298 хүний амийг авч одсон онгоцны осолд буруутай 3 этгээдэд ял оноолоо

Нидерландын шүүх 2014 онд Украины дээгүүр нисэж байсан Malaysia Airlines компанийн зорчигч тээврийн онгоцыг пуужингаар харван унагаж, тус онгоцонд байсан 298 хүний үхэлд буруутай этгээдүүдийг тогтоож, ял оноожээ.

Нидерландын шүүх MH-17 зорчигч тээврийн онгоцыг осолдоход хүргэсэн ОХУ-д үйлдвэрлэсэн пуужинг, ОХУ-аас тээвэрлэн авчирч, оросуудын хяналтанд байдаг зэвсэгт групп харвасан болохыг тогтоожээ.

Шүүх уг хэрэгт ОХУ-ын 2, Украины 1 иргэнийг буруутайг тогтоон, насаар нь хорих ял оноосон бол хэрэгт шалгагдаж байсан ОХУ-ын 3 дахь иргэнийг буруугүй гэж үзжээ.

Malaysia Airlines компанийн Боинг 777 зорчигч тээврийн онгоцны ослоор амь үрэгдэгсдийн гэр бүл, ойр дотныхон 8 жилийн өмнө дэлхийн улс орнууд ОХУ-ын эсрэг хатуу байр суурьтай зогссон бол Украинд болж байгаа дайн, геополитикийн тогтворгүй байдлаас зайлсхийх боломжтой байсан гэж үзэж байгаа юм.

Нидерландын шүүгчид зорчигч тээврийн онгоцыг харван унагах нь санаатай үйлдэл байсан гэж үзсэн байна.

Бүгд Найрамдах Донецк Ард Улсын Батлан хамгаалахын сайд Игорь Гиркин нь MH-17 онгоцыг оносон пуужинг байршуулж, ОХУ-аас тусламж хүссэн, Сергей Дубинский нь Бук пуужингийн системийг тээвэрлэлтийг хариуцаж, хяналт тавьж байсан, Леонид Харченко Бук пуужингийн системийг хариуцан ажиллуулж, Сергей Дубинскийн өгсөн тушаал зааварчилгаагаар ажиллаж байсныг шүүхээс тус тус тогтоожээ.

Нидерландын шүүх дээр Олег Пулатовыг өмгөөлөгч төлөөлж байсан ба шүүгчид түүнийг Бук пуужингийн талаар мэдэж байсан ч буруугүй хэмээн үзжээ. 2014 оны 7-р сарын 17-нд Malaysia Airlines иргэний агаарын тээврийн компанийн Амстердамаас Куала Лумпур чиглэлд нисэж байсан MH-17 онгоцонд 298 хүн зорчиж явсан ба тэдгээрийн дотор 80 хүүхэд, нислэгийн багийн 15 гишүүн байв.

Пуужинд оногдох үед онгоц Украины дээгүүр 10 мянган метрийн өндөрт нисэж байсан аж. Тухайн үед Орос-Украины зөрчилдөөн дөнгөж эхэлж байсан ба Украины тал 9700 метрээс доошхи агаарын бүсээ хаасан байжээ. Гэсэн ч олон улсын чиглэлийн онгоцнууд Украины дээгүүр ниссээр байсан юм.

Малайзын онгоц Украины зүгээс тогтоосон өндрийн хязгарлалтаас дээгүүр нисэж байсан ч орон нутгийн цагаар 13:20 цагт тус онгоцтой холбоо тасарсан байна. Онгоцонд зорчиж байсан 298 хүний 196 нь Нидерланд, 43 нь Малайз, 38 нь Австрали, 10 нь Их Британийн иргэд байсан ба онгоцонд нийт 17 улсын иргэд зорчиж байжээ.

Кремлийн зүгээс уг хэрэг явдалд хамааралгүй гэдгээ удаа дараа мэдэгдсэн ба хэрэгт сэжиглэгдэж буй этгээдүүдийн аль нь ч шүүх хуралд оролцоогүй, зөвхөн Олег Пулатов Нидерландын өмгөөлөгчдөөр өөрийгөө төлөөлүүлэн оролцжээ.

Нидерландын шүүхээс буруутай нь тогтоогдсон этгээдүүд олон хүний амийг хөнөөсөн хэргийнхээ ялыг үүрэхгүй гэдэг нь тодорхой байгаа ч уг шүүх ажиллагаа нь түүхэнд тэмдэглэгдэн үлдэж, амиа алдагсдын гэр бүл, ойр дотныхонд өчүүхэн ч гэсэн сэтгэлийн амар амгаланг мэдрүүлнэ хэмээн ажиглагчид үзэж байна.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.