Омикрон хувилбарын эмгэг төрүүлэх чанар нь тийм ч өндөр биш байх магадлалтай

Twitter Print
2022 оны 01-р сар 04-нд 10:08 цагт
Мэдээний зураг,

Дэлхийн улс орнуудад шинэ коронавирусийн омикрон хувилбарын халдвар аажмаар нэмэгдэж байна. Израильд шинэ коронавиурсийн халдвар болон томуу нэгэн зэрэг тархаж байгаа “twindemic” цар тахал санаа зовоох асуудал болж буй тухай, мөн тус улсыг нөмрөөд байгаа 5 дахь давалгааны гол урсгал болох омикрон хувилбараар сүүлийн өдрүүдэд өдөрт 5000 гаруй шинэ халдварын тохиолдол бүртгэгдэж байгаа талаар Times of Israel сонинд бичжээ.

Манайд томуугийн 51 дүгээр долоо хоногийн мэдээгээр бол нийт эмнэлэгт хэвтэгсдийн дотор амьсгалын замын цочмог хүнд халдварын шалтгаан 14.4% эзлэж байгаа бөгөөд өмнөх оны мөн үеийнхээс 2.5%-иар өссөн байгаа аж. Томуугийн цартахлын эрсдэлийн үнэлгээгээр идэвхижлийн түвшинд байгаа гэсэн үг.

Шинэ жил, цагаан сар гээд баярууд үргэлжлээд дээр нь омикрон хувилбар олон нийтийн дунд тархаад эхэлбэл томуутай хавсрахгүй гэх баталгаа байхгүй байх. Энэ анхаарах асуудал.

Гэсэн ч зарим нэг гэрэл гэгээтэй байдал харагдаж эхлээд байна. Тухайлбал Өмнөд Африкт хурдацтай тархаж эхэлсэн омикрон хувилбар аль хэдийн намжиж эхэлсэн байдал олон улсын статистик платформ дээрээс ажиглагдаж эхээллээ. Энэ бол сайн мэдээ (Зураг 1).

2021 оны 11-р сарын 15-наас Омикроны хувилбар (B.1.1.529) Өмнөд Африкт 4 дэх давалгаа болж эхэлсэн.

4 дэх давалгааны COVID-19-ийн хэвтэн эмчлүүлэгчдийг өмнөх 3 давалгаатай (эх омог, бета, дельта хувилбар) харьцуулсан судалгааг Өмнөд Африкийн Йоханнесбургийн эмч нарын групп JAMA (Америкийн Анагаах Ухааны Холбооны сэтгүүл) сэтгүүлийн 12-р сарын 30-ны дугаарт нийтлүүлсэн байна.

Эх сурвалж: JAMA. Dec 30, 2021. doi.org/10.1001/jama.2021.24868

Халдвар авсан 2300 орчим хүнд хийгдсэн дээрх судалгаагаар 4 дүгээр давалгааг өмнөх давалгаануудтай харьцуулахад дараах нөхцөл байдлууд тодорхой болж ирж байх шиг байна.

Судалгааны үр дүнг сийрүүлбэл дорх байдалтай байна. Үүнд:

1. 1-3 дугаар давалгааны үед яаралтай тусламжаар эмнэлэгт хандсан өвчтөнүүдийн 68-69% нь эмнэлэгт хэвтэж байсан бол 4 дүгээр давалгаанд 41.3% болж буурсан байна (Зураг 2).

2. Өвчтөнүүдийн дундаж нас 50-иад наснаас 30 нас хүртэл буурсан байна. Өөрөөр хэлбэл 3 дугаар давалгааны үед эмнэлэгт хэвтсэн өвчтнүүдийн дундаж нас 59 байсан бол 4 дүгээр давалгааны үед 36 нас болж буурсан (P<0.001) бөгөөд харьцангуй залуу насны хүмүүс түлхүү өвдөж байна гэсэн үг.

3. Эмэгтэйчүүдийн эзлэх хувь өндөр байгаа юм байна.

4. Хавсарсан өвчин хуучгүй хүмүүсийн эмнэлэгт хэвтэлт их байсан бол харин амьсгалын замын цочмог дистресс хам шинжээр хэвтэн эмчлүүлсэн өвчтөнүүдийн эзлэх хувь бага (3 дугаар давалгаанд 91.2% ба 4 дүгээр давалгаанд 31.6%, P<0.001) байсан байна.

5. 4 дүгээр давалгаанд 971 хүн хэвтэн эмчлүүлсний 24,2% нь вакцинд хамрагдсан, 66,4% нь вакцинд хамрагдаагүй, 9,4% нь тодорхойгүй байна.

6. Хүчилтөрөгч шаардлагатай өвчтөнүүдийн эзлэх хувь 4 дүгээр давалгааны хувьд мөн бага байсан (3 дугаар давалгааны үед 74% ба 4 дүгээр давалгаанд 17.6%, P <0.001).

7. Эрчимт эмчилгээний тасагт хэвтсэн нь 3 дугаар давалгааны үед 29.9% байсан бол 4 дүгээр давалгааны үед 18.5% (P <0.001) буюу 2 дахин буурсан байна.

8. Эмнэлэгт хэвтэх дундаж хугацаа 1-3 дугаар давалгаа 8-9 хоног байсан бол 4 дүгээр давалгаанд 3 хоног болж бараг 2 дахин цөөрсөн байна.

9. Нас баралтын түвшин 1 дүгээр давалгаанд 19.7%, 2 дугаар давалгаанд 25.5%, 3 дугаар давалгаанд 29.1%-тай байсан бол 4 дүгээр давалгаанд 2.7% буюу бараг 10 ны нэг болж буурчээ.

Дээрх үр дүнгүүдээс харахад 4 дэх давалгаа нь өмнөхүүдээсээ ялгаатай, эмнэлэгт хэвтэн эмчлүүлэх тохиолдол цөөн байсан ч залуу насныхан, хавсарсан өвчингүй, амьсгалын замын цочмог дистресс хамт шинж багатай, нас баралтын түвшин буурч байгаа байдал ажиглагдаж байна. Өөрөөр хэлбэл, омикрон хувилбарын халдварын улмаас хүндээр өвчилсөн хүмүүсийн тоо өмнөх үетэй харьцуулахад буурч, үүний үр дүнд эрчимт эмчилгээний тасагт хэвтэн эмчлүүлэх, эмнэлэгт хэвтэх хугацаа хоёр дахин буурч, нас баралт бас эрс буурсан байна.

Дашрамд дурдахад:

Өмнөд Африк улсын нийт хүн амын вакцинжуулалтын түвшин 2021 оны 12 сарын 29-ны байдлаар бүрэн хоёр тунтай 26.37%, нэг тунтай 5.12%, нийт 31.49%-тай байна. Тэгэхээр дээрх үр дүнг вакцины нөлөө гэхээсээ илүү омикрон хувилбарын эмгэг төрүүлэгч чанар нь өмнөхөөсөө бага байгаа юм биш гэж бодохоор байна.

Нөгөө талаар вакцины талаар хийгдэж буй сүүлийн үеийн судалгаануудаас харахад mRNA вакцин (Pfizer болон Moderna гэх мэт) нь омикрон хувилбарын хүндрэлийг хязгаарлахад үр дүнтэй байгаа бөгөөд нэмэлт вакцинжуулалт нь халдвар авах эрсдлийг эрс бууруулж байна гэж харж байх шиг байна.

Гэсэн хэдий ч энэ ялгаа вакцины эсвэл халдварын дархлааны нөлөөнөөс шалтгаалсан уу эсвэл омикрон хувилбар өмнөх мутант хувилбаруудтай харьцуулахад эмгэг төрүүлэгч бага байгаа эсэхээс болсон уу гэдэг нь хараахан бүрэн баталгаатай болоогүй л байна.

Манай улсад омикрон хувилбарын халдвар олон нийтийн дунд хараахан тархаагүй гэж найдаж байгаа ч сүүлийн үед зөөвөрлөгдөж орж ирсэн халдварын тохиолдлуудын тоо нэмэгдээд байгаа. Эндээс бид хилийн хорио цээрийн хяналт дээр халдварын тохиолдлуудыг найдвартай илрүүлж авах асуудал, илрүүлсэн тохиолдлуудад толгой дараалан геномын дараалал тогтоох нарийвчилсан шинжилгээ хийх асуудал чухал байх болно гэж хэлэхээр байна.

Хэрэв тэгж чадвал вакцинжуулалтыг өмнөх шигээ үргэлжлүүлж, халдварын эсрэг арга хэмжээг хувь хүн бүрийн түвшинд авч хэрэгжүүлбэл омикрон хувилбарын тархалт буюу шинээр үүсч болзошгүй 4 дүгээр давалгааг хяналтандаа байлгаж чадах болов уу.

Хамгийн гол нь вакцин хийлгэсэн хүн байсан ч их хэмжээний вируст өртөхгүй байх явдал чухал юм. Энэ маш халдварлах чадвар өндөртэй хувилбар учраас тодорхой хэмжээний дархлаатай байсан ч маш их хэмжээний вируст өртөх юм бол халдвар авах боломжтой. Харин вакцинд хамрагдаагүй хүмүүс өөрсдийгөө халдвар авахгүй гэдэг ч юм уу эсвэл бусдад халдвар тараахгүй гэсэн баталгаа хаана ч байхгүй.

Омикрон хувилбарын эмгэг төрүүлэх чанар нь тийм ч өндөр биш байж магадгүй ч халдварт өртсөн тохиолдлын тоо ихсэх тутам дагаад хүндрэл, нас баралт нэмэгддэг болохыг дор бүрнээ сайтар ойлгож, анхаарах хэрэгтэй болов уу.

Ойдовын Батгэрэл Ph.D

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.