"Үндэслэлгүй үнэ нэмсэн" гэх дуулиант торгууль

Twitter Print
2020 оны 11-р сар 26-нд 11:23 цагт
Мэдээний зураг,

Монголын төр чөлөөт зах зээлийг үгүйсгэн, төрийн зохицуулалттай эдийн засаг байгуулахаар зорьж эхэллээ. Ард түмэн талархан алга ташиж байна. Гэвч үүний цаана ямар аймшигтай хэлмэгдүүлэлт, ямар аймшигтай үр дагавар ирэхийг төсөөлөх ч үгүй байх шиг. Чөлөөт зах зээлд үнэ гэдэг зүйл эрэлт нийлүүлэлт дээр тогтдог. Мөн хэрэглэгчдэд зориулсан Олон Улсын стандарт гэдэг зүйл бий. Зах, худалдааны төвд 1 кг мах ₮7000-аар зарагдаж буй бол супермаркет, хайпермаркет, тансаг зэрэглэлийн дэлгүүрт бүгд адилхан үнэтэй байх ямар ч боломжгүй. Бүгд өөр өөрийн зорилтот хэрэглэгчтэй, хэрэглэгчиддээ зориулан бараа бүтээгдэхүүнээ бэлтгэдэг.

Жишээлбал "Good Price" сүлжээ дэлгүүр бол АНУ, Европоос дээд зэрэглэлийн чанартай бараа бүтээгдэхүүн оруулж ирж худалдаалдаг. Мөн үндэсний үйлдвэрлэгчдийн бараа бүтээгдэхүүнийг ч өөрсдийн стандартдаа нийцүүлэн худалдах эсэхээ шийдвэрлэнэ. "Good Price"-ын стандартад нийцэж буй бол тэр бүтээгдэхүүн Монголдоо л хамгийн чанартай гэж ойлгож болно. Үүнтэй нэгэн адил бүх төрлийн махны худалдаа хийхдээ ангилж ялган, яс өөх хальс бүгдийг цэвэрлэн илүү Олон Улсын стандартад нийцүүлэн зардаг. Тиймдээ ч цул болон ангилсан махны үнэ өндөр, хэрэглэгчид ч талархан авна. Аргагүй шүү дээ. Хаягдалгүй мах авна гэдэг хэрэглэхэд нэн хялбар. Мах сонгож авч чаддаггүй хүмүүст санаа зовохгүй байх боломж олгоно.

Гэтэл цар тахлын үед өргөн хэрэглээний бараа бүтээгдэхүүний үнэнд хяналт тавих нэрийн дор ТӨР тэднийг торгож байна. Яасан харамсалтай, яасан эмгэнэлтэй, яасан мунхаг шийдвэр вэ? Хэрэглэгчиддээ чанартай, сайн бүтээгдэхүүн санал болгосныхоо төлөө үйлчилгээний байгууллага ₮20 саяаар торгуулав. МҮХАҮТ-ын ерөнхийлөгч О.Амартүвшин ч гайхаж буйгаа ил тод илэрхийлж байна.

Хүнсний үйлдвэрлэл, хүнсний худалдаа бол жирийн ахуйн барааны наймаа биш. Энэ шийтгэл нэмүү өртөг шингэсэн хүнсний үйлдвэрлэлийн салбарт хөгжил биш дампуурал л авчирна. Иргэдийнхээ бизнес эрхлэх, Олон Улсын стандартад нийцсэн бүтээгдэхүүн үйлдвэрлэх, худалдаалах сонирхлыг "үнэ нэмсэн" нэрийн дор нухчин дарж болохгүй.

Та нарын ярьж буй өрсөлдөөний хууль, хэрэглэгчийн эрх гэдэг зүйл АНУ, Европ, Азийн орнуудад өөр утгаар хэрэгжиж байна. Тэнд эрүүл чанартай хүнсийг зориулалтын орчинд үйлдвэрлэх, үйлдвэрлэгчдийн бараа бүтээгдэхүүнийг хэт өндөр үнэ нэмж зарах, чанаргүй хүнс бүтээгдэхүүнд иргэн хордох г.м тодорхой асуудалд оролцдог.

Аль ч оронд "үнэ" гэдэг зүйлийг төр нь тогтоож, торгож харагддаггүй юм шүү. Эрхэм төрийн дарга, улсын байцаагчдаа та нар алдаа гаргасан бол уучлал гуйж, бизнесийн орчинд битгий оролц. Хэрэглэгчээ гомдоовол үйлчлүүлэхгүй байх зах зээлийн зарчим үйлчилж байна. Хугацаа нь дууссан бүтээгдэхүүн, гарал үүсэл тодорхойгүй зүйлс зардаг жижиг мухлаг, дэлгүүрийг тоохгүй мөртлөө Олон Улсын стандарт нэвтрүүлэхээр зорьж, мөрөөдөж буй хамт олныг битгий гомдоо. Миний мэдэхээр л "Good Price" сүлжээ дэлгүүрийн ажилчид салбартаа хамгийн өндөр цалинтай, хамгийн чанартай бараа бүтээгдэхүүнтэй, хамгийн шинэлэг бүх зүйлс харагддаг.

Амжилт хүсье залуус аа... Монголд "бизнест ээлтэй сайн цаг" ирэх л болно.

МҮХАҮТ энэ асуудалд оролцон бизнес эрхлэгчдээ хамгаалаасай.

Монголын бизнес эрхлэгчид энэ асуудлаар дуу нэгтэй байгаасай.

Сэтгүүлч Н.Урантогтох

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.