“Болор цом”-ын эзэн Л.Моломжамцын сүүлийн шатанд уншиж түрүүлсэн шүлэг

Twitter Print
2014 оны 01-р сар 27-нд 09:29 цагт
Мэдээний зураг,

Болор цом” 31 дэх удаагийн яруу найргийн наадам Өвөрхангай айм­гийн Арвайхээр хотноо боллоо. Өнөө жил “Болор цом” наадмыг үндэслэгч, ардын уран зохиолч, Хөдөлмөрийн баатар Д.Пүрэвдорж агсны мэндэлсний 80 насны ой тохиож байгаа тул түүний төрсөн нутагт энэ удаа болсон юм. 200 гаруй яруу найрагчаас шалгарсан 25 яруу найрагч Арвайхээр хотноо шүлгээ уншлаа. Хамгийн сүүлчийн буюу тавын даваанд яруу найрагч Б.Бат­сайхан, Л.Моломжамц, Д.Өсөх-Эрдэнэ, Ч.Ууганбаяр, О.Цэнд-Аюуш нар шалгараад байсан юм.

Ингээд эдгээр 5 яруу найрагч сүүлийн давааны шүлгээ уншсанаар 18 оноотой Лхагвасүрэнгийн Моломжамц эгшиг­лэнт эхийн найрагч болж "Болор" цом хүртсэн бол 17 оноогоор Оюун­цэцэгийн Цэнд-Аюуш дэд байрт шалгарлаа. Түүний хувьд уг наад­маас хоёр аман хүзүү, нэг гутгаар байрын шагнал хүртэж байгаа нь энэ юм. 

“Болор цом”-ын эзэн Л.Моломжамцын сүүлийн шатанд уншиж түрүүлсэн шүлгийг хүргэж байна.

Хэзээ ба хожмыг өгүүлэх Зангирмал үгс

Хорвоо дээр би ирж байснаа ч санах шиг алсад тэмүүлэн буйгаа ч тунгаах шиг

Хувьхан заяа тэнгэрээс тольдон намрын бороо цонхны цаана ч бас Сантын минь талд ч хөшиглөж байх шиг

Хорин жилийн тэртээд үлдсэн, аль эсвэл намайг үлдээсэн эмгийн минь дуу ч сэтгэлд хүүрнэн байх шиг

Хоног өдрүүдийг туулсан залуугийн мөр- шаргалхан хавтаст ном дотор биед минь сэрчигнэн буйг ч хуудас хуудсаар нь уншиж суунам

Зүсэрч байгаа бороо өнөөх л миний дотор буй гэнэхэн насны минь бүлэг дурдатгалууд

Хэдэн мянган үсэгний цаана нуугдах багын амрагийн дуртмал царай, зангирмал үгс, уйлсан нулимс

Зүйлийн хорвоод төөрүүлсэн олон зам, түүний дундаас миний олж  чадсанаа гайхах нэг л үнэн бодомж

Хэзээ ба хожим дахин олоход хэтийдсэн бүдэг дэнлүүт үдшүүдээ ч гайхан бахдаж байна

Энэ миний дотор буй тэр л хуудсууд зарим нь их тод, зарим нь хэт бүдэг, урсаж балартсан

Энэ намрыг л ганцхан давж чадаад үгүйрэн хийсч одох нь их юм

Энэ миний сэтгэлд буй сүүлчийнхээ хүчээр тодроод сарнин урсаж буй дурсамж бүхнээ би 

Эцэнгэр намрын бороот салхи, тогоруудын гэрэлт хүзүүнд зүүн уйтгарлан үлдэж буйгаа ч ойлгох юм

Миний дотор шувуу шиг бууж ааль юугаа дэлгэсэн мартагдахын аргагүй хонгорхон охинд ч

Миний багадаа унадаг байсан хайртай хүлгийн минь тунгалаг нүдэнд ч

Дэндүү багад минь  одсон ч энхрий дотно хайрлан ширтдэг байсан ээжийн минь хөрөгт ч

Хэзээ ба хожим дахин ингэж учрахгүйн тулд л би зүүгдэн уймардаг ч байж болох юм

Этгээд намрын бороо цонхон цаана сэтгэл уйлан элэглэвч,

Эгэл нандин дурсамж дурсамж бүхнийг минь салхиaраа хийсгэн үгүйрүүлэвч 

Эх нутгийн минь аглагт хэвтэх норсон чулуудын болор гэрэл бүхэн цугаар

Хэзээ ба хожмын минь зүгт уйтгарлашгүйн хүчээр сацарнам бусуу даа.

Дэд байрт шалгарсан О.Цэнд-Аюушын сүүлийн шатанд уншсан шүлэг


Эх орны тухай бодол

Гүйцэт боловсорч ханаад хальсаа тэмтэрч байгаа жүрж шиг нартай

Гүү зогсоогоороо унтаад зүүднээсээ сэрж чадахгүй байгаа юм шиг талтай

Гүнрүүгээ түрсэн үндэс эрдэнийн чулууг тойрч байгаа юм шиг сартай

Гүүр хуучирч хөхрөөд урсан одож байгаа юм шиг салхитай

Эх орон минь

Цагаан согоо манан зуугаад амаржиж байгаа юм шиг үдэштэй

Цасыг биедээ зузаан түрхээд нойрсож байгаа толгод шиг гунигтай

Цангасан тэмээн дотроос зэрэглээ үүсч байгаа юм шиг говьтой

Цамцны минь товчийг арван долоотой охин цэцгээр орлуулж байгаа юм шиг үзэмжтэй
Эх орон минь

Эр зоригт бүргэд тэнгэртээ хаанчилж ханаад

Элгээ цөмөртөл газардсан юм шиг хөндийтөй

Эртний бурхад мөнхийн төгс галбирыг олоод

Эх хүн үрээ хүлээж нимгэрэхийг үзэж тэвчихгүй

хөдөлж чадахгүй байгаа юм шиг уулстай

Эрдэнийн гөрөөсний нулимс уран сормуусаас нь унаж байгаа юм шиг бороотой

Эвдэрхий буурал