Сураггүй болоод байсан Хятадын Гадаад хэргийн сайдыг огцрууллаа

Хятадын Гадаад харилцааны сайдыг албан тушаалаас нь огцруулжээ

БНХАУ-ын Гадаад харилцааны сайд Чин Ганыг албан тушаалаас нь огцруулжээ. Түүний оронд Коммунист намын Төв хорооны Гадаад харилцаа хариуцсан дарга Ван Иг томилсон байна.

Хятадын Ерөнхийлөгч Си Жиньпиний ойрын хүн гэгдэж байсан Гадаад харилцааны сайд Чин Ган өнгөрсөн 6-р сарын 25-наас хойш олон нийтийн өмнө ил гараагүй нь олны анхаарлыг татаад байсан юм.

57 настай Чин Ган өнгөрсөн 12-р сард Гадаад харилцааны сайдаар томилогдож, 6-р сард Бээжинд албан ёсны айлчлал хийсэн АНУ-ын Төрийн нарийн бичгийн дарга Энтони Блинкентэй уулзсан билээ.

Синьхуа агентлаг, "Хятадын хууль тогтоогчдын саналаар Ван Иг Гадаад харилцааны сайдаар томилж, Чин Ганыг Гадаад харилцааны сайдын албан тушаалаас нь огцрууллаа." хэмээн мэдээлжээ.

Уг тушаалд Ерөнхийлөгч Си Жиньпин гарын үсгээ зурж баталсан ба  тэтгэвэрт гарах гэж буй Хятадын Төв банкны дарга И Ганы оронд санхүүч Пан Гоньшэнийг томилохоор болжээ.

69 настай Ван Игийн хувьд 2013-2022 онд Хятадын Гадаад харилцааны сайдаар ажиллаж байсан ба түүнийг уг албан тушаалд дахин томилсон явдлыг мэргэжилтнүүд Хятадын гадаад  харилцааг тогтворжуулах алхам хэмээн тодорхойлж байна.

Хятадын засгийн газрын хамгийн олонд танигдсан улстөрч гэгдэж байсан Чин Ганын ямар нэг тайлбаргүйгээр олон нийтийн өмнө ил гарахгүй удсан явдлыг иргэд нэг бол түүнийг улс төрийн шалтгаанаар шийтгэсэн үгүй бол гэр бүлээс гадуурх харилцаанд орсон явдалтай нь холбоотой гэж таамаглаж байсан юм.

Тэрээр энэ сарын 4-нд Европын холбооны Гадаад харилцаа хариуцсан дарга Йосеп Боррельтэй хийх уулзалтаа ямар нэг тайлбаргүйгээр хойшлуулсан нь олны анхаарлыг бүр ч ихээр татсан юм. 

Түүнчлэн өнгөрсөн мягмар гарагт Гадаад харилцааны яамны хэвлэлийн төлөөлөгчөөс сэтгүүлчдийн зүгээс Чин Ганы тухай асуухад тэрээр түүнд энэ талаар ямар нэг мэдээлэл байхгүй хэмээн мэдэгджээ.

Тухайн үедээ Хятадын түүхэнд Гадаад харилцааны хамгийн залуу сайдаар томилогдсон гэгдэж байсан Чин Ган  хамгийн удаан хугацаагаар олон нийтийн ил гарахгүй, алга болсон Коммунист намын хамгийн дээд албан тушаалтан болж байгаа юм.

Эх сурвалж: BBC

Содномцэрэнгийн Энхзаяа

Mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.