Мьянмарын арми Хүүхдийг Ивээх Сангийн хоёр ажилтныг хөнөөжээ

Twitter Print
2021 оны 12-р сар 30-нд 16:26 цагт
Мэдээний зураг,

Олон улсын Хүүхдийг Ивээх Сангаас мэдээлж байгаагаар Мьянмарын зэвсэгт хүчнээс явуулсан халдлагын улмаас тус сангийн хоёр ажилтан амиа алджээ.

Хүүхдийг Ивээх Сангаас мэдээлснээр Мьянмарын зүүн зүгийн Кая мужид 35 хүний цогцос олдсон ба Мьянмарын арми Хпрусо хотын ойролцоо зорчиж байсан автомашинуудыг зогсоон, жолооч болон зорчигчдыг баривчлан, заримыг нь хөнөөн, цогцсыг нь шатаасан аж. Мьянмарын зэвсэгт хүчин уг мэдэгдлийг үгүйсгэж байгаа юм.

Хүүхдийг Ивээх Сангаас мэдээлснээр амиа алдсан хоёр ажилтан нь хоёулаа хүүхдүүдэд боловсрол олгох ажилд зүтгэж байсныг онцлон, тус хоёр ажилтны эхнэрүүд нь төрөөд удаагүй байсан гэжээ. Тэд тус бүс нутагт хүмүүнлэгийн ажил зохион байгуулаад гэр лүүгээ буцаж явсан аж.

Хүүхдийг Ивээх Сан твиттер хуудсаараа дамжуулан НҮБ-ын Аюулгүйн зөвлөлөөс шуурхай хурал зарлаж, буруутай этгээдүүдэд хариуцлага тооцохыг шаарджээ.

АНУ-ын Төрийн нарийн бичгийн дарга Энтони Блинкен болсон явдалд Мьянмарын арми буруутай хэмээн Мьянмарын зэвсэгт хүчинд зэвсэг худалдах явдалд хориг тавьж буйгаа мэдэгджээ. Мьянмарын зэвсэгт хүчнээс мэдээлснээр өнгөрсөн баасан гарагт Мьянмарын зэвсэгт хүчний цэргүүд Кая мужийн Хпрусо хотын ойролцоо сэжиг бүхий 7 автомашин явж байхыг анзааран, машинуудыг зогсоох оролдлого хийжээ. Үүнээс болж мөргөөлдөөн үүсч, мөргөлдөөний үеэр хэд хэдэн хүн амь үрэгдсэн гэжээ.

Халдлага болсон газарт авсан гэрэл зургуудаас шатсан автомашинуудыг олж харах боломжтой ба Мьянмарын армийн эсрэг тэмцэж буй Үндэсний Батлан хамгаалахын хүчнээс мэдээлснээр Мьянмарын армийнхны гарт үрэгдсэн иргэд нь аюулгүй газар луу дүрвэж явсан энгийн иргэд байжээ. Тэдний дотор олон тооны хүүхэд эмэгтэйчүүд байсан аж.

Өнгөрсөн 2-р сард Мьянмарын армийн удирдлагууд цэргийн эргэлт зохион байгуулж, төрийн эрхэнд гарснаас хойш Мьянмар даяар олон тооны эсэргүүцлийн жагсаал цуглаан өрнөсөн билээ. Мьянмарын цэргийн удирдлагууд ардчиллын төлөө тэмцэгч Аун Сан Су Чи болон Үндэсний Ардчиллын Төлөө Лиг намын гишүүдийг баривчилсан юм.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.