Хилийн боомтын тухай хуулийн төслийг хэлэлцэхийг хойшлууллаа

Twitter Print
2013 оны 12-р сар 05-нд 16:00 цагт
Мэдээний зураг,

УИХ-ын чуулганы өнөөдрийн хуралдаанаар ”Монгол Улсын хууль тогтоомжийг 2016 он хүртэл боловсронгуй болгох Үндсэн чиглэл батлах тухай” УИХ-ын тогтоолын төслийг хэлэлцэх эсэх асуудлыг хэлэлцэв. Хууль санаачлагчийн илтгэлийг Хууль зүйн сайд Х.Тэмүүжин танилцуулсан юм.

“Монгол Улсын хууль тогтоомжийг 2016 он хүртэл боловсронгуй болгох Үндсэн чиглэл”-ийн төслийг 2013 оны 1 дүгээр сарын 26-ны өдөр Засгийн газрын хуралдаанаар хэлэлцэж, 2013 оны 4 дүгээр сарын 23–ны өдөр УИХ-д өргөн мэдүүлж байсан.

УИХ-ын Хууль зүйн Байнгын хорооны хэлэлцүүлгийн явцад УИХ-ын гишүүдийн гаргасан саналыг нарийвчлан судалж, дахин ажиллах шаардлагатай гэж үзэж Засгийн газраас дээрх төслийг буцаан татсан бөгөөд тус яамнаас төслийг дахин боловсруулан өргөн мэдүүлжээ.

“Монгол Улсын хууль тогтоомжийг 2016 он хүртэл боловсронгуй болгох Үндсэн чиглэлийн төсөл”-ийг дараах байдлаар боловсруулсан байна.

Төслийг “хуулийн төсөл”, “Улсын Их Хурлын тогтоол”-ын төсөл гэсэн 2 үндсэн хэсэгтэйгээр, “Монгол Улсын Ерөнхийлөгч”, “Улсын Их Хурлын гишүүн”, “Засгийн газар”-аас санаачлан боловсруулах гэсэн 3 хэсэгт ангилан боловсруулж, Засгийн газраас санаачлан боловсруулах хууль, УИХ-ын тогтоолын төслийг Засгийн газрын гишүүдийн эрхлэх асуудлын хүрээгээр 19 чиглэлд ангилж, хууль болон УИХ-ын тогтоолын төсөл боловсруулах болсон үндэслэл, шаардлага, өргөн мэдүүлэх хугацаа, хяналт тавих Байнгын хороо зэргийг тодорхой тусгалаа гэж сайд Х.Тэмүүжин танилцуулсан.

УИХ-ын гишүүдээс гаргасан буюу холбогдох Байнгын хороо нь дэмжсэн “Үндсэн чиглэл батлах тухай” УИХ-ын тогтоолын төслийн талаарх 16 санал, Үндсэн чиглэлийн төсөлд шинээр нэмж тусгах хууль, УИХ-ын бусад шийдвэрийн төслийн талаарх 41 хууль, УИХ-ын 18 тогтоолын төслийн саналыг судлан үзэж, төсөлд өөрчлөлт оруулсан байна.

Төсөлд 2016 хүртэлх хугацаанд боловсруулж батлуулахаар тусгасан 221 хуулийн 79 нь шинээр боловсруулах, 75 нь шинэчлэн найруулах, 64 нь нэмэлт, өөрчлөлт оруулах бол УИХ-ын тогтоолын 38 нь шинээр боловсруулах, 2 нь нэмэлт, өөрчлөлт оруулах, 3 нь шинэчлэн найруулах юм байна.

Хууль зүйн байнгын хороо энэ асуудлыг хэлэлцэх нь зүйтэй хэмээн үзсэн аж. Харин чуулганы хуралдаанд оролцсон гишүүдийн олонх хэлэлцэх шаардлагагүй гэж үзсэн учир төслийг санаачлагчид нь буцаалаа. Мөн өдрийн хуралдаанаар Хилийн боомтын тухай болон уг хуулийг дагалдан гарах хуулийн төслүүдийн эцсийн хэлэлцүүлгийг хийхээр төлөвлөсөн байсан.

Хуулийн төсөлд хилийн 24 боомтыг нэгдсэн захиргаатай болгохоор тусгасан бөгөөд боомтын захиргааны орон тоо, төсвийн талаар тодорхой мэдээлэл байхгүй байгаа учир нарийн тооцоог оруулж ирэх хүртэл асуудлыг хэлэлцэхийг хойшлуулья гэсэн горимын саналыг УИХ-ын гишүүн Ц.Нямдорж гаргасан. Энэ саналыг хуралдаанд оролцсон гишүүдийн олонх дэмжсэн учир дээрх асуудлыг хэлэлцэхийг хойшлууллаа. 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.