Ардчилсан холбооны баярын эргэн тойронд буюу Д. Сосорбарам юу гэж хэлэв?

Twitter Print
2013 оны 12-р сар 11-нд 11:01 цагт
Мэдээний зураг,

Монгол оронд Ардчилсан холбоо үүсч хөгжсөний 24 жилийн ойн баярын үйл ажиллагаа ололт амжилт, алдаа оноогоо дүгнэн хэлэлцэж, Ардчилалын үйл хэрэгт өөрийн хувь нэмрээ оруулсан нөхдийнхөө энгэрийг одон медалиар мялааж, цээж дүүрэн омогшил, халуун алга ташилтаар дүүрэн байлаа. Баярын үйл ажиллагаа өчигдөр өглөө Ардчилалын үндэс суурийг тавьж, цогтой тэмцэж явсан, ард түмний дунд "Ардчилалын алтан хараацай" хэмээн хүндлэгдсэн С. Зоригийн дурсгалыг хүндэтгэж цэцэг өргөснөөр эхэлсэн юм. Үүний дараагаар Соёлын төв өргөөнд баярын хурал үргэлжилсэн. Ардчилсан холбооны үе үеийн зүтгэлтэнүүд, хот хөдөөгийн ардчилалын үнэнч дэмжигчид Соёлын төв өргөөнд хуран цугларсан байв. Баярын хурлыг нээж Монголын ардчилсан холбооны Ерөнхийлөгч, Үйлдвэр Хөдөө аж ахуйн сайд Х.Баттулга үг хэллээ. Тэрээр “Шударга ёсны өөрчлөлтийг бид хийхгүй бол хэн хийх билээ. Цаашид Ардчилсан холбоо улам олуулаа болж ихийг хийж бүтээх болно гэдгийг дуулгасан юм. Хорин дөрвөн жилийн турш энэ л өдөр эгшиглэдэг алдарт “Хонхны дуу” эгшиглэж танхимд цугласан ардчилалын алтан хараацайнууд түрэн дуулж, тэртээх 24 жилийн өмнөх тэр л мөчийг эргэн дурссан юм. Үүний дараагаар Ерөнхий сайд Н.Алтанхуяг үг хэлж, нижигнэсэн алга ташилт үргэлжилсэн.

Түүнчлэн Ардчилсан намын дарга Н.Алтанхуяг, Ардчилалын хөгжилд үнэтэй хувь нэмэр оруулсан журмын нөхдөө намынхаа дээд шагнал болох "Чингисийн одон"-гоор шагнасан юм. УИХ-ын гишүүн асан Л.Гүндалай, Социал Демократ намыг үүсгэн байгуулагчдын нэг П.Улаанхүү, Улаанбаатар хотын Гаалийн Ерөнхий газрын дарга Б.Хишигбат, Хан-Уул дүүргийн Иргэдийн төлөөлөгчдийн хурлын дарга Д.Батбилэгт нарыг шагналаа.

Шагнал гардан авсныхаа дараа Л.Гүндалайгийн хэлсэн үг олон хүний сэтгэлийг хөдөлгөж, бас мартсаныг сануулсан сайхан үг хэллээ гэж магтуулахад хүргэсэн. Тэрээр "Би 2000 онд УИХ-д бие даан нэр дэвшиж сонгогдоод, тэр жилийнхээ яг өдийд Ардчилсан намд гишүүнээр элсэж байлаа. УИХ-ын сонгуульд Ардчилсан нам навс ялагдсан байсан тэр үед Их хуралд Ардчилсан намыг төлөөлж, ардчиллын тугийг өргөж, ардчиллын галыг бөхөөхгүй гэж "чүдэнз зурж, гал гаргаж, цучил нэмж" явлаа. Миний энэ хувь нэмрийг үнэлж Ардчилсан нам "Чингисийн одон"-гоороо шагналаа гэж ойлгож байна. Бас 2004 онд анх "хүүхдийн мөнгө"-ийг санаачилж, ядарч зүдэрсэн олон түмэндээ буян болж явлаа" гэсэн юм.  

Мөн Ардчилсан холбооны анхдагчдын нэг, Төрийн соёрхолт, Гавъяат жүжигчин Д.Сосорбарам нэлээн хурц үг хэлсэн юм. Түүний хэлсэн үгийг гишүүд дэмжигчид анхааран сонсч, алга нижигнүүлэн ташиж, дэмжиж буйгаа илэрхийлсэн нь олон хүнд нэгийг бодогдуулсан биз ээ. Ингээд түүний хэлсэн үгийг доор сийрүүлье. 

"Би үг хэлье гээд гуйгаад гарч ирж байна. Яагаад гэвэл би тэвчсэнгүй л дээ. Би та бүхнийг босох байх гэж найдаж байна. Юу гэсэн үг вэ гэвэл “Хонхны” дууг анх зохиосон Эрдэнийн Бат-Үүл, Амарсанаа, Амарбаясгалан гэсэн найз нартайгаа нийлээд “Монголын ардчилсан” холбооны өмнөөс ухуулах хуудас нааж байсан.

Өнөөдөр ардчиллын зүтгэлтэнгүүд, ардчиллыг бий болгосон хүмүүсийн 30 хувь нь хорвоогийн мөнх бусыг үзүүлсэн байна. Тэр хүмүүсийн гэгээн дурсгалыг хүндэтгээд хэсэг хором чимээгүй зогсож эмгэнэл илэрхийлье гэж бодсон юм. Тэд юуны төлөө тэмцэж, яагаад амь, насаа элээсэн юм бэ гээд бодож суулаа л даа.

24 жилийн дараа Монгол улсын нийгэм ийм болчихно гэж бодож тэмцэгчид эрх чөлөөний төлөө тэмцээгүй, бидэнтэй хамт тэмцэхдээ. Бид 24 жилийн өмнө коммунист дэглэмийг халсан. Дараа нь “Чонын амнаас гараад бар аманд орно” гэдэг шиг 24 жилийн дараа эргээд харсан чинь хүний баялагийг дураараа булааж дээрэмддэг, хээл хахууль авч, өгөлцдөг, сусар бялдууч занд дуртай ийм л хүмүүсийг бид тэжээсэн байна. Би тэгэж харж байгаа. Тэвчихгүй байгаа учир товчхон үг хэлье гэж шийдсэн.

Өнөөдөр 24 жилийн дараа бид нар баярлаад алга ташаад, хөөрөөд ингээд байх өдөр биш. Өнөөдөр Монгол улсыг төр шиг төртэй байлгах тэмцэлийн өдөр гэж би үзэж байгаа. Энэ тэмцэл эхлэж байгаа өдөр гэж би үзэж байна. Бид сэрэх хэрэгтэй, бид  мэдрэх хэрэгтэй. Монгол улсад ардчилсан нийгмийг үүсгэн байгуулагч лидерүүдийн нэг Монгол Улсын Ерөнхийлөгч Цахиагийн Элбэгдорж “Том төрөөс ухаалаг төр рүү” гэсэн философи ярьж байна.

Тэгвэл ухаалаг байхын тулд мөрөөрөө амьдарч байгаа хүмүүсийг бүх боломжоор хангах хэрэгтэй. Баялаг бүтээхэд бүх хүмүүсийг хүндэтгэдэг байх учиртай.  Тэрнээс биш энд нэг хавчигнасан хойшоо ухарсан, нэр төрөө бодоод үг хэлээд зогсож байх нь зохимжгүй гэж би үзэж байгаа. Дээгүүр хараарай, суудалд хүн байхгүй. Шудрага ёсны төлөө тэмцдэг хүмүүс ийм цөөрсөн байхгүй юу. Энэ дотор мянга орчим хүн л байна. Дээд талын суудал дүүрдэг байсан, одоо байхгүй.

Тэд гутардаг, тэдний боломжийг хаахаар яршиг, яршиг гээд холддог. Тийм учраас “Монголын Ардчилсан Холбоо” модоор бол үндэс нь юм, үндэсийг дагаж баахан мөчир, навч ургасан. Тэр бол намаг. Энэ намаг дор амьдарч Ардчилсан намаар халхавч хийж өөрийнхөө заль мэхийг нуух гэсэн ийм уйвайгүй хүмүүсээр намууд дүүрсэн. Ганцхан ардчилсан нам биш шүү.

МАН, Иргэний зориг, МАХН гээд бүх намууд дотор амиа бодсон, хүмүүсийг шулагчид, шимэгчид дүүрсэн байгаа. Тэд улаан цайм нүдэнд харагдаж байна. Тийм учраас өнөөдөр монголын төр зөөлөн чихтэй, хараа хурцтай, хүнийг сонсдог, хүнд үйлчилдэг ийм төр байх ёстой гэж би бодож байна. Та нар хараарай, “Монголын Ардчилсан Холбоо”-ны анхны лидерүүд нь энэ "бохир заваан баасыг" цэвэрлэх гэж зовж явна.  

Гэтэл өнөөдөр манай Ардчилсан нам дотор гадны хулгайчид, уйваагүй, ичгүүр сонжуургүй бүр хүүхдийн паркийг шууд аваад иддэг хулгайчдаар шавчихсан байна. Монголын ирээдүйд бузартай. Эд нар хариуцлага хүлээх учиртай. Ийм тэмцэлийн өдөр шүү гэдгийг хэлэхийг хүссэн. Нөгөө талаар Альберт Эйнштейн гэгч агуу сэтгэгч хүн хэлэхдээ “Хүмүүсээ, хүн төрөлхтөн цаашдаа амьдаръя гэвэл өнөөдрөөр битгий амьдар”,  мөн “Амьдрал бол инээдмийн жүжиг юм” гэж.

Энэ инээдмийн жүжгээсээ татгалзаж ухаалаг амьдраасай гэдгийг хэлэхийг хүссэн юм. Төрийн алба гэж нэг замбараагүй юм байна. Танил тал нам, намын шахаа. Спорт, Соёл, Аялал жуулчлалын Яаманд нам, намын хэдэн шахаанууд оччихсон. Тэгээд л нь ажил явахгүй. Манай нам энэ, миний нам гээд. Үгүй ээ, Монгол улсад "Монгол" гэсэн ганцхан дээвэр байдгийг сана. Манай намд Магнай, Батзандан шоронгоос гарч ирэнгүүтээ шууд Ардчилсан намын ивээлд багтаж орж ирсэн. Энэ хүмүүсд хариуцлага тооц. Баярлах биш тэмцэх өдөр шүү гэж хэлэхийг хүссэн."

Ийнхүү Ардчилсан холбоо байгуулагдсан түүхт энэ өдөр Ардчиллын анхдагчдын нэг, Төрийн соёрхолт Д.Сосорбарамын хэлсэн үг дахин нэг "хонх" болж дуугарлаа. 

Д. Цэнд

Сэтгүүлч Ц.Мөнхбаяр

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.