Пүүжээ хэмээх малчин охины гунигт амьдралын түүх

Японы “WOPLD JAPAN” нэвтрүүлгийн хөтлөгч, нэрт найруулагч, хөтлөгч Сэкио Ёошимура Монголын хөдөө нутгаар аялж явахдаа санамсаргүйгээр зургаан настай Пүүжээ болон түүний гэр бүлийнхэнтэй  таарч, тэдний өдөр тутмын амьдралын хүнд бэрхийг камертаа буулган авчээ.

Түүнээс хойш жил бүр Пүүжээгийнд очиж, түүний дүрээр Монголын нийгмийн эмзэг, халшрам амьдралын нэгэн төрхийг ямар нэгэн нэмэлт хачиргүйгээр буулган, баримтат кино хийсэн байна. Кино 2006 оны Азийн наадам, 2009 онд Парисын кино наадамд түрүүлж байсан юм.

Баримтат кинонд эгэл малчин охин Пүүжээгийн дөрвөн жилийн амьдрал гарах бөгөөд эцэстээ Пүүжээтэй дахин уулзах боломжгүй болон төгсдөг билээ.

Пүүжээгийнх 600 гаруй бог, 30 гаруй тооны адуутай хөдөөдөө бол боломжийн л малтай айл. Харин хот орж сайхан амьдрал хайн одсон аав нь эзгүй болохоор эр хүнгүй айлын амьдрал нэг л ханхай хоосон харагдана. Хүнд хэцүү өвөл үргэлжилж олон мал нь осгож, бээрч үхсэн үзэгдэнэ.

Хамгийн гол нь хөгшин эхдээ түшиг болж адуу малтай эгээ л эр хүн шиг ноцолдон гэрт орж эм, гадаа гарч эр хүн болж явсан Пүүжээгийн ээж залуухан эмэгтэй Сэкио Ёошимура найруулагчыг нэг жилийн дараа тэднийг эрж сурсаар очиход мориноосоо унаад өнгөрчихсөн байдаг.

Настай ээж нь хадгаар бүтээсэн зургийг нь заагаад “Хөөрхий минь мориноос унаад ийм болчихсон шүү дээ” хэмээн нулимсаа арчиж байгаа хэсэг Монголын хөдөө нутгийн эмгэнэлтэй дүр зургийг үүнээс илүүгээр яаж ч гаргах билээ дээ гэж өөрийн эрхгүй санагдуулна.

Энэ киноны хамгийн оргил хэсэг нь хоёр гурван жилийн дараа Япон найруулагч Пүүжээ охиныг сурсаар Төв аймгийн Баянчандмань суманд очиход хичээлээ тараад зам хөндлөн гарч явсан 12-хон настай тэр охин машинд дайруулан харамсалтайгаар өнгөрсөн тухай өгүүлдэг хэсэг нь юм.

Төрсөн охиноо туйлын харамсалтайгаар хорвоогоос буцаасан хөөрхий настай эх байгалийн аймшигт хүчний өмнө гар мухардан ихэнх малаа барчихаад сумын төв бараадсан нь сэргэлэн жаахан ач охиноосоо хагацах шалтгаан болжээ. Харь элгийн хүний нүдээр Монголын хөдөө нутгийн үнэн бодит амьдралыг буулган үлдээсэн баримтат киноны өрнөл иймэрхүү л бараан дүрслэлтэй.

 

Энэ мэдээ танд таалагдаж байвал LIKE хийгээрэй. Танд баярлалаа.