Ц.Мөнхтөр: Засгийн газар өөрөөсөө эхлэн хэмнэлт хийж, төсөвт үүссэн хүндрэлийг давна

Өчигдөр буюу энэ сарын 15-ны өдөр Засгийн газрын ээлжит хуралдаан болсон. Энэхүү хуралдааны үеэр хэлэлцэж, баталсан асуудлуудын талаар Ерөнхий сайдын Хэвлэл мэдээллийн төлөөлөгч, Олон нийттэй харилцах асуудал эрхэлсэн зөвлөх Ц.Мөнхтөртэй ярилцлаа.

-Засгийн газрын хуралдаанаар хэлэлцсэн голлох асуудлууд юу байв?

-Хуралдаанаас гурван асуудлыг онцолж байна. Эхнийх нь яам, агентлагуудын бүтэц, орон тооны хязгаарыг шинэчлэн баталлаа. Монгол Улсын их хурлаас 2015 оны төсвийг баталсантай холбогдуулан 2014 оны арваннэгдүгээр сарын 14-ний өдрийн 70-р тоот тогтоолоор Засгийн газрын болон төрийн захиргааны төв байгууллагын бүтэц, орон тоог боловсронгуй болгохыг үүрэг болгосон. Үүний дагуу төрийн захиргааны байгууллагын чиг үүргийн давхардлыг арилгах, удирдлагын шат дамжлагыг цөөлөх, төрийн зарим чиг үүргийг мэргэжлийн холбоод, хувийн хэвшилд шилжүүлэх зарчим баримтлан Засгийн газрын 15 яам, 26 агентлаг, ЗГХЭГ-ын орон тоог 15 хувиар цөөрүүлэхээр тогтлоо.

-Бүтэц, орон тооны зохион байгуулалтыг хийхдээ юуг голлон анхаарах вэ?

-Засгийн газраас тогтоосон орон тооны хязгаарт багтаан дээрх байгууллагуудын дотоод нэгжийг зохион байгуулахдаа мэргэшсэн төрийн албан хаагчдыг халж, солихгүй байхаас гадна хэд хэдэн чиглэл баримтлахыг Засгийн газрын гишүүдэд даалгасан. Үүнд нь Засгийн газрын үйл ажиллагааны залгамж чанарыг хадгалах, яам, агентлагийн газар, хэлтэс орлогч даргагүй, бүтцийн нэгжүүдийн чиг үүрэг давхардалгүй, илүү шат дамжлагагүй байх, нэгтгэгдсэн, татан буугдсан яам, агентлагаас шилжиж ирсэн орон тоог мэргэжил, мэргэшлийн дагуу байршуулах, Засгийн газрын агентлаг 100-гаас дээш ажилтантай бол дэд дарга, эсвэл орлогч дарга нэгтэй, 100-гаас доош ажилтантай бол дэд буюу орлогч даргагүй байх, агентлагийн газар нь дотроо хэлтэсгүй, хэлтэс нь дотроо тасаг, албагүй, нэгжийн орон тоог 7-гоос багагүй, дунджаар 10 байх чиглэл баримтлах, агентлагийн дарга нь зөвлөхгүй байх, албан ажилдаа жижиг оврын автомашин хэрэглэх, дэд болон орлогч дарга, нэгжийн дарга нар албан ажлын автомашин хэрэглэхгүй байхаар шийдвэрлэсэн.

Ер нь Засгийн газар өөрөөсөө эхлэн хэмнэлт хийж, төсөвт үүссэн хүндрэлийг давахад чиглэсэн энэ бодлого цаашид төрийн албыг цомхон, чадварлаг мэргэжлийн болгоход дэмжлэг үзүүлнэ гэж Засгийн газар үзэж байна.

-Шилэн дансны тухай хууль ирэх нэгдүгээр сарын 1-нээс хэрэгжиж эхлэхтэй холбогдуулж Ерөнхий сайд ямар үүрэг даалгавар өгсөн бэ?

-Монгол Улсын Ерөнхийлөгчийн санаачилсан Шилэн дансны тухай хуулийг Улсын Их Хурал 2014 оны 7 дугаар сарын 1-ний өдөр баталсан. Энэ хууль 2015 оны нэгдүгээр сарын 1-ний өдрөөс мөрдөгдөж эхлэх бөгөөд хуулийн дагуу улс болон орон нутгийн төсөв, худалдан авах ажиллагааны төлөвлөгөө, санхүүгийн тайлан, дараа оны төсвийн төсөл зэргийг олон нийтэд ил тод мэдээлнэ. Ингэхдээ шилэн дансны нэгдсэн нэг цахим хуудастай байж, хуудсыг санхүү, төсвийн асуудал эрхэлсэн төрийн захиргааны төв байгууллага эрхлэн хөтлөх юм.

Мөн шилэн дансны тухай хуульд Засгийн газар цахим хуудсанд тавигдах нийтлэг стандарт, агуулга, мэдээлэл тавих журам, хэлбэрийг тогтоохоор заасны дагуу “Шилэн дансны цахим хуудсанд тавигдах мэдээллийн агуулга, нийтлэг стандартыг тогтоох тухай журам”-ыг баталлаа. Журам батлагдсантай холбоотойгоор сургалтын гарын авлагыг бэлтгэж, төсвийн ерөнхийлөн захирагч нарт сургалт явуулах, байгууллага бүр Үндэсний Дата төв УТҮГ-аас гаргасан жишиг шилэн дансны цэсийг өөрийн цахим хуудсандаа холбох, цахим хуудасгүй байгууллагуудын шилэн дансны мэдээллийг шилэн дансны нэгдсэн цахим хуудаст оруулах боломжийг бүрдүүлэх зэрэг ажлыг 2014 оны 12 дугаар сарын 25-ны өдрийн дотор зохион байгуулахыг холбогдох сайд, дарга нарт даалгасан.

-Энэ хууль хэрэгжсэнээр ямар давуу тал үүсэх вэ?

-Энэ хууль хэрэгжсэнээр төсөв, санхүүгийн ил тод, нээлттэй байдлыг хангасан эрх зүйн нэгдмэл орчин бүрдэж, татвар төлөгчдийн хөрөнгө болон төрийн өмчийн хөрөнгийг үр ашиггүй зүйлд захиран зарцуулах байдал тодорхой түвшинд буурна гэж үзэж байгаа.

-Мянганы сорилтын сан манай улсад дахин төсөл хэрэгжүүлэх үү?

-Монгол Улсын Ерөнхий сайд Ч.Сайханбилэг АНУ-ын Мянганы сорилтын сангаас Монгол Улсад дахин төсөл хэрэгжүүлэх болсон талаар танилцуулсан. Иймд энэ төсөлд хамрагдаж болох салбартаа нэн шаардлагатай төслийн саналыг боловсруулан Засгийн газрын дараагийн хуралдаанд танилцуулахыг Засгийн газрын гишүүдэд үүрэг болгосон.

Э.Гүнтөмөр

Энэ мэдээ танд таалагдаж байвал LIKE хийгээрэй. Танд баярлалаа.