Хөл хорионд орохоос айсан иргэд Шанхай дахь Ikea дэлгүүр хаалганд гацаа үүсгэв

Twitter Print
2022 оны 08-р сар 16-нд 14:21 цагт
Мэдээний зураг,

Шанхай дахь Ikea салбар дэлгүүрт коронавирусын халдвартай хүнтэй ойрын хавьтал болсон хүн үйлчлүүлж байна гэсэн мэдээллийн дагуу Шанхай хотын эрх баригчид дэлгүүрийг тэр даруй хаахыг үүрэг болгосны дараагаар дэлгүүрт байсан хүмүүс дэлгүүрийн хаалга руу сандралдан гүйлдэж, хаалгаар шахцалдан гарч гүйж буй бичлэг цахим орчинд тархаад байна.

Нийгмийн сүлжээнд тархсан бмчлэгүүдээс Шанхай дахь Ikea дэлгүүрт байсан хүмүүс хаалга хаагдахаас өмнө амжиж гарахын тулд бие биенийгээ түлхэн, шахцалдаж, орилж байгааг харж болох юм.

Шанхай хотын Эрүүл мэндийн хорооны орлогч захирал Жао Дандан өнгөрсөн ням гарагт болсон хэвлэлийн бага хурлын үеэр Ikea дэлгүшр болон дэлгүүрийн ойр орчимд хоёр өдрийн хөл хорио тогтоож байгаа тухай зарлажээ.

Хөл хорионд орсон иргэд тусгаарлалтын байранд хоёр өдөр болж, дараагийн 5 өдөр нь тогтмол хяналтанд байх аж. Даваа гарагт Шанхайд коронавирусын халдварын 6 тохиолдол бүртгэгдсэний 5 нь шинж тэмдэггүй тохиолдол байжээ. Хятад дахь Ikea компанийн төлөөлөгчийн газраас Шанхай хотын Сьюхуй дүүрэгт байрлах Ikea салбар дэлгүүр халдвар хамгааллын журмын дагуу хоёр өдөр хаалгаа барьсан ба энэ мягмар гарагаас хэвийн ажиллаж эхэлнэ хэмээн мэдэгджээ.

Хятадын эдийн засгийн төв, 25 сая хүн амтай Шанхай хотод коронавирусын цар тахлын тархалттай холбоотойгоор энэ хавар 2 сарын турш хөл хорио тогтоосон нь иргэдийн уур бухимдлыг төрүүлсэн билээ. Үүрэн холбооны технологи болон цахим мэдээллийн тусламжтайгаар Хятадын засгийн газар коронавирусын халдварын тархалт, иргэдийн шилжилт хөдөлгөөнийг хянах "эрүүл мэндийн код"-ыг ашиглаж байгаа ба иргэд эрүүл гэдгийг нь батлар ногоон өнгийн QR кодоо үзүүлж нийтийн тээвэрт сууж, аж ахуйн нэгжүүдээр үйлчлүүлж байгаа юм.

Ингэснээр Хятадын эрх баригчид иргэдийн хөдөлгөөнийг хянаж, коронавирусын халдвартай хүнтэй хавьтал болсон үгүйг нь тогтоож байгаа билээ.

Коронавирусын цар тахалтай хөл хорионы тусламжтайгаар тэмцэж байгаа явдлыг иргэд буруушааж эхэлсэн ч Хятадын эрх баригчид цар тахлын үеийн бодлогоо өөрчлөх бодолгүй байна.

Өнгөрсөн долоо хоногт л гэхэд Хайнань арал дээр коронавирусын халдварын тохиолдол бүртгэгдсэнтэй холбоотойгоор 80 мянга гаруй жуулчид гацаж, хөл хорионд орсон билээ.

Эх сурвалж: CNN

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.