Энэтхэгт далан нурж 7 хүн амь үрэгдэн, 170 хүн сураггүй алга болоод байна

Twitter Print
2021 оны 02-р сар 08-нд 12:11 цагт
Мэдээний зураг,

Өнгөрсөн ням гарагт Энэтхэгийн хойд зүгт байрлах Уттараханд мужид Хималайн нуруунаас их хэмжээний цасан нуранги гол руу унаснаас болж Ришиганга УЦС-ын далан нурж багадаа 7 хүний амь үрэгдэж, 170 хүн сураггүй алга болоод байна. Сураггүй алга болсон иргэдийн дийлэнх нь тус бүс нутагт байрлах хоёр усан цахилгаан станцын ажилчид аж.

Эрх баригчид гамшигт өртсөн бүс нутаг руу хэдэн зуун цэргүүд, эмнэлгийн ажилчид болон цэргийн нисдэг тэргүүдийг илгээгээд байна. Одоогийн байдлаар аврагчид нурангин доороос 16 хүнийг эсэн мэнд гаргаж аваад байгаа ба хонгилд гацсан 30 хүнийг гаргаж авахаар ажиллаж байгаа аж. Цагдаагийн газраас мэдээлж байгаагаар уулнаас буусан цасан нуранги Даулиганга гол руу унаж, хүчтэй давалгаа үүсгэсэн нь далан нурах шалтгаан болжээ. Аврах багийнхан бүс нутагт байрлах хэдэн арван тосгонуудын иргэдийг нүүлгэн шилжүүлээд байна. Хималайн нуруунаас баруун зүгт байрлах Уттараханд мужид үер болон хөрсний нуралт элбэг тохиолддог ба 2013 оны 6-р сард тус бүс нутагт болсон их үерийн улмаас 6000 орчим хүн амиа алдаж байсан билээ.

Энэтхэгийн Ерөнхий сайд Нарендра Моди Уттараханд мужид болж буй үйл явдлыг сайтар ажиглаж, мужийн удирдлагуудтай тогтмол холбогдож, нөхцөл байдал, аврах ажиллагааны тухай мэдээллийг авч байгаа тухайгаа өөрийн твиттер хуудаснаа бичжээ. Улс орны тэргүүнүүд Уттараханд мужид болсон үйл явдалд харамсч буйгаа илэрхийлэн, амиа алдагсдын гэр бүл, ойр дотныхонд эмгэнэл илэрхийлсээр байна.

Уттараханд мужид үүссэн нөхцөл байдалтай холбоотойгоор байгаль хамгаалах байгууллагууд Хималайн нурууны орчмын цахилгаан станцуудын төслийг эргэн авч үзэхийг эрх баригчдаас шаардаж эхэлжээ. Мэргэжилтнүүдийн хэлж байгаагаар дээрх бүс нутагт цасан нуранги үүсэх, хөрс нурах эрсдэл өндөр байдаг аж.

Эх сурвалж: BBC

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.