Хүүхдийн тоглоомын талбай. Хоёр охин савлуур дээр савлангаа хоорондоо “ихэмсэг” яриа өрнүүлж байна.-
Ойрд ямар ч баяр болсонгүй нь харамсалтай! хэмээн нэг нь бодлогошронгуй өгүүлэв.
- Надад харамсах юм алга гэж нөгөө охин нь хэллээ.
- Чи баярт дургүй юм уу?!
- Дуртай байлгүй яах вэ! Маш их! Надад хангалттай олон баяр бий... Өдөр бүр – баяр!
- Тийм байх боломжгүй!
- Боломжтой. Манай гэрийнхэн Өдөр төрснийг тэмдэглэдэг юм.
- Төрсөн өдрийг гэж үү...
- Төрсөн өдрүүдийг ч бас тэмдэглэдэг, гэхдээ жилд нэг удаа. Харин Өдөр төрснийг бол өдөр болгон тэмдэглэдэг. Манай аав энэ баярыг бодож олсон юм.
- Та нар тэгээд энэ баяраа яаж тэмдэглэдэг юм бэ?
- Их амархан! Аав өглөө босонгуутаа ээж бид хоёрыг сэрээдэг юм. Тэгээд бид гурав гал тогооныхоо өрөөнд орж нэг нэг аяга ус хийж авдаг. Аавыг “Нэгэн гайхалтай сайхан өдөр төрлөө! Бид ч азтай юм аа! Шинэхэн өдрийн төлөө!” гэж үг хэлсний дараа бид аягатай усаа ууцгааж, араас нь зөгийн бал идэж, ямар нэгэн дуу дуулдаг.
- Хэрэв тиймхэн өдөр болбол яах вэ?
- Өмнө нь тэгдэг байсан. Харин Өдөр төрснийг тэмдэглэдэг болсноос хойш өдөр бүр сайхан байдаг болсон. Ямар нэгэн онцгүй зүйл тохиолдох нь ховор болсон.
- Тэгвэл бусад хүмүүст яагаад ийм баяр байдаггүй юм бэ?
- Аав хэлэхдээ энэ баяр бүх хүнд бий гэсэн... тэд л анзаардаггүй болохоос. Зарим нь ийм баяр байдгийг бүр мартаж орхисон байдаг. Чи хүсвэл хагас сайнд манайд хүрээд ирээрэй... Манайд хоноод, маргааш өглөө нь Өдөр төрснийг хамт тэмдэглэе!
Григорий Беркович
Орчуулсан: Өлзийбатын Уянга
Энэ мэдээ танд таалагдаж байвал LIKE хийгээрэй. Танд баярлалаа.
