Израиль барьцаалагчдыг суллаж дуустал Газын зурвасыг цахилгаан, ус, түлшээр хангахгүй

Twitter Print
2023 оны 10-р сар 12-нд 13:50 цагт
Мэдээний зураг,

Израилийн агаарын цохилтын улмаас Газын зурваст амиа алдсан болон шархдсан иргэдийн тоо нэмэгдсээр байна.

Палестины эрх баригчдын мэдээлж байгаагаар Газын зурваст 1100 гаруй хүн амь үрэгдээд байгаа ба Газын зурвасын эмнэлгүүдийн ачаалал огцом нэмэгджээ.

Түүнээс гадна Израилийн зүгээс Газын зурвасын бүх хангамжийг зогсоож, цахилгаан эрчим хүчээр хангахаа больсонтой холбоотойгоор Газын зурвасын эмнэлгүүд ойрын өдрүүдэд цахилгаан эрчим хүч, эм тариа, мэс ажилбарын багажгүй болох эрсдэлд оржээ.

Газын зурвасын хамгийн том эмнэлэг болох Аль Шифа эмнэлгээ 3 өдөр цахилгаан эрчим хүчээр хангах хэмжээний л түлштэй үлджээ. Хил хязгааргүй эмч нар олон улсын байгууллагаас мэдээлснээр тус байгууллагын Газын зурваст хариуцан ажиллуулдаг хоёр ч эмнэлгийн мэс заслын багаж төхөөрөмж, антибиотик болон эрчим хүчний үүсгүүртээ хийх түлш дуусаж байгаа аж. Палестины Улаан хавирган сар нийгэмлэг бусад эмнэлгүүдийн цахилгаан эрчим хүчний үүсгүүрүүдийн түлш дуусаж, ойрын 5 хоногт зогсох эрсдэлтэй байгааг онцолжээ.

Египет улс болон олон улсын хүмүүнлэгийн байгууллагууд Газын зурвас руу хүмүүнлэгийн тусламж илгээх боломж гаргаж өгөхийг уриалж байгаа ба түлш болон хүнс ачсан ачааны машинуудын цуваа Египетийн Газын зурвастай хиллэдэг хэсэгт Газын зурвас руу орж чадахгүй, гацсан байдалтай байна.

Израилийн агаарын цохилтонд Газын зурвасын 7 эмнэлэг, НҮБ-ын орогнох 10 байр тус бүр өртсөн байна. Газын зурвас дахь Бэйт Ханунд байрлах томоохон эмнэлэг агаарын цохилтонд өртсөнөөс болж цаашид үйл ажиллагаа явуулах ямар ч боломжгүй болсон байна.

НҮБ-ын мэдээлснээр Израилийн агаарын цохилтоос болж 338 мянга гаруй хүн орон гэрээ орхиход хүрчээ. Эдгээр хүмүүсийн 220 мянга орчим нь буюу 2/3 нь НҮБ-ын Палестины дүрвэгсдийг дэмжих агентлагийн ажиллуулдаг сургуулиудад байрлаж байгаа бол 15 мянга нь Палестины эрх баригчдын хариуцсан сургуулиудад, 100 мянга гаруй нь ойр дотныхон, хөршүүдийнхээ гэрт, сүм болон бусад байгууллагуудад орогнож байна.

Израилийн агаарын цохилтын улмаас НҮБ-ын Палестины дүрвэгсдийг дэмжих Ойрх Дорнодын агентлагийн 11 ажилтан амиа алдсаны зарим нь гэр бүлийн гишүүдийн хамт амь үрэгдсэн байна. Түүнчлэн Улаан хавирган сар нийгэмлэгийн 5 ажилтан амиа алдсаны 4 нь Газын зурваст, 1 нь Израильд амь үрэгджээ.

Энэ сарын 7-нд Палестины ХАМАС бүлэглэл Израиль руу довтолж, тус улсын хилийн бүс нутагт нэвтэрч, замдаа таарсан иргэдийг хөнөөж, заримыг нь барьцаалсан юм. Үүний хариуд Тель Авив Газын зурваст агаараас цохилт үзүүлж эхэлсэн юм.

Сүүлийн үеийн мэдээгээр ХАМАС бүлэглэлийн халдлагын улмаас Израильд 1200 гаруй хүн амь үрэгдээд байна.

Эх сурвалж: BBC 

Содномцэрэнгийн Энхзаяа 

mongolcom.mn 

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.