Ч.Отгочулуу: Нэмэлт санхүүжилтийн 4 тэрбум ам. доллар бол Оюутолгойн нийт орлогын хажууд бага мөнгө

Twitter Print
2014 оны 05-р сар 06-нд 19:32 цагт
Мэдээний зураг,

Уул уурхайн яамны Стратеги, бодлого төлөвлөлтийн газрын дарга, Оюутолгой компанийн ТУЗ-ийн Монголын талын 3 гишүүний нэг Ч.Отгочулуутай уулзаж цөөн асуултад хариу авснаа хүргэе.

-“Оюутолгой”-н хөрөнгө оруулагчид нэмэлт санхүүжилт шаардлагатай гэсэн шаардлага тавьж, далд уурхайн бүтээн байгуулалтыг есдүгээр сар хүртэл хойшлуулаад байгаа. Оюутолгойд Монголын эрх ашгийг хамгаалж байгаа 3 гишүүний нэгийн хувьд яг одоо байдал ямархуу байгаа талаар тайлбар хийхгүй юу?

-Оюутолгойн далд уурхайн бүтээн байгуулалтын талаар манайхан жаахан буруу ойлголттой яваад байна. Далд уурхайн ажил бол анх төсөл эхлэхэд л зэрэгцээд эхэлсэн ажил юм шүү дээ. Оюутолгой бол хамрах талбай ихтэй, бүлэг орд юм. Тэгэхээр үйлдвэр ажиллаж байгаа тохиолдолд далд уурхайн бүтээн босголтын ажил байнга хийгдээд явна гэсэн үг. Энэ бол ганц далайлтаар, нэг удаа хийгээд орхих ажил ерөөсөө биш.

-Оюутолгой ордын одоогоор судлагдсан нөөцийг 60-70 жил ашиглах боломжтой гэдэг. Гэтэл энэ том бүлэг ордын ихэнх нөөцийг далд уурхайн аргаар ашиглана гэж бодоход анхнаасаа далд уурхайн бэлтгэл ажил аль хэр хангагдсан юм бол. Энэ талаар яг мэргэжлийн хүмүүсийн тайлбар, дүгнэлт туйлын хангалтгүй байгаа?

-Зөв л дөө. Таны энэ асуултад Оюутолгойн далд уурхайн бэлтгэл ажил маш сайн хийгдсэн гэдгийг хариуцлагатай хэлэх байна. Одоогоор доошоо босоо амнууд, нэвтрэлтүүдээ бүрэн хийчихсэн байгаа. Түүнчлэн том том тунель, хоолойнуудаа барьчихсан. Яг одоогоор баяжуулах үйлдвэр хэвийн үйл ажиллагаанд орчихсон байгаа. Ил уурхайгаас хангалттай тэжээл татагдаж байна.

Харин яг одоо яригдаж байгаа далд уурхайн бүтээн байгуулалтын ажил 2016-2019 онд хийгдэж дуусах ёстой. Санхүүжилт нь удааширсантай холбогдон одоогоор ажил нь түр зогссон байгаа.  

-Хамгийн гол нь өөрөөс тань далд уурхайн санхүүжилт зогсчихоод байгаа нөхцөл шалтгаан, түүнээс гарах үр дагаварын асуудлыг л тодруулах гэсэн юм л даа?

-Далд уурхайн бүтээн байгуулалтын ажилд 4 орчим тэрбум ам. долларын санхүүжилтийг гадны банкуудаас зээлээр авах асуудал яригдаж л байгаа. Ер нь далд уурхай өөрөө арван хэдэн тэрбум ам. доллараар босох аварга том ажил юм. Түүний хажууд өнөөдрийн ярианы гол сэдэв болоод байгаа 4 тэрбум ам. доллар бол үнэндээ бага мөнгө юм л даа. Үндсэндээ энэ 4 тэрбум ам. долларын санхүүжилт бүтсэн бүтээгүй Оюутолгой цаашаа явдгаараа л явна. Тэртэй тэргүй Оюутолгой өөрийнхөө ашгаар далд уурхайн бүтээн байгуулалтаа 100 хувь санхүүжүүлээд явчих   боломжтой. Гадуур яригдаад байгаа шиг далд уурхайн ажил бүрмөсөн зогссон юм ерөөсөө байхгүй.

-Тэгвэл Оюутолгойн далд уурхайн ажилд ямар ч асуудал байхгүй хэрэг үү?

-Далд уурхайтай холбоотой ТЭЗҮ-ээ тодотгох ажил бол байгаа. Одоо яагаад байна гэвэл нэгдүгээрт дэлхийн зах зээл дээр зэсийн үнэ уначихлаа. Зэсийн үнэ унахаар агуулга, технологийн горим ч дагаад өөрчлөгдөнө. Өнгөрсөн хоёр жилийн байдлаар дэлхийн уул уурхайн компаниуд ерөнхийдөө асар их алдагдалтай ажилласан. “Рио-Тинто” гэхэд л 10 гаруй тэрбум ам. долларын алдагдал хүлээсэн байна лээ. Дэлхий нийтийн чиг хандлагаас шалтгаалан хөрөнгө оруулагчид эргэлзсэн байдалтай болж, хөрөнгө оруулалт зогсчихлоо. Далд уурхайтай холбоотой гэрээ хэлцлийг идэвхжүүлэх, ТЭЗҮ-ийг нягтлах гээд ажил их байна.

-Сүүлийн үед Оюутолгойд Монголын Засгийн газрын эзэмшиж байгаа 34 хувийг хэсэгчлэн зарах, гадаадын зах зээлд гаргах тухай яриа хүчтэй дуулдах боллоо. Үнэхээр Монголын эзэмшлээс 10 хувийг нь зарах хэмжээнд ярилцан тохиролцож байгаа юм уу?

-Оюутолгойн хөрөнгө оруулалтын гэрээг одоо хүчин төгөлдөр байгаа Ашигт малтмалын гэрээгээр байгуулсан. Хууль тогтоомжийн дагуу тусгай гэрээтэй байгаа учраас одоогоор 34 хувиас хэсэгчлэн зарах тухай асуудал яригдаагүй. Хэрвээ 34 хувиа зарахдаа тулбал ямар нэг байдлаар хөрөнгө оруулагчтайгаа харилцан тохиролцоно. Ашигт малтмалын хуулийн дагуу стратегийн орд дээр үйл ажиллагаа явуулж байгаа аж ахуйн нэгжүүдийн 10 хүртэлх хувийг л хөрөнгийн биржээр худалдах заалт байдаг. Энэ хүрээнд Оюутолгойн 34 хувийнхаа тодорхой хэсгийг ард иргэддээ хөрөнгийн биржээр дамжуулж худалдах боломж байгааг үгүйсгэхгүй. Гэхдээ энэ асуудлыг эхлээд УИХ дээр ярилцаж, нэгдсэн шийдэлд хүрсний дараа л Засгийн газар дээр ярих учиртай. Миний таамаглаж байгаагаар энэ тухай асуудал ойрын үед яригдахгүй л болов уу. Тэгээд ч энэ нь ганц далайлт, сэтгэлийн хөөрлөөр шийдчих асуудал биш л дээ. 

Сэтгүүлч Д.Энхтүвшин

E-mail: eegii1967@yahoo.com 
Утас: 76110303, 76110505

Сэтгүүлч Г.Ганчимэг

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.