Ерөнхий сайд Н.Алтанхуяг: "Үйлдвэрлэгчид битгий үнэрхээрэй"

Twitter Print
2014 оны 01-р сар 19-нд 08:30 цагт
Мэдээний зураг,

Долоо хоног бүрийн Пүрэв гаригт Ерөнхий сайд сэтгүүлчидтэй 30 минут уулзалт зохион байгуулдаг. Тэгвэл энэ удаад Ерөнхий сайд Дүнжингарав худалдааны төвд 30 минут саатлаа.

Манай орны үндэсний баярын нэг болох Цагаан сарын баяртай холбогдуулан өчигдрөөс эхлэн Мишээл экспо болон Дүнжингарав худалдааны төвүүдэд жил бүр Үйлдвэрлэл, Хөдөө Аж Ахуйн Яам, Хөдөлмөрийн Яамнаас хамтран зохион байгуулдаг “Монголд үйлдвэрлэв” Цагаан сар 2014 үзэсгэлэн худалдаа зохиогдож байгаа билээ. Уг үзэсгэлэн худалдаанд зориулж Засгийн газар үйлдвэрлэгчдээ дэмжин худалдааны төвийн түрээсийн төлбөрөөс 50 хувийг төлөлцсөн байна.

Иймээс Ерөнхий сайд Н.Алтанхуяг үзэсгэлэн худалдааны нээлтийн үеэр үйлдвэрлэгчиддээ хандан “Засгийн газар үйлдвэрлэгчдээ дэмжиж энэхүү үзэсгэлэн худалдааг зохиож, худалдааны төвийн түрээсийн төлбөрөөс хуваалцаж байгаа. Иймд бараа бүтээгдэхүүнээ хямдруулж худалдаарай, битгий үнэрхээрэй” хэмээн захилаа.

Түүнчлэн ерөнхий сайд өнгөрсөн жил зохион байгуулагдсан үзэсгэлэн худалдаагаар дөрвөн тэрбум гаруй төгрөгийн худалдаа хийгдсэнийг дуулгаад, энэ жил үзэсгэлэнг өргөжүүлсэн тул илүү их ашиг орлогыг цуглуулж, монголчууд бие биеэ дэмжинэ гэдэгт итгэлтэй байгаагаа хэлсэн юм.

Уулзалтын үеэр дээрх үзэсгэлэн худалдаанд оролцож буй үйлдвэрлэгчдийн төлөөлөл Ерөнхий сайдад бүтээгдэхүүнийхээ дээжээс танилцууллаа. Үүнээс харахад оймс, гуталнаас эхлээд малгай, дээл, хувцас, бэлэг дурсгал, хивс, цагаан идээ гэх мэтчилэн зүйлсийг дэлгэжээ.

Сүүлийн найман жилийн турш Сар шинийн баярын өмнө зохион байгуулдаг уг үзэсгэлэнд энэ жил 700 гаруй аж ахуйн нэгж, иргэд оролцож байгаа бөгөөд нийслэлийн үйлдвэрлэгчдээс гадна хөдөө, орон нутгийн үйлдвэрлэгчид түлхүү оролцож байгаа аж.

Уг үзэсгэлэнгийн нээлтийн үеэр ерөнхий сайд Н.Алтанхуяг “Бид Цагаан сарын баяр болохоор Эрээний барааг худалдан авдаг байсан бол сүүлийн жилүүдэд иргэд эх орныхоо бүтээгдэхүүн, үндэсний үйлдвэрлэгчдээ түлхүү дэмжиж байгаа нь харагдаж байна. Тиймээс энэ жил баярын бэлэг сонгохдоо үндэсний үйлдвэрлэгчдээ дэмжиж, худалдан авалт хийхийг нийт ард, иргэддээ уриалж байна” гэсэн юм.

Энэ оныг Засгийн газраас “Монголдоо бүтээцгээе” уриан дор үндэсний үйлдвэрлэгчдэд нэг их наяд төгрөгийг зарцуулахаар төлөвлөсөн байна. Үүнээс гадна Монголд үйлдвэрлэх, дотооддоо болон гадаадад бүтээгдэхүүнээ гаргахаар 200 гаруй аж ахуйн нэгж үйлдвэрийн саналаа ирүүлээд байгаа аж.  

Хөдөлмөрийн яам, Жижиг, дунд үйлдвэрлэлийн хөгжлийн газрын дарга Б.Бат-Амгалан.

- Энэ жилийн үзэсгэлэн худалдааны онцлог нь юу байна вэ?

- Найм дахь жилдээ зохион байгуулагдаж байгаа уг үзэсгэлэн худалдаа нь нийт үзэсгэлэнгийн талбайн хэмжээг өргөтгөж, үргэлжлэх хугацааг уртасгаж, үзэсгэлэн худалдаанд оролцогчдын талбайн түрээсийн 50 хувийг хөнгөлж өгснөөс гадна Дүнжингарав худалдааны төвийн зүгээс жижиг, дунд үйлдвэрлэгчдийг дэмжин, хямдрал урамшуулал үзүүлж өгснөөрөө онцлогтой, жижиг, дунд үйлдвэрлэгчдэд боломж олгосон, тэднийг дэмжсэн ажил болж байна. Тиймээс хэрэглэгчдэд хямд үнэтэй бараа нийлүүлэхийг жижиг, дунд үйлдвэрлэгчдээс хүсч байгаа.

- Энэ жилийг жижиг, дунд үйлдвэрлэгчдийг дэмжих жил болгон зарласан. Энэ утгаараа ямар ямар ажил төлөвлөсөн байгаа вэ?

- Энэ онд нэгдүгээрт, үйлдвэрлэлд ойролцоогоор нэг их наяд төгрөг зарцуулна гэсэн төлөвлөгөөтэй байгаа. Мөн 1.5 тэрбум төгрөг хүртэлх борлуулалтын орлоготой аж ахуйн нэгжүүдийн орлогын 90 хувийн буцаан олголтыг Сангийн яамнаас санаачлан, хэрэгжүүлж байна. Түүнчлэн хөнгөлөлттэй, хамтын ажиллагааны зээлийг жижиг, дунд үйлдвэрлэл эрхлэгчид барьцаа хөрөнгийн дутагдалтай байвал барьцаа хөрөнгийх нь 60 хүртэлх хувийн зээл батлан даалтаар гаргаж өгөх Зээлийн хөрөнгийн батлан даалтын сангийн үйл ажиллагааг энэ онд улам бүр хэрэглэгчдэд хүргэж, бас нүдээ олсон төслүүдийг дэмжих зэрэг бодлоготой ажиллаж байна.

- Энэ удаагийн “Монголд үйлдвэрлэв” Цагаан сарын үзэсгэлэн худалдаанд оролцогч аж, ахуйн нэгж, иргэд ямар шалгуураар оролцсон бэ?

- Нийт хоёр мянган метр.кв талбайтай, хоёр долоо хоногийн турш үзэсгэлэн худалдаа зохион байгуулсан учир маш олон оролцох хүсэл ирсэн. Тухайлбал, жижиг, дунд үйлдвэрлэгчид гэдэг нь өрхийн үйлдвэрлэл, бичил бизнес эрхэлж буй иргэд гэсэн үг. Тиймээс тэднийг бүгдийг оролцуулах бодлого баримталж ажилласан. Энэ жил Үйлдвэрлэл, хөдөө аж ахуйн яам дээр мэргэжлийн холбоод, Хөдөлмөрийн яам дээр жижиг, дунд бизнес үйлдвэрлэгчдийн холбоод уг ажлыг зохион байгуулах хүрээнд үзэсгэлэн худалдаан талбайг өргөсгөх зориулалттай ажилласан юм.

Үзэсгэлэнд оролцогч “Exclusive” ХХК-ийн захирал Г.Майцэцэг:

- Материалаа хаанаас авдаг вэ?

- Материалын хувьд манай улс даавуу үйлдвэрлэдэггүй учир манай компаний хувьд Хятад, Солонгос, Туркээс материалаа авдаг. Тухайлбал тухайн бүтээгдэхүүнийг урлахад зохицсон, боломжийн үнэтэй, хамгийн чанартай материал хаана байна тэндээс л авдаг. Жишээлбэл, манай дээр худалдаалж буй нэхийний хувьд түүхий эд нь Дарханы нэхий байна, бас Хятад нэхийгээр хийсэн нэхий дээл ч байна.

- Танай компаний дизайнер, оёдолчдын хувьд?

- Манай компани үүсгэн байгуулсан цагаасаа эхлэн хүний нөөц буюу боловсон хүчин бүрдүүлэх тал дээр их анхаарсан. Тухайлбал манай хамт олон багаа бүрдүүлэх гэж бараг хоёр жил хайсан. Ер нь хамгийн шилдэг, чадварлаг хамт олон буюу Турк, Солонгос, Чех, Унгарт ажиллаж байсан оёдолчид, эсгүүрчид ажиллаж байна. Мөн шинэ, залуу оёдолчдыг сургаж, ажиллуулж байна.

- Захиалгын үйлчилгээ хийж байгаа юу?

- Манай төв салбар дээр захиалга авдаг.

- Энэ удаагийн үзэсгэлэнд танай байгууллага ямар онцлогтой, ямар бараа бүтээгдэхүүнтэй оролцож байна вэ?

- Уг үзэсгэлэн нь Монголчууд юу бүтээж чаддагаа ард түмэндээ харуулж, мөн урд хөрш рүү гарч буй мөнгөний урсгалыг хаах зорилготой оролцож байгаа. Бараагаа худалдаалахаас илүүтэйгээр бид захиалга авах зорилготой байна. Жишээ нь өнөөдөр Нарантуул захын худалдаачин, хотын төвийн дэлгүүрийн эзэн гээд хэсэг хүмүүс бидэнд хандан захиалга өгсөн. Ерөөсөө бид ийм л үг сонсохыг хүсч байсан, учир нь бид худалдагч биш, бид зөвхөн үйлдвэрлэгчид учир энэ үзэсгэлэн нээгдээд л өгөөжөө өгч эхэлж байгаад их баяртай байна.

Худалдагч нь худалдагчаа, худалдаачин нь худалдаачинаа, үйлдвэрлэгч нь үйлдвэрлэгчээ л хийх боломжтой болж байна, тиймээс ч удахгүй манай орон үйлдвэрлэгч орон болно гэдэгт итгэлтэй байна.

Үүнээс гадна Дүнжингарав, Мишээл экспон үзэсгэлэнд маш хямдралтай үнээр лангуу түрээслэлээ, ерөнхий сайд маань өөрөө ирж нээлтэд оролцсон нь бидэнд хүч өгч, ард түмэнд үндэсний үйлдвэрлэгчдийг таниулах, сурталчилсан сайхан ажил хэрэг боллоо.

Уг үзэсгэлэнд манай компаний зүгээс оролцож буй бүтээгдэхүүний онцлог гэвэл Монгол дээл шиг загвартай сөдөн куртка, мөн бусад бараа бүтээгдэхүүнүүдээрээ оролцож байна.

- “Exclusive” компанийхаа тухай танилцуулаач?

- Өмнө нь нөхөртэйгээ Польшт оёдлын үйлдвэр ажиллуулж байсан. Ингээд хүний нутагт сурч, мэдсэн зүйлээ эх орондоо ашиглаж, хөнгөн үйлдвэрийн салбарыг хөгжүүлэх, сурсан мэдсэнээ хэрэгжүүлэх зорилготой гэр бүлийн хүнтэйгээ хамтран 2000 оноос Монголдоо оёдлын үйлдвэрлэл эрхэлж байгаад 2008 онд “Exclusive” компанийг байгуулсан. Манай компани хамгийн бодит үнийг тогтоож, чанартай бүтээгдэхүүн үйлдвэрлэх зорилготой ажиллаж байна. 

Д. Энхнаран

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.