Жо Байден: АНУ Путингээс айхгүй

АНУ-ын Ерөнхийлөгч Жо Байден ОХУ-ын Ерөнхийлөгч Владимир Путин Украины 4 мужийг ОХУ-д нэгтгэснийг зарласныхаа дараа хэлсэн үгнээс АНУ айхгүй гэдгийг анхааруулжээ.

Оросын төрийн тэргүүн ОХУ-ын нутаг дэвсгэрт нэгтгэсэн Украины бүс нутгуудыг хамгаалахын тулд байгаа бүх боломжоо ашиглана хэмээн заналхийлсэн ба Украины дээрх бүс нутгууд нь үүрд ОХУ-ын нэг хэсэг байх болно хэмээн мэдэгдсэн билээ. НАТО-гийн Ерөнхий нарийн бичгийн дарга Йенс Столтенбэрг В. Путин Украины бүс нутгуудыг ОХУ-д нэгтгэж буйгаа зарласан нь Украинд болж буй дайны явцыг улам хүндрүүлнэ хэмээн үзэж байна.

ОХУ-ын Ерөнхийлөгч Владимир Путин хэлсэн үгэндээ Херсон, Запорожье, Луганск, Донецкийн ард иргэд "өөрсдийн хүмүүстэйгээ, эх оронтойгоо" нэгдэхийн төлөө саналаа өгцгөөсөн гэжээ. Тэрээр Украины дээрх 4 мужид зохион байгуулсан олон нийтийн санал асуулгын дүнг үндэслэн уг шийдвэрийг гаргасан гэж байгаа ч Украин болон барууны бусад улс орнууд уг хууль бус санал асуулгын дүнг хүлээн зөвшөөрөхгүй гэдгээ мэдэгдээд байгаа юм.

Түүнчлэн В. Путин АНУ Дэлхийн 2-р дайны төгсгөлд Японы эсрэг цөмийн зэвсэг ашигласан болохыг дурдаж, ОХУ-д ч олон төрлийн зэр зэвсэг байгааг онцолжээ.

Кремль ОХУ-д нэгтгэсэн дээрх 4 муж руу халдсан тохиолдолд уг халдлагыг ОХУ-ын газар нутагт халдсан гэж үзнэ гэдгийг анхааруулсан байна. АНУ-ын Ерөнхийлөгч Жо Байден В. Путины хэлсэн үг, "АНУ болон АНУ-ын түнш орнуудыг айлгаж чадахгүй." хэмээн Цагаан ордонд хийсэн хэвлэлийн бага хурлын үеэр мэдэгджээ.

Тэрээр камер луу хуруугаа чичлэн, ОХУ-ын Ерөнхийлөгч Владимир Путинд хандан үг хэлсэн байна. "АНУ НАТО-гийн орнуудын хамтаар НАТО-д хамаарагддаг газар нутгийн инч бүрийг хамгаалахад бүрэн бэлэн байна. Инч бүрийг шүү." хэмээн анхааруулжээ.

В. Путины хэлсэн үгний дараа Украин улс НАТО-д богино хугацаанд элсэх хүсэлт өгчээ. Украины Ерөнхийлөгч Владимир Зеленский Украин улс НАТО-гийн гишүүн шахуу улс гэдгийг онцолж, Москва "аллага, сүрдүүлэг, ёс зүйгүй байдал, худал яриа" ашиглан улс орнуудын газар нутгийг булаан эзэлж байна хэмээн тодорхойлжээ.

НАТО-гийн Ерөнхий нарийн бичгийн дарга Йенс Столтенбэрг НАТО-гийн гишүүн орнуудын аль нь ч ОХУ Украины газар нутгийг өөрийн улсдаа нэгтгэсэн явдлыг хүлээн зөвшөөрөхгүй гэсэн бол Европын холбооны зөвлөлийн ерөнхийлөгч Урсула фон дер Ляйен В. Путины хууль бус шийдвэр юуг ч өөрчлөхгүй, ОХУ-д нэгдсэн гэх газар нутгууд нь үүрд Украин улсын нутаг дэвсгэр хэвээр байх болно гэжээ.

БНСУ ОХУ-ын шийдвэрийг хүлээн зөвшөөрөхгүй гэдгээ мэдэгдэж, Украины тусгаар тогтнол, газар нутгийн бүрэн бүтэн байдал, биеэ даасан байдлыг хамгаалах ёстой гэжээ.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.