Н.Энхбаяр: У.Хүрэлсүхээ, айгаагүй юм бол дахиад сонгууль явуулчих

Twitter Print
2020 оны 06-р сар 26-нд 16:50 цагт
Мэдээний зураг,

МАХН-аас дөнгөж сая цаг үеийн асуудлаар мэдээлэл хийлээ. Тус намын зүгээс энэ жилийн сонгууль хууль бус болсон хэмээн үзэж, сонгогчдын саналыг хуурамчаар нэмсэн, мөн гадаадад гацсан иргэдийн регистрийн дугаарыг урьдчилсан байдлаар уншуулсан, үүнийгээ харин яаж ч чадахгүй учраас сонгуулийн дэлгэц дээр гарсан тооноос хүснэгт дээр гарсан тоо зөрснийг тайлбарлаж чадахгүй байгаа хэмээн мэдэгдлээ.

МАХН-ын дарга Н.Энхбаяр “Би анхнаасаа л сонгууль шударга бус болох нь гэдгийг хэлж байсан. Бие даагчид шударгаар өрсөлдөөд гараад ирнэ гэж бодсон ч тэд бас саналаа луйвардуулсан гэдгээ хүлээн зөвшөөрлөө. Тиймээс 17.00 цагаас бие даагчид, бусад эвсэл, улс төрийн намууд нэгдэн Ерөнхийлөгчтэй уулзах гэж байна. Сонгинохайрхан дүүрэгт гэхэд л хуруунд нь тэмдэглэгээ хийхгүй учраас эгчийнхээ өмнөөс санал өгсөн зөрчил илэрсэн. Тэд дандаа хуулийн дагуу гэж хэлдэг ч хамгийн хууль бусыг хийдэг. С.Мөнхчулуун гэж залуу зөрчил илрүүлсэн байна лээ. Нэг хэсэг дээр 3000-аас илүү сонгогч байхгүй. Гэтэл гуравхан хэсгийг уншсан атлаа нэг хүнд 13 мянган санал уншигдсан байсан.

Бусад нам эвслийн нэр дэвшигчид нэг ширхэг ч санал авахгүй байлаа ч нэг хүн 23 мянган санал авах боломжгүй. Тэгэхээр урьдчилаад хуудас уншуулчихсан байсан гэсэн үг. Яалт ч үгүй сонгогчдын саналыг урьдчилаад уншуулчихсан байна. Тийм учраас энэ удаагийн сонгуулийн үр дүнг хүлээн зөвшөөрч чадахгүй. СЕХ-г татан буулгах хэрэгтэй. Дахин санал хураалт явуулах ёстой. Сонгуулийн ерөнхий хороог татан буулгах хэрэгтэй. У.Хүрэлсүх ээ! айгаагүй бол дахин сонгууль явуулчих. С.Эрдэнэ даргаа та хуйвалдаагүй, ял авахаасаа айгаагүй бол надтай хамт луйврын сонгуулийн эсрэг хамтдаа тэмцье.  Бусад бие даагч, намуудтай хамтарч энэ удаагийн сонгуулийг хүлээн зөвшөөрөхгүй гэдгээ хэлмээр байна. Ж.Батзанданд хэлэхэд шударга ёсны төлөө зогсоё.

Монгол ахиад сэрэхээргүйгээр, сэхэхээргүйгээр МАН-ын дарангуйлалд өртлөө. Одоо тэмцэх цаг нь болсон. Тууштай тэмцэх болно гэдгээ хариуцлагатайгаар мэдэгдэж байна" гэлээ. 

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.