С.Жавхлан МАН-аас амлалт нэхэж гудамжинд жагсана

Twitter Print
2017 оны 04-р сар 14-нд 16:56 цагт
Мэдээний зураг,

Өчигдөр УИХ-ын чуулганы нэгдсэн хуралдаанаар Төсвийн тогтвортой байдлын тухай хуульд нэмэлт өөрчлөлт оруулах тухай хуулийн төслийн анхны хэлэлцүүлгийг хийж, гишүүд дэмжсэн билээ.

Энэ үеэр УИХ-ын гишүүн С.Жавхлан бухимдлаа илэрхийлж, МАН-ынхан амтлалтаа биелүүлэхгүй байж Ерөнхийлөгчийн сонгуульд хүнээ нэр дэвшүүлнэ гэвэл санасны чинь гарз шүү хэмээгээд татвар нэмбэл жагсаал зохион байгуулах болно гэдгээ мэдэгдсэн юм.

Тэрбээр “Намын бүлгүүдийн хуралдаан, та бүхний хууль баталж байгааг хараад гуниг төрж сууна. Та нар ОУВС-д орох гэж улайран зүтгэж, Монгол Улсын засаглалын тусгаар тогтнолыг шилжүүлчихлээ. Намын бүлгүүдийн хурлыг сонсож байхад бие биенийгээ чи ч идсэн, ингэсэн тэгсэн л гээд байх юм. Олон жил өнгө нь солигдож, АН, МАН хоёр иргэдийг хуурлаа шүү дээ. Одоо долоон татварыг нэмэх тухай ярьж байна. Танай намууд хоёулаа болиоч ээ. Одоо болсон. Амлалт дээр чинь байна. Ахмад настны тэтгэврийн насыг нэмэгдүүлэхгүй гэж. Сонгуульд нэр дэвшиж байхдаа мэнчийж улайрч, мэнэрч зүтгэсээр 65-уулаа орж ирсэн биз дээ. Татвар нэмэхгүй, шинэ төрлийн татвар оруулж ирэхгүй гэж цагаан дээр хараар бичсэн амлалт чинь энэ байна. Амлалтдаа хүрэхгүй байж Ерөнхийлөгчийн сонгуульд хүнээ нэр дэвшүүлнэ гэвэл санасны чинь гарз шүү. Намайг энд ямар ч нэмэргүй хүн гэж бодоод байх шиг байна. Надад энд эрх мэдэл, үүрэг алга л даа. Энд 75 хүний эсрэг С.Жавхлан ганцаараа байгаа. Харин гадаа гараад монголчуудтайгаа нэгдэхээр ганцаараа байна уу, үгүй юу хараарай. Татвар нэмэх асуудлыг эсэргүүцэж, жагсаал хийнэ. Цаашлаад УИХ-ыг тараах хэмжээний жагсаал хийнэ. Та нарын татвар нэмэх асуудал зөв юм уу, буруу юм уу гэдгийг түмэн олноос асууна. Маргаашнаас би жагсана.  Хэрэв миний буруу байвал би бууж өгнө” гэсэн.

Харин тэрбээр хэлсэн амлалтандаа хүрч маргааш /2017.04.15/ 13.00 цагаас Сүхбаатарын талбай дээр жагсахаар болжээ. Энэхүү жагсаалаа "Оффшорчдын эсрэг нэгдсэн хөдөлгөөн"-тэй хамтран зохион байгуулах аж. "Оффшорчдын эсрэг нэгдсэн хөдөлгөөн"-ийхөн оффшор данстай эрхмүүдийг эсэргүүцэж жагсах бол эрхэм түшээ маань төсвийн тодотголыг эсэргүүцээд жагсаж байгаа юм.

МАН-ынхан амлалтаасаа ухарч тэтгэврийн насыг нэмсэн, татвар нэмсэнтэй холбогдуулан тэрбээр Сүхбаатарын талбай дээр очиж үг хэлэх аж.

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.