БНАСАУ-ын удирдагч хүргэн ахдаа ялын дээд хэмжээ оноож, гүйцэтгэв

Twitter Print
2013 оны 12-р сар 13-нд 10:30 цагт
Мэдээний зураг,

Умард Солонгосын удирдагч өөрийн хүргэн ах Чан Сон Тэкийг эх орноосоо урвасан гэх ял тулгаж цаазаар авсан тухай тус улсын Цахилгаан мэдээний төв агентлагаас мэдээлжээ. Эх сурвалжийн мэдээлснээр, Чан Аугаа их удирдагч Ким Ир Сен болон Ким Чен Ир нарыг амьд сэрүүн байх үеээс бохир улс төрийн амбиц гаргаж ирсэнийг онцлон, Улсын Аюулаас хамгаалах байгууллагын шүүх хурлаас өчигдөр түүнд нам, төрийн  дээд тушаалын булаан авах, төрийн эргэлт хийхээр завдсан гэсэн ял оноож, цаазын ялыг тэр даруй гүйцэтгэсэн байна. Умард Солонгосын улс төрийн тавцанд тухайн цаг үедээ хамгийн өндөр албан тушаал хашиж, өндөр нэр хүнд бүхий байсан Чан Сон Тэкийг одоо “нохойноос дор амьтан, гэр бүлээсээ гадуур хүүхнүүдтэй холбогддог, гадаадад эмчилгээ хийлгэж байхдаа мансууруулах бодис хэрэглэж байсан” гэх зэргээр гэм бурууг нь илчилж сайлах ганц ч олдохгүй байгаа аж. Ким Чен Ун хүргэн ахыгаа Улсыг батлан хамгаалах хорооны Ерөнхий нарийн бичгийн даргын орлогчын албан тушаалаас огцруулсан талаархи мэдээллийг өнгөрсөн долоо хоногт Өмнөд Солонгосын тагнуулын албаны эх сурвалжтайгаар хэвлэл мэдээллийг хэрэгслүүд цацаж эхэлсэн билээ. Үүнээс хэд хоногийн дараа Умард Солонгосын тал уг мэдээллийг баталж, зэвсэглэсэн хамгаалагч нар Чан Сон Тэкийг Коммунист намын хуралдааны үеэр баривчлан гаргаж буй бичлэгийг телевизээр шууд үзүүлсэн.

Энэ сарын 8-ны өдөр хуралдсан Умард Солонгосын Ажилчны намын Төв хорооны Улс төрийн Товчооны хуралдаанаар 67 настай Чан Сон Тэкийн бүх албан тушаал, алдар нэрийг хурааж, намаас хөөсөн билээ. Түүний эхнэр Ким Чен Ирийн охин дүү Ким Гён Хи-г нөхрөөсөө албан ёсоор салсан гэж зарласан. Гэвч эх орноосоо урвасан гэж ял заагдаж, цаазаар авахуулсан хүний эхнэр байсан энэ хүний хувь тавилан одоо хэрхэн хаашаа эргэсэн нь тодорхойгүй байгаа ажээ.

Чан Сон Тэк 1970 онд Хойд Солонгосын Ажилчдын намын удирдах албан тушаалд томилогдож байсан бөгөөд 1972 онд Ким Гён Хитэй гэрлэснээсээ хойш Кимийн  гэр бүлийнхэний хэмжээлшгүй эрхт хаант улсын нэгэн гишүүн болсон юм. Тэрээр Умард Солонгосын цэрэг, улс төрийн хамгийн нөлөө бүхий хүмүүсийн нэг байсан. Өмнөх удирдагч Ким Чен Ирийн баруун гар, түүнийг өөд болсноос хойш залуу удирдагчийг чиглүүлж, улс орныг авч явах хүмүүийг өндөр дээд албан тушаалд томилох үүрэг хүлээж, төрийн бодлогыг тодорхойлж байсан гэдэг. Мөн Солонгосын хамгийн ойр, гол холбоотон Хятадтай харилцах харилцаа, хамтын ажиллагааг гардан хариуцаж ажилладаг, Бээжингийн талд нэр хүндтэй нэгэнд тооцогддог байв. Гэтэл "Ишиг эврээ ургахаар эхийгээ" гэдэг зүйр үг байдаг. Япон, Өмнөд Солонгосын улс төр шинжээчдийн үзэж байгаагаар Ким Чен Унд харин энэ түшиг тулгуур одоо хэрэгцээгүй болсон бололтой. Учир нь түүний авга эгч болон хүргэн ах нь нас нөгчсөн эцгийнх нь алдар, сүр хүчээр дарангуйлж, эрх дураараа загнах боломж олгохгүй болгосноос амь тэмцэхдээ ийм шийдвэртэй алхам хийхэд хүрсэн. Түүний энэ мэт зөвхөн өөрийнхөө ирээдүйг бодсон муу санаатай бодлого, өөрийнхөө өрсөлдөгчид гэж үзсэн хамтран ажиллагсадаа нухчин дарах иймэрхүү алхам ээлж дараалан үргэлжлэх болно гэж ажиглагчид үзэж байгаа юм.

Р.Этүгэн

 

Сэтгүүлч Ц.Мөнхбаяр

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Зочин

      (112.72.13.219) 2013-12-13 14:28
      • 1
      • 0

      Өрөвдөлтэй юмаа. Ийм ч хэцүү нийгэм байх гэж... Аавынхаа оронд аав болж яваа ахдаа ингэж хандана гэдэг хүн биш, албин чөтгөр л байх даа. Энэ хүнд ер нь зүрх сэтгэл гэж юм байдаггүй байх. Бурханы ямар их гэсгээл үзэхээ төсөөлөхгүй л байна даа.

      Хариулах