"Макдоналдс" компани нь “Монгол HD”-ийг олон улсын шүүхэд өгөхөөр болжээ

Twitter Print
2013 оны 12-р сар 25-нд 07:09 цагт
Мэдээний зураг,

"МсDonalds Монголд ирлээ" гэх худал сурталчилгааг зарим хэвлэл мэдээллийн байгууллагуудаар мөнгө төлж олон нийтэд түгээснээр "Монгол" HD телевиз зар сурталчилгааны тухай хууль зөрчсөн болохыг холбогдох албаныхан мэдэгдэж байна. Өөрөөр хэлбэл, тус телевизийнхэн "Монголын сэтгүүлзүй гэж худалдагдсан салбар, мөнгө л төлж байвал ямар ч мэдээг цацна, нийтэлнэ" гэдгийг олон нийтэд ойлгуулахыг оролдсон нэвтрүүлэг хийж цацсан нь дуулиан тариад байгаа билээ. Тэгвэл "өөдөө хаясан чулуу өөрийн толгой дээр" гэдэгчлэн Монголын хэвлэл мэдээллийн салбарыг “цөм цохиж”, өөрсдийгөө өндөрт өргөх гэж байгаад олон нийтийг төөрөгдүүлж, сэтгүүл зүйн салбарыг доромжилсон үйлдэл гаргаж “харанхуй нүхэндээ” өөрсдөө унаж орхив.

Ард түмний сэтгэлд “бохир сэтгүүл зүй” гэгчийг олон нийтэд дэлгэж, өөрсдөө жинхэнэ “баатар” болох арга сүвэгчилсэн энэ үйлдлийн буруутан нь хэн бэ гэдгийг ШӨХТГ-аас ч нотлоод өгсөн билээ. Тиймээс бид үнэнийг ил тод болгох үүднээс ШӨХТГ-ын дарга О.Магнайгаас дараах тодруулгыг авсан юм.

Сүүлийн үед хэвлэлээр шуугих болсон "МсDonalds Монголд ирлээ" гэсэн гарчиг бүхий сурталчилгаанаас болж "Монгол" НD телевизийнхэн Монголын хэвлэл мэдээллийн байгууллага авлигад автсан, мэргэжлийн бус, бохир сэтгүүл зүй мэтээр нэр бүхий телевиз болон сонины нэр хүндэд нь халдсан. Харин та энэ үйлдлийг хэрхэн дүгнэж байна вэ?

Монгол улс зар сурталчилгааны тухай хуультай. Тиймээс тухайн сурталчилгаатай холбоотой хариуцлагыг зар түгээсэн хуулийн этгээд хүлээх ёстой. Би ч гэсэн анх энэ мэдээллийг сонсоод итгэсэн. Дараа нь өөр зорилгоор ийм мэдээлэл түгээснийг нь олж мэдсэн л дээ. Надад одоогоор "МакДоналдс ирэх нэгдүгээр сараас эхэлж үйл ажиллагаа явуулна гэсэн ташаа мэдээллээс болж хохирлоо" гэж хэн ч гомдол ирүүлээгүй.

МакДоналдс Монголд нээгдэх тухай ташаа зарыг олон нийтэд түгээсэн асуудалд та хэр нухацтай ажиллаж байна вэ. Цаашдаа энэ асуудлыг шалгах уу?

Хэрвээ иргэд уг мэдээллээс болж сэтгэл санааны хохирол учирсан гэж үзвэл надад хандаж болно. Түүнчлэн нэр хүндэд нь халдсан хэвлэл мэдээллийн аль нэг байгууллага нийтээрээ хохирсон, эсвэл сонины захиалагчид худлаа мэдээллийг тавьснаас болж хохироосон гэж үзэж буй тохиолдолд манай байгууллагад хандаж болно. Хуулиараа МакДоналдс Монголд нээгдэх тухай ташаа зарыг олон нийтэд түгээж, иргэдийг мэхэлсэн "Монгол" НD телевиз бүрэн хариуцлага хүлээх ёстой.

"Монгол" НD телевизийн түгээсэн мэдээлэл зарим хэвлэл мэдээллийн байгууллагын нэр төрд халдсан. Энэ нь хэр шударга өрсөлдөөн бэ?

Дээрх нэр бүхий байгууллагууд нэр хүндэд нь халдсан гэж үзэж байгаа бол шүүхэд хандаж, асуудлаа бүрэн шийдүүлэх боломжтой.  Яагаад гэвэл эрх нь нээлттэй байна шүү дээ. Ер нь нэр төрд халдах асуудал ч гэсэн хуулиар зохицуулагддаг. Тухайн мэдээллийг нийтэд түгээхдээ мөнгөө төлж, зар сурталчилгааны журмаар нийтлүүлсэн бол зар сурталчилгааны хуулиар л асуудал шийдэгдэнэ. Тэгэхээр миний ойлгож байгаагаар зарыг өгсөн байгууллага буюу "Монгол" НD телевиз зартай холбоотой үүссэн нөхцөл байдлыг бүрэн хариуцах юм.  Ер нь ямар ч “мэдээллийг нийтэд түгээхдээ эхлээд хуулиа судлах хэрэгтэй”  гэх тайлбарыг хэлсэн юм.

Тэгвэл "МакДоналдс" компанийн манай бүсийг хариуцсан салбараас нэр хүндийг нь ашигласан хэмээн гомдол гаргах гэж байгаа талаар баттай эх сурвалж мэдээлж байгаа юм.

Өөрөөр хэлбэл, "Макдоналдс" компани нь “Монгол” HD телевизээс их хэмжээний мөнгөн төлбөр нэхэхээр бэлтгэж байгаа аж. Учир нь тус телевиз "МакДоналдс”-ын нэрийг ашиглахдаа зөвшөөрөл аваагүй юм байна. Тиймээс тэд Олон улсын шүүх болон Оюуны өмчийн газар хандах гэж байгаа талаар эх сурвалж мэдээллээ.

Тодруулбал, "МакДоналдс"-ын БНХАУ дахь Азийн бүс нутаг хариуцсан салбараас зөвшөөрөл аваагүй, тэрчлэн лого, шошгыг нь ашиглаж зүй бусаар гутаан доромжилсон сурталчилгаа явуулсан учир ийнхүү тэд шүүхэд өгөхөөр болжээ.

Мөн “Монгол” HD телевиз Монголын сэтгүүл зүйг бохир байна гэдгийг илчлэхийн тулд арав гаруй сонин, телевиз, сайтад 400,000-1,000,000 төгрөгийг төлсөн байдаг. Ингэснээр тэд булхайг таниулж, бохирыг ил болгоно гэж бодсон ч харин эсрэгээрээ эргэнэ гэдгийг яаж мэдэхэв дээ. 

Г. Ганаа

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.