ОХУ-ын Ерөнхийлөгч В. Путины Энэтхэгт хийх айлчлал дэлхийн улстөрд ямар нөлөө үзүүлэх вэ

Twitter Print
2021 оны 12-р сар 06-нд 12:15 цагт
Мэдээний зураг,

ОХУ-ын Ерөнхийлөгч Владимир Путин энэ даваа гарагт Энэтхэг улсад айлчлах юм. Хүйтэн дайнаас хойш өнөөдрийг хүртэл болж өнгөрсөн олон үйл явдал, өөрчлөлт шинэчлэлтийн аль нь ч хоёр улсын нөхөрсөг харилцаанд нөлөө үзүүлж чадаагүй гэдгээрээ онцлог бөгөөд уг харилцааг тогтвортой авч явж байгаа нь Ерөнхийлөгч В. Путины амжилтуудын нэгд тооцогддог юм. Зэвсэгт хүчний томоохон гэрээ хэлэлцээрүүд, хоёр улсын худалдаа, нөхөрсөг гар барилт, Ерөнхий сайд Нарендра Модигийн нэрийн хуудас болсон тэврэлтүүдээс гадна хоёр улсын төрийн тэргүүнүүд хоёр улсын харилцаанд тулгамдсан хэд хэдэн асуудлуудыг хэлэлцэхээр төлөвлөжээ.

АНУ-Энэтхэгийн харилцаа өнгөрсөн 10 жилд сайжирч, 2020 онд АНУ-ын Ерөнхийлөгч Доналд Трамп Энэтхэгт айлчилсан зэрэг явдал нь ОХУ-д тулгараад буй асуудлуудын нэг болоод байгаа билээ.

Москва-Вашингтоны харилцаа сүүлийн жилүүдэд муудаж, Вашингтон Москвагийн эсрэг олон тооны хориг арга хэмжээ тогтоосон ба Москва Делийг АНУ, Япон, Австралийн хамтаар Энэтхэг-Номхон далайн бүсийн аюулгүй байдлыг хэлэлцэх Аюулгүй байдлын дөрвөн талт хэлэлцээр буюу Quad-д нэгдсэн явдлыг буруушааж буйгаа илэрхийлж байсан билээ.

ОХУ-ын Гадаад харилцааны сайд Сергей Лавров тухайн үед "Барууны орнууд Энэтхэг-Номхон далайн бүсийн стратегийн нэрийн дор Энэтхэг улсыг Хятадын эсрэг бодлогодоо татан оролцуулж байна." хэмээн мэдэгдэж байсан юм. Вашингтон-Бээжингийн харилцаа сүүлийн жилүүдэд мөн адил хурцадсан ба энэ нь Бээжин-Москвагийн харилцаа зузаарах шалтгаан болсон гэж хэлж болох юм.

Нөгөөтэйгүүр Бээжин-Делигийн харилцаа сүүлийн жилүүдэд хурцадмал байгаа ба өнгөрсөн сард л гэхэд хоёр улсын хилийн цэргүүд хоорондоо мөргөлдөж, Энэтхэгийн 20 цэрэг амиа алдсан юм. Хятадын талаас уг мөргөлдөөний улмаас цэргүүд нь амиа алдсан гэдгийг хүлээн зөвшөөрсөн ч тоог нь хэлэхээс нь татгалзжээ.

Хоёр улсын хувьд хэд хэдэн салбарт хамтран ажиллах боломж байгаагийн нэг нь Афганистан юм. Энэтхэг Афганистанд нөлөөтэй хэвээр байхыг эрмэлзэж байгаа ч Энэтхэгийн гол өрсөлдөгч болох хөрш Пакистан улсын Афганистан дахь стратегийн нөлөө Энэтхэгээс илүү болсон бөгөөд Пакистан улс ОХУ, Иран, БНХАУ-тай албан бус эвсэл байгуулаад байгаа аж.

Москва Делид Афганистан дахь нөлөөгөө сэргээхэд туслах боломжтой бөгөөд хоёр улс Афганистаны ирээдүйд адил санаа зовниж байгаа юм. Хоёр улсын төрийн тэргүүнүүдийн уулзалтын чухал арга хэмжээнүүдийн нэг нь ОХУ пуужин устгах С-400 системээ Энэтхэг улсад хүлээлгэн өгөх явдал юм. С-400 нь "газраас агаар" ангилалдаа дэлхийд тэргүүлэх систем бөгөөд 400 км радиуст дараалан 80 байг буюу нэг зэрэг 2 пуужинг устгах чадалтай юм.

Уг систем нь Энэтхэгийн БНХАУ болон Пакистаныг заналхийлэх батлан хамгаалах салбарын стратегийн гол зэвсэг болж байгаа ба энэ шалтгаанаар Энэтхэг АНУ-ын эсэргүүцэл, сүрдүүлгийг үл харгалзан ОХУ-аас уг системийг худалдан авсан юм. Энэтхэг улс нь дэлхийн зэвсгийн хамгийн том экспортлогч бөгөөд дэлхийн батлан хамгаалах салбарт хийгдэж буй худалдааны 10 орчим хувийг дангаараа эзэлдэг байна.

Москва Энэтхэгийн хамгийн том зэвсэг нийлүүлэгч хэвээр байгаа аж. Вашингтоны хувьд 2011-2015 оны хооронд Энэтхэгийн хоёр дахь том зэвсэг нийлүүлэгч байсан бол 2016-2021 онд энэ үзүүлэлтээрээ Франц болон Израилийн ард бичигджээ.

Вашингтон Энэтхэгт зэвсэг нийлүүлэлтээ нэмэгдүүлэх хүсэлтэй байгаа ба энэ нь Энэтхэгийн хувьд давуу тал болоод байна. ОХУ-ын хувьд мөн ялгаагүй зэвсгийн экспортоо нэмэгдүүлэх зорилго тавьж байгаа ба энэ удаагийн айлчлалын үеэр энэ тал дээр томоохон гэрээ хэлэлцээрүүд хийгдэнэ гэсэн хүлээлттэй байна.

Хоёр улсын худалдааны хувьд хүлээлтээс доогууо байгааг мэргэжилтнүүд онцолж байна. 2019 онд буюу цар тахлаас өмнө хоёр улсын худалдааны эргэлт 11 тэрбум ам. доллар хүрсэн ба үүний 7.24 тэрбумыг ОХУ-ын экспорт эзэлж байсан бол АНУ-Энэтхэгийн худалдааны эргэлт тухайн жилдээ 146 тэрбум ам. долларт хүрч байжээ. Тиймээс хоёр улс худалдааны эргэлтээ 30 тэрбум ам. долларт хүргэх зорилго тавьж, боловсрол, цахим аюулгүй байдал, сэргээгдэхтэрчим хүч зэрэг олон салбарт хамтарч ажиллахаар төлөвлөөд байна.

Эх сурвалж: BBC

Содномцэрэнгийн Энхзаяа 

mongolcom.mn

 

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.