Дэлхийн тэргүүлэх удирдагчдын шинэ оны мэндчилгээ

Twitter Print
2015 оны 01-р сар 05-нд 15:07 цагт
Мэдээний зураг,

Аливаа улс гүрний тэргүүнүүд шинэ он солигдох мөчид ард олондоо хандаж мэндчилгээ дэвшүүлдэг ёс тэртээ далан жилийн өмнөөс өргөн тархаж, уламжлал болсноор нийт ард иргэдийн хүсэн хүлээж, онцгой анхаарал хандуулдаг онцгой үйл явдал болсон байдаг. Ард түмэндээ анх анхаарал хандуулж мэндчилгээ дэвшүүлсэн хаан бол Британийн Георг V. Тэрээр 1935 оны зул сарын баяраар радио өргөн нэвтрүүлгээр дамжуулж ард олондоо мэнчилгээ хүргэж байсан бол энэ онд мөн ЗСБНХУ-ын тэргүүлэгч радио долгионоор ард олондоо хандаж байсан түүхтэй аж.

Энэ түүхэн уламжлал ёсоор төрийн тэргүүн нь шинэ жилийн мэндчилгээ алдаг оног дэвшүүлэх болсон Монгол улс 1990 оноос хойш Пунсалмаагийн Очирбат анхны ерөнхийлөгч болсон цагаас эхлэн тогтмолжсон гэхэд болно. Энэ жилийн хувьд Ерөнхийлөгч Цахиагийн Элбэгдоржийн дэвшүүлсэн мэндчилгээний гол уриа ёсоор бид шинэ оноо “Их бүтээн байгуулалтын жил” болгох ёстой. 

Харин ОХУ-ын Ерөнхийлөгч Владимир Путины мэндчилгээ Оросуудад шампанск, мандарин, чидун жимсний зуушны нэгэн адил баяр ёслолын салшгүй нэг хэсэг болсоор ирсэн бөгөөд Оросын ард түмэн 1999 онд анх удаа хоёр ерөнхийлөгчийн мэндчилгээг дараалан хүлээж авч байсан түүхтэй. Эхлээд албан тушаалаа шилжүүлэн өгч байгаа Борис Ельцин мэндчилгээ хүргэсний дараа ор суудлыг нь авсан шинэ ерөнхийлөгч Владимир Путин ард түмэндээ хандаж үг хэлж байсан билээ. ОХУ-д сонирхолтой нь ерөнхийлөгчийн мэндчилгээ хоёр ч удаа хүрдэг. Өргөн уудам газар нутгийн цагийн шаталбараас шалтгаалдаг учир шинэ он гарахаас хэдэн өдрийн өмнө бичсэн ерөнхийлөгчийн мэндчилгээг хамгийн түрүүнд Алс Дорнодын иргэд хүлээн авдаг бол цагийн ялгааны дагуу бусад бүс нутгуудад дараа нь хүрдэг байна.

Их Британийн хаан Георг V анх 1932 онд анх эх суурийг нь тавьсан мэндчилгээ 1939 оноос нэгэнт уламжлал болон тогтсон бөгөөд Елизавета II хатан хаан харин 1952 онд анх радиогоор мэндчилгээ хүргэж байсан бол 1957 оноос телевизээр дамжуулдаг болсон аж.

Хатан хаанаас ард түмэндээ хандсан бусад мэндчилгээний эх хувийг тус улсын ерөнхий сайд бэлтгэдэг бол зул сарын баярын мэндчилгээг Елизавета II өөрөө нухацтай бэлтгэдэг бөгөөд хааны ордныхон техник, технологийн дэвшлийг ч үүнд ашиглаж 2012 оны зул сарын мэндчилгээг 3D форматаар дамжуулсан нь түмэн олон хатан хаанаа дэргэдээс нь мэт харж, хүлээн авах боломж олгож байжээ.

Германд бол анх 1952 онд зул сарын болон шинэ жилийн баярын мэндчилгээг телевизээр дамжуулж эхэлсэн байдаг. Харин 1969 оноос зул сарын баярын мэндчилгээг канцлер, шинэ жилийнхийг ерөнхийлөгч дэвшүүлж байх уламжлал тогтсон байна. Гэтэл 1970 онд энэ хуваарилалт өөрчлөгдөж канцлер шинэ жилээр мэндчилж, ерөнхийлөгч зул сарынхыг хариуцах болсон аж.

Германы канцлер Ангела Меркель эмэгтэй хүний хувьд өөрийн үүрэг хариуцлагад илүү нухацтай хандаж шинэ оны мэндчилгээндээ улс орны дотоод болоод гадаад улс төрийн бодлогод илүүтэй онцгой анхаарал хандуулдаг аж.

Германы ерөнхийлөгч Йоахим Гаук харин улс төрд зохих хэмжээний анхаарал хандуулдаггүй тул нийгэм, соёлын болоод ёс суртахууны асуудалд түлхүү чиглэсэн үйл ажиллагаа явуулдаг байна. Энэ ч учраас зул сарын баярын мэндчилгээ хүргэх үүргээ тэрээр нэр төртэй гүйцэтгэдэг бөгөөд өнгөрсөн жилийн арванхоёрдугаар сарын 25-нд хүргэсэн мэндчилгээндээ тэрээр цагаачлалын асуудалд хүлээцтэй хандаж, тэвчээр гаргахыг ард иргэдээсээ хүссэн байна.

Францын ерөнхийлөгч Франсуа Олланд арванхоёдугаар сарын 31-ны өдөр 20:00 цагт өөрийн биеэр ард түмэндээ ханддаг байна. Түүний баярын илгээлтийн утга, зорилго ямар ч байлаа гэсэн төгсгөлд нь "Бүгд найрамдах улс мандтугай, Франц улс мандтугай!" гэж хэлдэг аж.

Данийн ард иргэд харин засгийн газрын тэргүүн болон эзэн хаантнаасаа баярын мэндчилгээ хүлээн авдаг. Тус улсын хатан хаан Маргерете II арванхоёрдугаар сарын 31-ны 18:00 цагт Амалиенборг ордноос мэндчилгээ хүргэдэг ёстой бөгөөд улс төрийн асуудал хөнддөггүй бол эдийн засаг, нийгмийн асуудлаар тус улсын ерөнхий сайд Хелле Торнинг-Шмитт нэгдүгээр сарын 1-ний өдөр илгээлт хүргэдэг байна.

Нидерландын вант улс ч мэндчилгээ хүргэх уламжлалт ёсноос гадуур үлддэггүй бөгөөд тус улсын шинэ хаан Виллем-Александр 2013 оны арванхоёрдугаар сарын 25-ны өдөр анх ард түмэндээ хандан мэндчилгээ хүргэж байжээ. Телевизээр дамжуулсан түүний мэндчилгээний үеэр тус улсын гурван үе уламжлагдсан хааны гэр бүлийн гэрэл зургийг үзүүлж байсан нь Нидерландын вант улсын хаан ширээг тэрээр залгамжлах бүрэн эрхтэй гэдгээ цохон тэмдэглэсэн санаа байсан аж.

1975 оноос Испанийн эзэн хаан зул сарын баяр тохиолдуулан ард иргэдтэйгээ мэндчилдэг уламжлал тогтсон бол тухайн үед хаан ширээ залгамжилж асан Хуан Карлос I хаантны мэндчилгээг Испаничууд өнөө хүртэл хүлээн авч дассан байв. Эзэн хаантан 2013 онд хамгийн сүүлд дэвшүүлсэн мэндчилгээндээ "амьдралын олон талын хэв шинжтэй ч нэг улс орон байх "Үндсэн хуулийн заалтыг хамгаалахыг чухалчилж байсан бол Каталоний орон нутгийн телевизийн ажилтнууд тэр үед ажил хаяад байсан учир салан тусгаарлахын төлөө тэмцсээр ирсэн тус нутгийн ард олонд түмний илгээлт хүрээгүй байна.

Испанийн хаан Филипп VI

Испанийн ард түмэнд 2014 онд анх удаа Филипп VI хаантны мэндчилгээг хүлээн авах завшаан тохиосон байна. 2014 оны зургадугаар сард эцгээс уламжлал хаан ширээнд заларсан тэрээр шинэ оны илгээлтдээ улс орны дотоод хямрал, авилга хээл хахуулийн асуудлыг хөндөж, "хуулийн өмнө бүгд адил тэгш эрх үүрэг хүлээнэ" гэдгийг цохон тэмдэглэжээ.

Бельгийн хаан Philippe гэр бүлийн хамт

Бельгийн хаан Филипп 2013 оны зул сарын баяраар анх ард иргэддээ хандаж мэндчилгээ хүргэж байсан бөгөөд  боловсрол, залуусыг ажлын байраар хангах асуудал хөндөж байжээ. Түүний эцэг Альберт II ард түмэндээ хандахдаа ширээний ард суудаг байсан бол Филипп энэ заншлыг өөрчилж албат олныхоо өмнө зогсоогоор мэнчилгээ дэвшүүлэхийг чухалчилсан бөгөөд телевизийн дуран авай түүний дүр төрхийг олон байрлалаас авч царай зүсийг нэг тодруулан нэг бүдэгрүүлж, тулгаж, холдуулан зураг авч байсныг "хааны ордны орон зайд түүний эзлэх байр суурийг тод томруун харуулж байгаа явдал" хэмээн тайлбарлагчид тэмдэглэж байжээ.

Умар Солонгосын удирдагч Ким Чен Ун ч мөн ард иргэдээ баярын мэндчилгээгүй орхисонгүй. Тэрээр хуучин оны сүүлчийн мөчөөс шинэ оны эхний өдөр дамнуулсан мэндчилгээндээ ирж байгаа шинэ оныг "Аугаа их өөрчлөлт, их тулааны эрин цаг үе" хэмээн онцолсон байна.

 

Сэтгүүлч Л.Отгонбат

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.