асуудлыг хэрхэн шийдэх зэрэг ерөнхий төлөвлөлттэй уялдуулан Авто замын газрын зүгээс цаашид хийж хэрэгжүүлэх ажлын төлөвлөгөөг боловсруулна. BRT төсөл нь энэ оноос эхлэн 2019 он хүртэл хэрэгжихээр болоод байна” гэв. 

Г.Ганаа

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Зочин

      (103.57.92.32) 2017-04-19 23:32
      • 0
      • 0

      Энэ маш зөв асуудал шүү. Нийслэлийн өнгө төрх, нүүр царай, соёл яах аргагүй нийтийн тээврээс эхэлнэ. Гэтэл манай нийслэлд үйлчилж байгаа автобус,таксинууд арай дэндүү заваан, бас техникийн наад захын шаардлага хангахгүй,үзэмжгүй, жолооч нарын ихэнх нь мэдлэг, боловсрол, ур чадваргүй, ядаж хүнлэг сэтгэлгүй, зорчигчдоо хүндэлдэггүй, байнга загнаж, хашгичдаг эвгүй зантай, дүрэм журмаа баримталдаггүй танхай хүмүүс байдаг. Энэ хүмүүсийг сонгон шалгаруулж, зөв хүмүүсийг ажиллуулах хэрэгтэй. Зорчигчид харин нэг үеэ бодвол илүү ухамсартай, үүргээ биелүүлж, картаа уншуулж, зөв зорчдог болсон. Мөнгөний хайрцгийг авсан нь маш зөв ажиллагаа болсон гэж бодож байна. Гэхдээ мэр сэр зорчигчид бэлэн мөнгөөр зорчих үзэгдэл ажиглагдаж байгааг анхаарч АЗ ЖАРГАЛТАЙ УЛААНБААТАР хот болоход иргэн бүрийн оролцоо чухал шүү гэж уриалъя. Аз жаргалыг хамтран бүтээцгээе нийслэлийн иргэдээ

      Хариулах