А. Лукашенко Беларусь улсад халдан довтолбол ОХУ-аас аюулгүй байдлыг хангах баталгаа хүсжээ

Twitter Print
2023 оны 04-р сар 11-нд 11:11 цагт
Мэдээний зураг,

Беларусийн Ерөнхийлөгч Александр Лукашенко ОХУ-ын Батлан хамгаалахын сайд Сергей Шойгутай Минск хотод хийсэн уулзалтынхаа үеэр ОХУ-аас аюулгүй байдлын баталгаа хүссэн талаар Беларусийн БелТА агентлагаас мэдээлжээ.

А. Лукашенко С. Шойгугаас Беларусь улс гадны халдлагад өртсөн тохиолдолд Москва Беларусийг хамгаална гэсэн баталгаа хүсэж буйгаа илэрхийлсэн байна. Тэрээр өмнө нь энэ сэдвийг ОХУ-ын Владимир Путинтай уулзах үеэрээ хөндөж байсан тухайгаа дурдаж, Оросын төрийн тэргүүн түүнтэй санал нийлж, уг асуудлыг албан ёсоор хэлэлцэж, батлах нь зөв гэж үзсэн гэжээ.

А. Лукашенко, "ОХУ-ын Ерөнхийлөгч В. Путин Беларусь улс гадны түрэмгийлэлд өртсөр тохиолдолд ОХУ Беларусийг яг л өөрийн газар нутаг мэт хамгаална гэсэн утгатай юм ярьсан. Бидэнд яг ийм л аюулгүй байдлын баталгаа хэрэгтэй байна." хэмээн онцолжээ.

Өнөөдрийн байдлаар Минск ОХУ-ын цэргүүдийг нутаг дэвсгэртээ байршуулж байгаа, ОХУ анх Украинд "цэргийн тусгай ажиллагаа" явуулах үед дэмжлэг үзүүлэхээ илэрхийлж, Оросын армид Беларусийн нутаг дэвсгэрээр дамжин Киев руу довтлох боломж олгосон билээ.

Өнгөрсөн оны сүүлээр талууд цэргийн хамтарсан сургуулилт явуулж, ОХУ-ын төрийн дээд албан тушаалтнууд ар араасаа Минскт айлчилсан явдал нь Беларусь ОХУ-ын Украинд явуулж буй дайнд нэгдэнэ гэсэн таамаглал дэвшихэд хүргэсэн юм.

Нөгөө талаас Ерөнхийлөгч А. Лукашенко үүнийг удаа дараа үгүйсгэсэн ч Беларусийн нутаг дэвсгэрт халдсан эсвэл үймээн самуун үүсгэх гэж оролдсон тохиолдолд Минск хатуу арга хэмжээ авах болно гэдгийг анхааруулсан билээ.

Эх сурвалж: BBC

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.