Газрын тосны газар, “Сансрын геологи хайгуул” компанитай бүтээгдэхүүн хуваах гэрээ байгууллаа

Twitter Print
2014 оны 01-р сар 21-нд 10:40 цагт
Мэдээний зураг,

Газрын тосны хайгуулын Номгон 9-р талбайд Газрын тосны газар, “Сансрын геологи хайгуул” компанитай бүтээгдэхүүн хуваах гэрээ байгуулжээ. Ингэснээр Монгол улс газрын тосны 21 талбайд бүтээгдэхүүн хуваах гэрээ байгуулаад байна. “Сансрын геологи хайгуул” компани эхний таван жилд 26.8 сая ам.долларын хөрөнгө оруулалт хийхээр урьдчилан төлөвлөөд байгаа ажээ.

Өмнөговь аймгийн Цогтцэций, Манлай, Ханбогд, Даланзадгад болон Номгон гэсэн таван сумын нутаг дамнан байрлах Номгон 9-р талбайн 29 мянга 866 км квадратад бүтээгдэхүүн хуваах гэрээг байгуулжээ. Номгон 9-р талбайгаас Тавантолгойн бүлэг орд, Оюу толгой болон зарим нэг газрыг хасч тооцсон болохыг Газрын тосны газраас мэдээллээ. Номгон 9-р талбай нь БНХАУ-ын хилтэй залгаа оршдог учраас газрын тосны бүтээгдэхүүн илэрсэн тохиолдолд талбайн хувьд давуу талтай байгаа ажээ. 2009 онд Номгон 9-р талбайд бүтээгдэхүүн хуваах гэрээ байгуулах үүрэг бүхий ажлын хэсэг байгуулагдан ажиллаж байсан бөгөөд бусад талбайтай харьцуулахад судалгаа шинжилгээний ажил төдийлөн сайн хийгдээгүй Номгон 9-р талбайгаас метан хий илрэх боломжтой гэж геологичид болон салбарынхан үздэг байна. Учир нь “Айвэнхо Майнэс” компани Номгон 9-р талбайд метан хийн хайгуул явуулж, дараа нь талбайгаа буцаан өгсөн байдаг ажээ.

Монгол улсын нутаг дэвсгэрийн нийт хэмжээнд газрын тосны хэтийн төлөв бүхий 31 талбай байгаагаас өнөөдрийн байдлаар 21 талбайд гадаад, дотоодын 17 компани үйл ажиллагаа явуулж байна. Үүнээс гадна Увс 1, Ар булаг 29 дүгээр талбайд бүтээгдэхүүн хуваах гэрээ байгуулах ажил явагдаж байгаа ажээ. Эдгээрээс гурван талбайд олборлолт явуулж байгаа юм.  

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.