Хуурамч дипломтой ч С.Чинзориг сайдын буянаар төрийн албанд шургалжээ

Twitter Print
2019 оны 10-р сар 28-нд 18:37 цагт
Мэдээний зураг,

Монголын төрийн албанд нүүрлэсэн хулгай луйвар, авилга хээл хахууль, албан тушаалын гэмт хэргүүд толгой дараалан илэрч, бөөн шуугиан дэгдээсэн энэ цаг үед бас нэгэн шуугиан хүчээ авч, Ерөнхий сайд У.Хүрэлсүхийн танхимын хувь заяаг ганхуулах эрчмийг нэмж байна. Тун саяхан Монгол Улс Олон улсын банк санхүүгийн байгууллага FATF-ын “Саарал жагсаалт”-нд орсоны балгаар Монгол банкны Ерөнхийлөгч  Н.Баяртсайхан, Санхүүгийн зохицуулах хорооны дарга С.Даваасүрэн нарыг УИХ-ын дарга Г.Занданшатар өрөөндөө дуудаж “Улстөрийн хариуцлага хүлээлгэх” тухайгаа хатуухан мэдэгдсэн. Тэгвэл түүний араас УИХ дахь сөрөг хүчин АН-ын Зөвлөлөөс “Хууль шүүх, прокурорын байгууллагуудаа удирдлага зохион байгуулалтаар шахаж ажиллуулж чадаагүй” үндэслэлээр ХЗДХ-ийн сайд Ц.Нямдоржтой хариуцлага тооцож, огцруулахаар тэмцэж эхлээд байгааг УИХ-ын “Чөлөөт гишүүн” О.Баасанхүү дэмжиж хүчийг нь авхуулаад байгаа.

Тэгтэл Монгол төрийг бужигнуулсан хулгай луйвар газар сайгүй өрнөж байгааг нотолж, их дээд сургуулийн хуурамч дипломтой хүмүүс төрийн томоохон албан тушаал хашиж, бөөн асуудал үүсэж байгаа нь өнөөдөр ч үргэлжилж байгаа юм санж.  Энэ талаар баахан хэл ам дэгдэж, дээр дооргүй бужигналдаж байсан нь саяхан. Тухайлбал хуурамч дипломтонгууд янз бүрийн сургуулийн захирлаас эхлээд Улаанбаатар хотын нэгэн дүүргийн Засаг даргаар хүртэл ажиллаж байсан тохиолдол бий. Хэдэн мянган хуурамч дипломтон салбар бүрт шургалан орж, хэн нэгэн даргын татаасаар удирдах албан тушаалд томилогдож байсан цаг саяхан. Энэ байдал хэрээс хэтэрснийг хэвлэл мэдээллийн хэрэгслээр удаа дараа шүүмжилсээр төр засаг хуурамч дипломын эсрэг тэмцэж эхэлсэн байдаг. Төрийн албаны зөвлөлийнхөн хуурамч дипломтой дарга, ажилтнуудтай хэдэн жил тэмцсэний эцэст арайхийн цэгцэнд нь оруулж байсан нь саяхан.

Боловсролын яамны нэгдсэн сан бүртгэлд диплом нь бүртгэлгүй хүнийг ажилд авдаггүй, авсан тохиолдолд арга хэмжээ авдаг технологи хууль мэт мөрдөгддөг болоод цөөнгүй жил өнгөрч байгаа билээ.  Гэвч хуурамч дипломтнуудын балаг одоо ч гэсэн үргэлжилж байна. Тухайлбал  боловсролын салбарт буюу Монгол Солонгосын хамтарсан Политехникийн коллежийн захирал Х.Цэгмидийн талаар “Үндэсний шуудан” сонинд саяхан нэгэн ноцтой баримт гарч байсан. 

Гэтэл яг үнэн хэрэгтээ тэрхүү хуурамч дипломтон Х.Цэгмид гэгч нь Хөдөлмөр нийгмийн хамгааллын сайд С.Чинзоригийн ойр дотны буюу "Яах аргагүй туслах"-аас өөр аргагүй  хүн гэнэ шүү. Тэр ч утгаараа өнөөх Х.Цэгмид захирал дээрх сургуульд эрх дархтай, ёстой л дураараа тонгочиж байдаг бололтой.  Ер нь бол энэ Х.Цэгмид гэгч нь Зам тээвэр, хөгжлийн сайд Б.Энх-Амгалангийн хамгийн дотны найз нь гэдэг юм байна.  Тийм ч учраас Зам тээвэр хөгжлийн сайд Б.Энх-Амгалан Хөдөлмөр нийгмийн хамгааллын сайд С.Чинзоригт “Татгалзах аргагүй санал” тавьж хуурамч дипломтой өөрийнхөө найз Х.Цэгмидийг "Монгол-Солонгосын хамтарсан Политехник коллеж"-ийн захирлаар томилуулсан байдаг.

Гэтэл яг үнэндээ бол урьд нь энэ коллежийн захирлаар ажиллаж байгаад 2016 оны эцсээр халагдсан  Г.Оюунбилэг гэдэг бүсгүй өнгөрсөн хоёр жилийн хугацаанд “Үндэслэлгүй ажлаасаа халагдсан” гэдэг нь гурван ч шатны шүүхээр нотлогдож, ажилдаа буцаж орох тушаал нь ч гарсан юм билээ. Өнгөрсөн хугацаанд хүүхэд төрүүлсэн Г.Оюунбилэг бүсгүй өнөөдөр ч ажилдаа орж чадаагүй яваа бөгөөд Хөдөлмөр нийгмийн хамгааллын сайд С.Чинзоригтой уулзах болгонд “За Г.Оюунбилэгээ би чамайг ойлгож байна. Төрийн албаны зөвлөлөөс чамайг нь ажилд чинь буцааж оруулах шаардлага ирсэн. Би шүүхийн шийдвэр биелүүлээд чамайг албан тушаалд чинь тавьчихъя. Гэхдээ чи эхлээд надад чөлөөлөгдөх өргөдлөө бичээд өгчих. Би чиний оронд ажиллаж байгаа үүрэг гүйцэтгэгч Х.Цэгмэдийг халчихвал Зам тээврийн хөгжлийн сайд Л.Энх-Амгалантай зөрчилдөх болчихоод байна. Эсвэл өөрөө Л.Энх-Амгалан сайдаар зөвшөөрүүлээд ир” гэсээр өнөөдрийг хүрсэн гэнэ.

Харин энэ бүх хэрэг явдлын гол гэм буруутан, хуурамч дипломтон Хүрэлбаатар овогтой Цэгмид нь ХААИС-ийн мал эмнэлгийн факультетийг төгссөн гэдэг юм байна. Гэтэл түүнтэй хамт сурч байсан ангийнхан нь “Х.Цэгмид бидэнтэй хамт сургууль төгсөөгүй. Түүнд диплом байх ч ёсгүй. Сургуулиас хөөгдөөд явж байсан” гэдэг аж. Төрийн албаны зөвлөлөөс “МСҮТ, политехник коллежийн захирал томилох сонгон шалгаруулалтын заалтад таваас доошгүй жил төрийн байгууллагад ажилласан, удирдах албан тушаалд хоёроос доошгүй жил ажиллаж, бакалавр, магистрын дипломтой, хууль эрх зүй, боловсрол нийгмийн удирдлага мэргэшсэн хүнийг томилно” гээд тодорхой заагаад өгчихсөн байдаг юм байна. Гэтэл Х.Цэгмид “Монгол- Солонгосын политехникийн коллеж”-ийн захирлаар томилогдохдоо сонгон шалгаруулалтад ч оролгүй шууд л баахан дарга, сайд нарын дэмжлэгээр захирал болчихсон нөхөр гэнэ. Улмаар төрийн үйлчилгээний удирдах албан тушаалын босго, захирлуудын сонгон шалгаруулалтын шаардлага боловсрол, ажлын туршлага ажилласан жил, мэргэшил гээд төрийн албан хаагчийн ямар ч шаардлагыг огт хангахгүй хүн өнөөдрийг хүртэл энэ сургуулийг удирдаж байгаа аж.

Тэгвэл тус сургуулийн өмнөх захирал Г.Оюунбилэгийг ямар ч үндэслэлгүйгээр ажлаас  чөлөөлсөн нь гурван шатны шүүхээр тогтоогдчихсон хэрнээ өнөөдрийг хүртэл урьд нь эрхэлж байсан ажилдаа орж чадахгүй хохирч яваа нь үнэн байна. Хэдийгээр өмнөх захирал асан Г.Оюунбилэг гурван ч шатны  шүүхийн тогтоол шийдвэрийг С.Чинзориг сайдад өгсөн ч  тухайн асуудал өнөөдөр ч шийдэгдээгүй л явж байгаа аж. Гэтэл өнөөх Х.Цэгмид нь хуурамч дипломтой, бусдын хуурч мэхлэн сургуулийн захирал болсон талаарх ноцтой асуудал яригдаад удаж байгаа гэнэ. Энэ талаар албаны эх сурвалжаас авсан мэдээллээр “Монгол, Солонгосын политехникийн коллеж”-ийн захирал Х. Цэгмидийн өгсөн диплом БСШУСЯ-ны цахим бүртгэлд бүртгэгдээгүй. Мөн хамт суралцаж байсан ангийнхан нь түүнийг сургуулиас хөөгдсөнийг нь нотолсон. Үндсэндээ хуурамч дипломтой нь нотлогдсон Х.Цэгмидийн асуудал нь маш ноцтой зүйл болж хувирсан. Энэ талаар Хөдөлмөр нийгмийн хамгааллын яамны холбогдох албан тушаалтнуудад уламжилсан боловч өнөөдрийг хүртэл тодорхой хариу ирээгүй байгаа нь асуудлыг нэлээн сатааруулж байгаа болно” гэсэн байна.

Нэгэнт асуудал ийм хэмжээнд тулсан учир бидний зүгээс бүх талаар судалгаа, баримт нотолгоог баталгаажуулах талаар хөөцөлдөж, төрийн албанд шургалсан хуурамч дипломтонгуудын нэгний талаарх энэхүү мэдээллийг үргэлжлүүлэн судлах, мэдээлэх болно.

Сэтгүүлч Д.Энхтүвшин

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.