СХД-ийн Нэгдсэн эмнэлэгт хоногт дунджаар 70 хүүхэд ирж байна

Twitter Print
2014 оны 12-р сар 22-нд 13:58 цагт
Мэдээний зураг,

СХД-ийн Нэгдсэн эмнэлгийн барилга анх 1982 онд ашиглалтанд орсон. Тухайн үед 6000 хүнтэй дүүрэгт эмнэлгийн тусламж үйлчилгээ үзүүлнэ гэж тооцоолсон байна. Харин өнгөрсөн оны статистик мэдээгээр тус дүүрэгт 280 мянга гаруй хүн оршин сууж байгаа аж. Хүн ам нь 46 дахин нэмэгдсэн ч эмнэлгийн барилга нь уртаашаа ч, өргөөшөө ч томорсонгүй. Эмч нарынх нь тоо ч нэмэгдсэнгүй.

Өвөл урт, хүйтэн, утаатай болдог манай орны хувьд өвлийн улиралд бага насны хүүхдүүд даарч хөрч, ханиад хүрч, улмаар хүндэрч эмнэлэгт хэвтэх нь ихэсдэг. Харин харъяалалын дагуу дүүргийнхээ эмнэлэгт хандахад орны хүрэлцээ тун хангалтгүй байгаа юм.

Тус дүүргийн Нэгдсэн эмнэлгийн хүүхдийн тасгийн эмч нар ярихдаа “Манай эмнэлэг даацаасаа хэд дахин давсан тооны өвчтөнд үйлчилж байна. Эмнэлэг нэгэнт дүүрсэн байхад одоо ирж байгаа хүнд ханиадтай, хэвтэн эмчлүүлэх шаардлагатай хүүхдүүдээ хаана авч, эмчлэхээ мэдэхгүй байна. Өдөр бүр хүүхдийн тоо нэмэгдээд байдаг. Гэтэл бүх өрөө тасалгаа пиг дүүрэн” гэцгээж байна.

Хүүхдийн тасагт эмнэлгийн дагаж мөрдөх журмыг дурдаад ч хэрэггүй. Уг нь Эрүүл мэндийн сайдын баталсан журмаар эрчимт эмчилгээний тасагт хэвтэн эмчлүүлж байгаа нэг хүүхдэд 12.3 м/кв талбай, харин тасагт хэвтэн эмчлүүлж байгаа хүүхдэд 6.5 м/кв талбай оногдох ёстой. Гэтэл бодит байдал дээр 15-20 хүүхэд ийм зайнд хэвтэн эмчлүүлж байна.

Мөн нэг эмч өдөрт 15 хүүхэд үзэх ёстой бол СХД-ийн Нэгдсэн эмнэлгийн хүүхдийн тасгийн нэг эмч өдөрт 60 орчим хүүхэд үзэж, эмчилж байна. Нийслэл хотод маань өдөрт нэг шинэ барилга ашиглалтанд орж байгаа ч  эмнэлэг, сургууль, цэцэрлэгийн шинэ барилга нэмэгдлээ гэх нь хаа нэг өдрийн од шиг сонсогдож байна.

Яг л сэтгэл муутай хойд эх шиг Засаг төр нь хүртэл эмнэлгийн барилга, сургууль, цэцэрлэг гэхээр л ад шоо үзэж,  хөрөнгө мөнгө төсөвлөхгүй, газар өгөхгүй байсаар өвчтэй хүүхдүүд нь шалан дээр хэвтэж, 6 настай балчирууд идэр есийн хүйтэнд 5-10 км алхаж сургуульдаа явж, 3-4 ээлжээр 40, 50 хүүхэдтэй ангид хичээллэсэн болж, нялх үрс цэцэрлэгийн хүрэлцээгүйгээс гэртээ түгжигдэж, ахуйн осолд өртсөөр байна.  

Бид хэзээ үр хойчдоо эхийн сэгтэлээр ханддаг болох вэ...

Э.Гүнтөмөр

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • 55555

      (119.40.97.96) 2015-01-26 17:11
      • 0
      • 0

      нэг эмч 15 хүүхэд үзэх естой юм бол бусад үед юу хийх юм бол

      Хариулах