Эх орондоо тавтай морил...

Twitter Print
2020 оны 03-р сар 15-нд 09:08 цагт
Мэдээний зураг,

Наран мандахаас жаргах хүртэл цэнхэр гаригийн улс орон болгонд тархан суусан монголчууд эх дэлхийг аюул нөмөрсөн энэ хүнд хэцүү цагт эх орныхоо зүг сарвайтал зүтгэж, санан тэмүүлж байна. Тэгэлгүй л яахав.

Тэврээд угтах эх оронтой, тэвчээрээ нэгтгэх ард түмэнтэй юм чинь эх нутагтаа хөл тавьж, ээж аавынхаа дэргэд эрсдэлтэй үеийг хамтдаа туулахыг хэн ч гэсэн хүснэ. Эх орныхоо зүг саравчлан хүлээж, санаа чилээгээд удсан иргэдээ авчрах хоёр дахь онгоц маргааш өглөө тэнгэрт хөөрнө. Туг сүлдээрээ танигдаж, төрийн дууллаараа ялгардаг туурга тусгаар Монгол Улс байна даа, хүний нутагт хүлээж суугаа иргэдээ эх оронд нь авчирна. Монгол гэхээрээ л муу, Монгол гэхээрээ л ядарсан, Монгол гэхээрээ л хоцрогдсон байх ёстой юм уу?

Сургууль соёл, ажил амьдралын эрхээр хилийн чанадад одсон монголчуудад маань өөр очих газар, тосох улс байгаа бил үү? Тиймээс ч Засгийн газар энэ асуудалд эцгийн сэтгэл, ээжийн ухаанаар хандаж буйд би хувьдаа талархаж байгаа. Солонгос, Японоос монгол иргэдээ авчрахын тулд нэгээс хоёр удаа нислэг хийх шаардлага тулгарч байгаа юм билээ. Москва, Истанбул... цаашдаа Алма-Аты... шаардлагатай нислэгүүдийг тусгай үүргийн онгоцоор хийж, иргэдээ эх оронд нь авчрахын зэрэгцээ тухайн улсад оршин суудаг, суралцдаг монголчуудыгаа хүргэх бодлого баримтална гэдгээ Ерөнхий сайд илэрхийлсэн. Нисэх баг бүрэлдэхүүн, ирсэн иргэд бүгд 14 хоног тусгаарлагдана.

Ирээд байрлах тусгаарлах өрөө, хоолны 14 хоногийн төлбөрөө өөрсдөө хийнэ. Энэ нь байрлал, наснаас шалтгаалан 420-700 мянган төгрөг байхаар зохицуулжээ. За ямартай ч гадаадын аль ч улсад суугаа иргэд маань эх орондоо ирэх хаалга ийнхүү нээлттэй боллоо. Ирэхээрээ харин үүдээ дэлгээд угтсан улс орноо, алгаа тосоод авсан ард түмнээ хүндэтгээрэй дээ. Эх орон чинь байгаагаараа угтана, сэтгэлээрээ үйлчилнэ, та нар маань харин илүү хичээгээрэй. Бид яах вэ, яг л байдгаараа, улсаараа хорионд, утгаараа монголжоод л сууж байна аа.

Дэлхий ертөнцөөр тархан суусан монголчуудынхаа өргөдөл хүсэлтэд тулгуурлан эх оронд нь ийнхүү авчрах ажлуудыг шат дараатай зохион байгуулж, шаардлагатай бол нэмэлт нислэг үйлдсээр байх тул хүлээцтэй, тэвчээртэй хандахын зэрэгцээ, оршин суугаа улсад чинь байрлаж буй Монгол Улсын элчин сайдын яам, консулд учир байдлаа таниулах, мөн Гадаад харилцааны яамны 83042222, 83052222 дугаарын утсанд хандаж болох юм байна шүү. Эх оронтой монгол хүн та эх орондоо тавтай морил!

Р.Эмүжин 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.