Дарханы замд үүсэх эрсдлийн хариуцлагыг хэн хүлээх вэ?

Twitter Print
2019 оны 09-р сар 18-нд 10:25 цагт
Мэдээний зураг,

Улаанбаатар Дархан хотын хоорондох замыг бүхэлд нь хааж шинээр зам тавьж эхэлсэн нь нийгэмд маш их бухимдлыг үүсгээд байгааг бид бүхэн мэднэ. Бухимдал үүсэхээс ч өөр аргагүй байдалд хүрснийг өөрийн биеэр үзээд ирлээ.

Бороотой үед 10 цаг, бороогүй үед доод тал нь 6 цаг зорчих болсон энэхүү зам нь олон талын эрсдэл дагуулж байгааг энд хэлэх нь зүйтэй. Ялангуяа шөнийн цагт үзэгдэх орчин хязгаарлагдмал үед шороон замын хөдөлгөөнөөс үүсэх тоос, тоосонцор нь хөдөлгөөнд оролцогчдын аюулгүй байдалд ноцтойгоор нөлөөлж байгаа нь харагдаж байна. Хааяахан харагдах төдий замын тэмдэг тэмдэглэгээнээс өөр баримжаалан явахад тун хүнд байна. Ялангуяа тоосноос зугтаан дураараа шинээр зам үүсгэн явах автомашинууд нь уул, жалгын эрсдэлтэй замыг бий болгон шөнийн цагт замын баримжааг алдагдуулан эрсдлийг үүсгэж байна.

Хэдхэн жилийн өмнө Улаанбаатар Өвөрхангайн зам засагдахад баруун тийшээ хэдэн зуун зэрэгцээ шороон зам үүсэж байсныг бид мэднэ. Тэгвэл Улаанбаатар Дарханы зам уул, толгод, жалга, дов, голын хөндий, огцом эргэлтүүд ихтэйгээрээ онцлогтой. Одоогоор энэ замын ажил эхэлснээс хойш хичнээн автомашин осолдож гэмтсэн, хичнээн хүний амь эрсэдсэн, гэмтсэнийг хэлж мэдэх юм алга. Замын нөхцөл үнэхээр хүнд байна.

Баярмагнай генерал-н зураг.

Энд хөндөгдөх ёстой нэг гол асуудал нь Улаанбаатар Дархан хотын хоорондох зам зөвхөн 2 хотын хоорондох зам бус Олон улсын ачаа тээврийн гол зам гэдгийг бодолцох ёстой байв. Хилийн гааль, шалган нэвтрүүлэхээр гарч буй ОХУ-ын ачааны хүнд даацын автомашинуудын жолооч нарын амнаас гарч буй үг нь яаж Дарханаас Улаанбаатар хүрэх тухай л яриа зонхилж байна.

Зарим эх сурвалжаас сонсоход ачааны автомашинууд борооны үеэр шаварт сууснаас болж ачиж явсан хүнсний бараа, бүтээгдэхүүн муудах эрсдэлд хүрсэн тухай байв. Нийгмийн сүлжээгээр ч оросын жолооч манай зам засварын ажлын талаар хэрхэн бухимдан ярьж байсныг харсан л байх. Зам, засварын ажлыг заавал замыг нь бүхлээр нь хааж гүйцэтгэдэг учир нь юунд байна аа? Ард иргэддээ ажил хийж байгаагаа мэдрүүлэх гэсэн юм уу эсвэл ажил хийж огт мэддэггүй юм уу?

Баярмагнай генерал-н зураг.

Хөрш ОХУ-ын нутагт нэвтрээд л зам засварын ажил жинхэнэ утгаараа хэрхэн явагддагийг манай улсын энэ талын ажил хариуцсан яам, агентлаг, гүйцэтгэгч байгууллагууд очоод нэг үзчихээсэй билээ дээ. Энэ жил Хиягтаас Улаан Үүд, Улаан Үүдээс Эрхүү хот хүртэлх замд хэд хэдэн зам засварын ажил гүйцэтгэж байгаа бөгөөд замыг бүхэлд нь хаалгүйгээр 10 орчим км-ээр хэсэгчлэн засварлах, эсвэл бүр шинэ зам, шинээр гүүр тавьж байгаа бөгөөд замын нэг талын урсгалыг чөлөөтэй нэвтрүүлэн, нөгөө урсгалыг нь засварлах байдлаар ажлыг гүйцэтгэх юм.

Дараа нь эхний засварласан урсгалаар хөдөлгөөнийг нэвтрүүлж, нөгөө урсгалыг нь засварлаж байна. Замыг нь бүхэлд засварлаж дуусаад тэмдэг тэмдэглэгээ, замын шугамуудыг тавих ажээ. Ийм байдлаар замын хөдөлгөөнд саад болохгүй, зорчигчидоо бухимдуулахгүй, зам тээврийн элдэв ослоос иргэдээ хамгаалах байдлаар ажил гүйцэтгэдэг болохыг энэхүү ойрын жишээ харуулах бизээ. Дээр нь нэмж хэлэхэд тэд (ОХУ) манайх шиг талхан дээр масло түрхэж байгаа юм шиг зам дээрээ асфальтаар хучдаггүй юм байна. Харин Сэлэнгийн Хемелийн талх шиг нүнжигтэй зузаан асфальт тавьдаг юм билээ.

Баярмагнай генерал-н зураг.

Урагшгүй ноёнд ухаангүй зарц гэж Ерөнхий сайдын ойр ойрхон телевизийн дурангийн өмнө чанга дуугаар хэлээд байгаа “Ажил хийж чадахгүй бол ажлаа өгөөд зайл” гээд байгаа хүмүүс нь өөрийнх нь намын томилгоотой хүмүүс юм шүү дээ. Жинхэнэ мэргэжлийн чадварлаг хүмүүс нь тэдний доор ар өврийн хаалгагүй, намын харъяалалгүй, салбартаа үнэнчээр зүтгэн өдийг хүрсэн жирийн төрийн албан хаагчид л байдаг юм.

АН, МАН аль ч нам нь гарсан ялгаагүй сонгуулийн дараа намын харъяалалтай хүмүүсийг хуугаар нь халж, намын харъяалалтай хүмүүүсээ хуугаар нь томилдогийг надаар хэлүүлэх юун. Уг нь мэргэжлийн чадварлаг хүмүүсээр яам, агентлаг, түүний доорх газар, хэлтсээ удирдуулбал улс орны хөгжил өөрөө өндийгөөд босоод ирэх юм.

Баярмагнай генерал-н зураг.

Төгсгөлд нь хэлэхэд Монгол Улсад зам тээврийн ослоор нас барж буй иргэдийн тоо дэлхийн халуун цэг Ирак, Афганистанд зэвсэгт халдлагын улмаас амь насаа алдаж буй энгийн иргэдийн тооноос давж байгаа нь үнэхээр харамсалтай. Хатуухан хэлэхэд урьдчилан сэргийлж болох аливаа эрслээс болж эрдэнэт хүний амь нас эрсэдвэл түүний хариуцлагыг төр үүрэх ёстой.

Энэ өвлийг бид яаж шуухан давна даа ...

Бэлтгэл хошууч генерал Б.Баярмагнай

2019.09.15

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.