Вакцинжуулснаар эрүүл мэндийн салбарын ачаалал буурах ч нас барагсдын тоо тодорхой хэмжээнд хадгалагдсаар л байна гэлээ

Twitter Print
2021 оны 04-р сар 02-нд 11:30 цагт
Мэдээний зураг,

Ковид: Вакцинжуулалт халдварын гуравдах давалгаанаас сэргийлж чадах уу?

Их Британид хөл хорионы арга хэмжээг өдрөөс өдөрт үе шаттайгаар буулгасаар байна. Ирэх долоо хоногоос иргэдийн гэрийн хөл хориог цуцалж цөөн тоогороо олон нийтийн газраар уулзалдах боломжтой болох гэж байна.

Гэвч Европт халдварын тоо эрс өсч байгаатай холбогдуулан Их Британийн эрх баригчид халдварын гуравдах давалгаанаас сэргийлэхийг иргэдэдээ уриаллаа.

Европын халдварын давалгаа манай эргийг нөмрөн авах нь цаг хугацааны л асуудал болоод байна гэж Ерөнхий сайд хэлсэн үгэндээ дурджээ. Гэхдээ Их Британийн насанд хүрсэн хүн амын бараг тал нь вакцинжуулалтад хамрагдсан байгаа энэ үед гуравдах давалгаа ямархуу байх бол?

Аюул хэдийн тулж ирээд байна

Хэдийгээр Их Британийн хувьд Европоос ирэх халдварын огцом дэгдэлт л аюул мэт харагдаж байгаа ч үнэндээ дотоодод ч байдал намжаагүй хэвээрээ л байна. Уг нь өдөрт гарах халдварын тоо он гарсаар бараг 12 дахин буурсан тоотой байгаа ч бүртгэгдэж байгаа суурь халдварын тоо дахин давалгаа үүсгэхэд хангалттай хэмжээтэй байсаар байна. Үндэсний статистикийн газрын мэдээлснээр шинж тэмдэггүй халдвар тээгчдийг оруулаад одоогоор 100 000 гаруй хүмүүс халдвар аваад байгаа ажээ. Үүнээс гадна Английн сургуулиуд үйл ажиллагаа эхлүүлснээс хойш халдварын тоо мэдэгдэхүйц өсөх хандлага ажиглагдсан байна.

Лондоны Коллеж их сургуулийн профессор Кристина Пагелийн мэдэгдсэнээр хичээл эхэлснээс хойш сургуулийн сурагчдад гэрээрээ түргэвчилсэн тест хийх боломж олгосноор халдварын батлагдсан тоо болон шинж тэмдэггүй хөнгөн өвчлөлтийн тоо нэмэгдэх нь гарцаагүй байсан гэнэ. Гэхдээ энэ нь халдварын тоо нэмэгдэж байгаа үндсэн шалтгаан биш бөгөөд вакциныг түрүүлэн хийх насны хязгаарыг 50-иас доош насны иргэд, эрүүл мэндийн шалтгаантай иргэдээр эхлэн хязгаарлаж байгаа учраас сургуулийн насны хүүхэдтэй иргэдийн ихэнх нь вакцинжуулалтын 2-р тунгаа хийлгэж амжаагүй байгаатай холбоотой байх магадлалтай юм. Улаан өндөгний баярын сургуулийн амралт халдварын тархалтыг түр бууруулж болох ч цаашид бодитой өөрчлөлт авчрахгүй байх хэмээн эмээж байгаагаа мөн судлаач илэрхийлсэн байна.

Вакцинд хамрагдсан ч яагаад улам бүр болгоомжтой байх шаардлагатай вэ?

Халдварын тоо ихсээд байвал вакцинжуулалтыг хэдэн хүнд хийсэн нь тэр бүр хамаагүй болох биш үү? Ялангуяа одоогоор Их Британид бүртгэгдэж байгаа Ковидын хамааралт үхлийн 99% нь вакцинд хамрагдсан насны иргэд байгаа тохиолдолд яах нь зүйтэй вэ?

Эдинбургийн их сургуулийн Профессор Марк Вүүлхаусын үзэж байгаагаар халдварын тоо болон хүнд өвчлөлт нас баралтын тооны хамаарал нэлээд буураад байгаа юм байна.

Түүний үзэж байгаагаар халдвар нэмэгдээд л байвал мэдээж өвчин вакцинд хамрагдаагүй юм уу эсвэл хамрагдсан ч дархлаа сайн тогтоогүй нэгнийг "олж" туссаар л байх болно. Мэдээж вакцин ихэнхэд нь үйлчилж өвчлөх, өвддсөн ч хүндрэх магадлалыг мэдэгдэхүйцээр бууруулж энгийн ханиадтай төстэй халуурч, амьсгал давхцах гэх мэт шинж тэмдэгээр өнгөрч болох хэдий ч 100% баталгаатай хамгаалахгүй гэдгийг анхаарах нь зүйтэй. Вакцинжуулалт сайн явагдсанаар эрүүл мэндийн системд ирэх ачаалал харьцангуй буурах ч нас барагсдын тоо тодорхой хэмжээнд хадгалагдсааар л байх шинжтэйг тэрээр онцоллоо.

Ирэх саруудад халдварын тоо хэрхэн нэмэгдэх, өөрчлөгдөхийг хэн ч одоохондоо тааварлахгүй байна.

Халдварлалтын зэргийн R индекс буюу халдвар авсан нэг хүн дунджаар хэдэн хүнд халдвар тарааж байгааг тодорхойлсон индекс нь Короновирусын хувьд 3-4 байгаа ч хэрвээ түүнээс өндөр халдварлах зэрэгтэй шинэ вирусын хувьд 5 болон түүнээс дээш байна гэж зарим судлаачид үзэж байна.

Лоуборогийн их сургуулийн халдвар тооцооллын мэргэжилтэн Др. Дункан Робертсон "үнэн хэрэгтээ бид шинэ мутацын халдварын үед байгаа бөгөөд өмнөх төрлийн вирусын үед хэрэглэж байсан хөл хорионы дэглэмийг үргэлжлүүлэн хэрэглэж, бүр хөл хориог султгаж байгаа нь бидний өмнө нь тооцоолоогүй байсан сул цэгүүдийг шинэ вирус хэрхэн олж цохилт өгөхийг тааж мэдэх аргагүй болгож байна" гэжээ.

Халдварын гуравдах давалгааг тодорхойлох хүчин зүйлс

Цаашид болох асуудлыг тодорхойлох хэд хэдэн хүчин зүйлс байна.

Нэгдүгээрт: Вакцинжуулалт нь зөвхөн вакцин тариулсан хүмүүсийн эрүүл мэндийг хамгаалаад зогсохгүй халдварын тоо бууруулах дам нөлөө үзүүлнэ. Одоогоор Астра Зенека вакциныг тариулсан хүмүүсийн 2/3 нь халдвар тээгч болохгүй байгаа нь судалгаагаар тогтоогодоод байна. Мэдээж энэ өвчин шинэ вирусын халдварын дэгдэлт учраас улирлын шинжтэй тогтмол болон өөрчлөгдтөлөө удах ч улирал солигдох нь бас нэг халдвар буурах нөхцөл болох нь одоо ч тодорхой болоод байна.

Их Британийн Эрүүл мэндийн бодлогын ерөнхий зөвлөх Профессор Крис Витти хэлэхдээ магадгүй халдварын жинхэнэ гуравдах давалгаа дараа өвлөөс нааш эхлэхгүй тул дархлаажуулалтыг өргөн хүрээтэй хийх цаг хугацааны боломж бас байгаа гэв. Тэрээр энэ долоо хоногт олон нийтэд өгсөн мэдэгдэлдээ цаашид энэхүү халдвартай тэмцэх зам нэлээд шулуудаж байгаа ч тодорхой бартаа бэрхшээл, гэнэтийн хүчин зүйл нөлөөлж болохыг үгүйсгээгүй юм.

Хамгийн тулгамдаад байгаа асудал бол орон нутгийн голомтолсон халдварууд бөгөөд тэнд халдвар үүсгэгчийн болон дархлаажуулалтын нөхцөл байдлаас шалтгаалан улс орны хэмжээнд байгаагаас илүү хүнд бэрхшээлтэй нөхцөл үүсч болзошгүйг анхааруулсан билээ. Цаашдаа дархлаажуулагдсан байхад ч тусч болзошгүй шинэ халдварын мутацууд ч асуудал үүсгэж болзошгүй юм.

Хоёрдох тооцоолоход бэрх хүчин зүйл бол хүмүүсийн зан байдал. Хэдийгээр бид худалдаа үйлчилгээ, сургуулийг нээхэд их томоохон халдварын аюул үүсдэггүй болохыг олж мэдсэн, гадаа агаарт хийх ихэнх үйл ажиллагаа халдварын эрсдэл багатайг тогтоосон хэдий ч хүмүүс гэр орондоо хэрхэн байдаг, хэдүүл байдаг, хэр халдвар тараахуйц зан байдалтай байдгийг шүүх, заах эрхгүй болохоор хүндрэлтэй юм. Цаашид бид хүмүүсийг гэртээ яаж байхыг цагдах боломжгүй болохоор халдвар тархах хамгийн таатай боломж нь гэр бүл, ураг төрлийн харилцаа байж мэдэх юм гэжээ.

Цаашид байдал хэр тааруу байх бол?

Кембрижийн их сургуулийн эрсдэлийн судлаач Профессор Сэр Дэвид Шпигельхалтерийн үзэж байгаагаар хүмүүсийн ихэнх нь зөнгөөрөө айх аюул өнгөрч байна гэж итгэн хуучин байдаг шигээ л амьдралын идэвх хэмнэлээ сэргээх хүсэлтэй байх шиг байна. Гэвч энэ бол зөн совиндоо итгэж, даатгах зүйл биш харин ч алхам тутамдаа сэрэмж болгоомжтой байх нөхцөл юм.

Засгийн газраас "ухралт хийхгүй ч урагшлах алхамаа болгоомжтой удаан хийх" бодлого баримталж байгаагийн гол шалтгаан нь цар тахлыг хязгаарлахын хамтаар нийгмийн үйл ажиллагааг аажмаар сэргээх зорилготой байгаагийнх шүү дээ.

Мэдээж зарим хүмүүс "Халдвар тэглэх" аргачлалыг хэрэглэхийг уриалж байгаа ч засгийн газар болон түүнд зөвлөн тусалж байгаа багийн зүгээс хүмүүс халдвар авснаа мэдэхгүйгээр халдвар тараах боломжтой байдаг энэхүү онцлогоос нь шалтгаалж огт халдваргүй болтод хөл хорих аргыг мэдээж сонгохгүй байгаа билээ. Засгийн газрын шинжлэх ухааны зөвлөх сэр Патрик Уолланс энэ долоо хоногт хийсэн мэдэгдэлдээ " халдвар тэглэх" аргачлал нь хэрэгжих боломж өөрөө бараг тэг болохыг хэлсэн юм.

Тэгэхээр огт халдваргүй байх боломжгүй энэ өвчний үед гуравдах халдварын давалгаа хэр хүнд байх бол?

Эрдэмтдийн хийсэн судалгаагаар 2022 оны зун гэхэд Их Британид энэ халдвараар 30000 орчим хүн нас барах төлөвтэй байна. Энэ нь дархлаажуулалтыг төлөвлөсний дагуу сайн хийгээд, хөл хориог гэнэт биш үе шаттайгаар удаанаар бууруулсан нөхцөлд ийм байх тооцоо юм. Энэ нь өмнөх хэдэн жилүүдтэй харьцуулахад 4 дахин буурсан тоо бөгөөд хэдийгээр өндөр сонсогдож байгаа ч өмнөх жилүүдэд хүнд ханиад дэлгэрэхэд хүрдэг байсан үхлийн тоо болох 25 000 руу дөхөж л байгаа хэрэг билээ. Харин тооцоолсноор болохгүй бол байдал бүр тааруу болж магадгүй дээрхээс хоёр дахин олон тооны хүний хохирол амсч мэдэх юм. Мэдээж ямар ч тооцооллын загварчлалд дутагдал байдаг ч бид үүнийг тооцоолсон анхааруулга гэж үзээд үйл ажиллагаандаа тусгах ёстой юм.

Хэдийгээр Их Британи энэ өвчинтэй тэмцэх тэмцлийг тэргүүлж байгаа ч юуг ч байх тийм л байх ёстой мэт санан тайвширч болохгүй билээ.

Эх сурвалж: https://www.bbc.com/news/health-56529712

Орчуулсан: Норовсамбуугийн Нарантуяа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.