ЕБС-ийн 13 сурагч мансууруулах бодистой холбоотой хэргээр шалгагдаж байна

Twitter Print
2019 оны 09-р сар 18-нд 12:40 цагт
Мэдээний зураг,

ЦЕГ-ын Хар Тамхитай тэмцэх газраас цаг үеийн асуудлаар мэдээлэл хийж байна. Энэ үеэр ЦЕГ-ын Хар тамхитай тэмцэх газрын дарга, цагдаагийн хурандаа Ж.Эрдэнэболд “2019 оны эхний есөн сарын байдлаар мансууруулах болон сэтгэцэд нөлөөлөх эм, бэлдмэлтэй холбоотой 193 хэрэгт 333 хүн холбогдон шалгагдаж байна. Үүний 23 хэрэг нь хөдөө орон нутагт бүртгэгдсэн. Үүнээс харахад энэ төрлийн хэрэг зөвхөн Улаанбаатарт биш хөдөө орон нутагт ч гарч байна. 

Нийт хүний 282 нь буюу 85.4 хувь нь 18-35 насы залуучууд байгаа бол нийт холбогдогчын дотор 13 ЕБС-ийн сурагч, дөрвөн төрийн албан хаагч байна. Шуудан илгээмж ашиглан гадны орнуудаас Монгол Улс руу хар тамхи, мансууруулах бодис нэвтрүүлэх гэсэн 11 хэргийг илрүүлэн шалгаж байна. Гэмт хэрэгт холбогдон шалгагдсан хүмүүсийн 14.2 хувь нь гэмт хэргийг давтан үйлдсэн. Иймд цагдаагийн байгууллагаас хар тамхи, мансууруулах эм, сэтгэцэд нөлөөт бодисын хууль бус эргэлт, түүний хор хөнөөлөөс урьдчилан сэргийлэх, далд хэрэглэгч нарыг илрүүлэх, хууль бус хэрэглээг хязгаарлах зорилгоор иргэн, аж ахуй нэгж, байгууллагуудад хандан “Хар тамхигүй орчин, ажлын байр” уриалгыг гарган, тодорхой ажил арга хэмжээнүүдийн зохион байгуулж байна. 

Шуудан илгээмж ашиглан гадны орнуудаас Монгол Улс руу хар тамхи, мансууруулах бодис нэвтрүүлэх гэсэн 11 хэргийг илрүүлэн шалгаж байгаа. Сошиалд нэр бүхий хүмүүс ургамлын гаралтай мансууруулах бодисыг хориглохыг эсэргүүцэн үзэл бодлоо илэрхийлсэн байсан. Ургамлын гаралтай мансууруулах бодисыг манай улсад хориглодог. Тиймээс ийм яриа гаргаж, хүүхэд залуусыг уриалж, турхираад байгаа хүмүүстэй цагдаагийн байгууллага хатуу тэмцэнэ. Манай улсын 45 иргэн гадны улс орнуудад хар тамхины хэргээр ял эдэлж байна. Нэг нь Словак улсад, 44 нь БНХАУ-д ял эдэлж байгаа" гэлээ.  

Цагдаагийн байгууллагаас мансууруулах болон сэтгэцэд нөлөөлөх эм, бэлдмэлийн хэрэглээг бууруулах, гэмт хэргийг таслан зогсоох чиглэлд анхаарч, "Хар тамхигүй орчин, ажлын байр" уриалгыг гаргаж байгаа аж. Энэ ажлын хүрээнд байгууллага, хамт олноороо мансууруулах эм, сэтгэцэд нөлөөт бодисыг илрүүлэх “сорьц тавих” шинжилгээнд сайн дураараа хамрагдан, хар тамхигүй ажлын байр, хамт олныг бий болгохыг уриалж буйгаа хэвлэлийн хурлын үеэр мэдэгдлээ. 

Төрийн байгууллага болон хувийн компаниуд мансууруулах бодисын сорьц тавих шинжилгээг хэвшил болгосноор энэ төрлийн бодис хэрэглэдэг хүн үндэсний томоохон компаниуд болон төрийн байгууллагад ажиллах боломжгүй болох юм. Хэвлэлийн хурлын үеэр цагдаагийн байгууллагаас дэвшүүлж буй "Хар тамхигүй орчин, ажлын байр" уриалгыг танилцууллаа. 

Г.Ганаа 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.