Минскт хэдэн зуун мянган иргэд сонгуулийн дүнг эсэргүүцэн жагслаа

Twitter Print
2020 оны 08-р сар 17-нд 09:16 цагт
Мэдээний зураг,

Өнгөрсөн ням гарагт Беларусийн нийслэл Минскт энэ сарын 9-нд болж өнгөрсөн Ерөнхийлөгчийн сонгуулийн дүнг эсэргүүцсэн хэдэн зуун мянган иргэд Ерөнхийлөгч А. Г. Лукашенког огцрохыг шаардан жагсчээ. Ройтерс агентлагаас мэдээлж байгаагаар Ерөнхийлөгч А.Лукашенко ОХУ-ын Ерөнхийлөгч В. Путинтэй өнгөрсөн амралтын өдрүүдээр хоёр ч удаа утсаар холбогдсон ба Ерөнхийлөгч В.Путин Беларустай хийсэн цэргийн хамтын гэрээний дагуу тус улсад аюултай нөхцөл байдал үүссэн тохиолдолд тусламж дэмжлэг үзүүлэхээ мэдэгджээ.

Өнгөрсөн ням гарагт Минск хотын төвд болсон "Эрх чөлөөний төлөөх жагсаал"-д 200 мянга гаруй иргэд жагссан ба жагсаалын үеэр иргэд А. Лукашенког албан тушаалаасаа огцрохыг шаардан, Беларусийн хуучин хэрэглэж байсан улаан цагаан өнгийн тугийг барьсан байжээ. Сөрөг хүчнийхэн Беларусийн төрийн эрхийг 26 жилийн турш атгасан А. Лукашенко олон нийтийн дэмжлэгийг алдсан явдлаа нуун дарагдуулахын тулд сонгуулийн үр дүнг луйвардсан хэмээн үзэж байгаа аж. Беларусийн Сонгуулийн Ерөнхий хорооноос Ерөнхийлөгчийн сонгуулиар А. Лукашенко нийт сонгогчдын 80 гаруй хувийн саналыг авч, ялалт байгуулсан бол сөрөг хүчний нэр дэвшигч С. Тихановская 10 гаруй хувийн санал авсан хэмээн мэдэгдсэн юм.

Өнгөрсөн ням гарагт болсон "Эрх чөлөөний төлөөх жагсаал" - аас хэдхэн цагийн өмнө Ерөнхийлөгч А. Лукашенко Минск хотын төвд цугларсан дэмжигчдийнхээ өмнө гарч үг хэлсэн байна. Тэрээр гадны хүчнүүд түүнийг төрийн эрхээс унагахын тулд хуйвалдаж байгаа тухай мөн НАТО-гийн танкууд болон онгоцнууд Беларусийн хилээс 15 минутын зайд байрласан талаар дурджээ. Тэрээр, "НАТО-гийн цэргүүд хил дээр ирээд байна. Литва, Латви, Польш болон Украинаас Ерөнхийлөгчийн сонгуулийг дахин зохион байгуулахыг шаардаж байна." хэмээн, Ерөнхийлөгчийн сонгуулийн дахин зохион байгуулснаар Беларус улс "устаж үгүй" болно хэмээн онцолжээ. НАТО-гийн зүгээс Беларуст үүссэн нөхцөл байдлыг ажиглаж байгаа ч тус улсын хилийн ойролцоо цэрэг зэвсгээ байршуулсан гэдэг нь худал мэдээлэл болохыг мэдэгдээд байгаа аж. ОХУ мөн адил Беларуст үүссэн нөхцөл байдлыг нягт ажиглаж байгаа нь тус улсын барууны орнууд руу эрчим хүч экспортлох хоолой Беларусийн нутаг дэвсгэрээр дамжин өнгөрдөгтэй холбоотой аж.

Protesters pack Belarus capital, Russia says military help ...

РИА агентлагийн мэдээлж байгаагаар өнгөрсөн мягмар гарагт Литва руу зугтсан сөрөг хүчний нэр дэвшигч Светлана Тихановская иргэдийг "Эрх чөлөөний төлөөх жагсаал"-д оролцохыг уриалан, төрийн эрхийг шилжүүлэх асуудлыг шийдэхэд дэмжлэг үзүүлэх үндэсний зөвлөлийг бүрдүүлж байгаа аж. Беларусийн нийслэл Минскээс гадна бусад хотуудад мөн эсэргүүцлийн жагсаал цуглаан болж өнгөрсөн ба Польшийн нийслэл Варшавт, Чехийн нийслэл Прагад мөн иргэд жагссан байна. Беларусийн Дотоод хэргийн яамнаас мэдээлснээр ням гарагийн жагсаал цуглааны үеэр ямар ч баривчилгаа хийгдээгүй гэсэн бол орон нутгийн хэвлэл мэдээллээр хэд хэдэн иргэдийг барьж саатуулсан тухай мэдээлжээ.

Цагдаагийн албан хаагчид, Беларусийн төв телевизийн ажилчид зэрэг төрийн албан хаагчид ч мөн жагсагчидтай нэгдсэн байна. Чехийн Ерөнхий сайд Европын холбооны түншүүддээ хандан тусламж дэмжлэг хүсчээ. Ингэхдээ тэрээр Беларуст 1968 онд Чехэд болсон жагсаал цуглааныг Оросын цэргүүд орж ирж дарсан явдал давтагдаасай гэж хүсэхгүй байгаагаа мөн беларусчууд 1989 онд Чехэд коммунизмын дэглэмийг тайван замаар түлхэн унагасантай адил өөрчлөлт шинэчлэлтийг хийхээс айж эмээхгүй байгаасай гэж хүсч буйгаа илэрхийлжээ.

Protesters pack Belarus capital after Russia says military help ...

Нөгөөтэйгүүр Европын холбооноос Беларусийн Ерөнхийлөгчийн сонгуулийн дараа болсон жагсаал цуглааны үеэр цагдаа нар хүч хэрэглэн, хэдэн мянган иргэдийг баривчлан саатуулсан явдалтай холбоотойгоор тус улсын эсрэг хориг арга хэмжээ авахаар төлөвлөж байгаа аж.

Эх сурвалж: Reuters

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.