В. Зеленский НҮБ, Улаан загалмайн нийгэмлэгт сэтгэл дундуур байгаагаа илэрхийлэв

Украины Ерөнхийлөгч Володимир Зеленский Германы Bild сонинд өгсөн ярилцлагадаа Украины Херсон мужид Каховка УЦС-ын далан нурж, хот тосгод усанд автаж байгаа энэ үед НҮБ болон Улаан загалмай нийгэмлэг иргэдийн амь насыг аврахаар ослын газарт хамгийн түрүүнд ирж ажиллах ёстой байтал дээрх байгууллагуудын ажилчид ослын газарт байхгүй байгаад сэтгэл дундуур байгаагаа илэрхийлжээ.

УЦС-ын далан нурсны улмаас Херсон мужид 5000 орчим байшин барилга усан доор ороод байгаа юм. Дроноор хийсэн бичлэгээс Каховка УЦС-ын ойр орчмын бүс нутгууд их хэмжээний үерт автсан болохыг харж болох юм. Зам талбай, байшин барилгууд бүхэлдээ усан доор орсон байна.

Днепр мөрөн дагуу байрлах Каховка УЦС-ыг оросууд хяналтандаа авсан байсан ба УЦС-ын далан энэ сарын 6-нд нурсан юм. Киев, Москва далан нурсан явдалд бие биенийгээ буруутгаж байгаа ч уг ослоос болж энгийн иргэд хамгийн их хохирол амсаж байна.

Украины парламентын гишүүн Олексий Гончаренко БиБиСи агентлагт өгсөн ярилцлагадаа нурсан далангийн 150 тонн моторын тос усыг бохирдуулж эхэлсэн талаар онцолж, уг ослын үр дагавар олон арван жилийн турш арилахгүй гэжээ. Түүний хэлж байгаагаар Днепр мөрөнгийн хоёр талд байгаа олон мянган иргэд тэр дундаа оросуудын хяналтанд байгаа бүс нутгийн иргэдийн амь нас аюулд ороод байгааг анхааруулсан байна. Орон нутгийн хэвлэл мэдээллийн хэрэгслүүдээр Днепр мөрөнгийн зүүн эргийн усанд автсан хот, тосгодын иргэд тусламж хүлээсээр байгаа тухай бичжээ.

Алешки хотын оршин суугчид сэтгүүлчдэд тусламж ирэхийг хүлээн, байшингуудынхаа дээвэр дээр олон цагийн турш сууж байгаа тухайгаа ярьжээ.

Алешки хотын дарга Евгений Рищук үерийн улмаас 3 хүн амь үрэгдсэн талаар мэдээлсэн байна.

Эх сурвалж: The Guardian

Содномцэрэнгийн Энхзаяа

mongolcom.mn

 

Холбоотой мэдээ: 

Каховка УЦС-ын далан нурснаас болж хот, тосгодууд усанд автжээ - http://mongolcom.mn/read/1704

 

 

Энэ мэдээ танд таалагдаж байвал LIKE хийгээрэй. Танд баярлалаа.