Дэлхийд COVID19 цар тахлын халдвар гарснаас хойш нэг жил өнгөрчээ

Twitter Print
2020 оны 12-р сар 08-нд 15:19 цагт
Мэдээний зураг,

COVID19 цар тахлын халдвар зогсохоо мэдэхгүй үргэлжилж байгаа бөгөөд 2020 оны 12-р сарын 8-ны байдлаар дэлхий даяар халдвар авсан тохиолдлын тоо 67.5 сая гарсан байна.

Тухайн үед Хятад улсын Хубэй мужийн Ухань хотын далайн бүтээгдэхүүний захаас анх тархсан гэж үзэж буй SARS-CoV-2 вирусээр өвчилсөн анхны тохиолдол 2019 ОНЫ 12-Р САРЫН 8-НЫ ӨДӨР хэмээн Дэлхийн эрүүл мэндийн байгууллагаас албан ёсоор зарлагдсан байдаг.

Эх сурвалж: https://www.who.int/.../12-january-2020-novel.../en/

Дэлхийн анхны албан ёсны тохиолдлоос хойш COVID-19 маань яг өнөөдөр "НЭГ ЖИЛ"-нхээ ойтой золгож байгаа бөгөөд шинэ коронавирусийн дэлхийд хэзээ хэрхэн яаж тархаж эхэлсэн тухай шинэ баримт мэдээллүүд аажим аажмаар ил гарч ирж байх шиг байна. COVID 19 тохиолдлууд 2019 оны 12-р сард гарч эхэлсэн гэж тухайн үед үзэж байсан. Тайлбар зураг дээрх улаан хүрэн өнгөөр тэмдэглэсэн багана нь "далайн бүтээгдэхүүний захтай холбоотой тохиолдлууд", харин цайвар цэнхэр багана нь "хамааралгүй тохиолдлууд" юм. Эндээс 12 дугаар сараас өмнө далайн бүтээгдэхүүний захтай холбоогүй олон тохиолдол аль хэдийн бүртгэгдсэн байгааг харж болно.

Эх сурвалж: https://www.ncbi.nlm.nih.gov/pmc/articles/PMC7159299/

Тэгвэл эцэст нь энэ удаагийн цар тахлын эхлэл болсон гэж үзэж байсан Ухань хотын далайн бүтээгдэхүүний зах юу болж таарах вэ? гэвэл халдварын дэгдэлтийн эхэн үед гарсан нэг ёсны кластер халдвар байсан байж гэж үзэхээр байна.

Эх сурвалж: J Clin Med. 2020 Feb; 9(2): 488. Published online 2020 Feb 11. doi: 10.3390/jcm9020488

ТЭГВЭЛ SARS-CoV-2 ВИРУС ХЭЗЭЭ ХҮМҮҮСИЙН ДУНД ТАРХСАН БАЙЖ БОЛОХ ВЭ?

Яг одоо шууд хэлэхэд "хараахан мэдэгдээгүй" байгаа хэдий ч магадгүй биднийг анх анзаарахаас нэлээд өмнө байж болохоор мэдээллүүд гараад байгаа юм.

АНУ-Д 2019 ОНЫ 12-Р САРД ДОНОРЫН ЦУСНЫ ДЭЭЖЭЭС SARS-CoV-2 ВИРУСИЙН ЭСРЭГ БИЕ?

АНУ-д COVID 19-ийн анхны тохиолдол 2020 оны 1-р сарын 19-нд бүртгэгдсэн байдаг.

Эх сурвалж: https://www.nejm.org/doi/full/10.1056/NEJMoa2001191

Үүнээс өмнө шинэ коронавирус АНУ-д нэвтэрсэн эсэхийг шалгах зорилгоор 2019 оны 12-р сарын 13-аас 2020 оны 1-р сарын 17-ны хооронд Америкийн Улаан загалмайн нийгэмлэгт хандивласан 7389 цусны дээжээс судлаж үзэхэд 106 (1.4%) дээжинд IgG эсрэгбие эерэг гарсан байсан бөгөөд нэмэлт шинжилгээнд хамрагдсан 90 дээжээс 80 нь илүү өндөр өвөрмөц саармагжсан эсрэгбие болох нь батлагдсан.

Эх сурвалж: Clinical Infectious Diseases, ciaa1785, https://doi.org/10.1093/cid/ciaa1785

Энэхүү шинжилгээнд хамрагдсан цусны дээжүүдээс SARS-CoV-2 вирусийн эсрэгбие нь Калифорни, Орегон, Вашингтон, Массачусетс, Висконсин, Айова, Мичиган, Коннектикут зэрэг нэлээд олон мужийн оршин суугчдын дээжинд эерэг гарсан байгаа юм. Энэ нь юуг хэлээд байна вэ гэхээр SARS-CoV-2 вирус зөвхөн Америкт зөвхөн тодорхой нэг бүс нутагт биш өргөн хүрээнд 2019 оны 12-р сараас 2020 оны 1-р сарын дунд үе хүртэл тархсан болохыг харуулж буй судалгааны үр дүн юм. Хугацааны хувьд шинэ коронавирусийн эсрэгбие хамгийн эрт илэрүүлсэн нь бүр 2019 оны 12-р сарын 13-аас 2019 оны 12-р сарын 16-ны хооронд цуглуулсан Калифорния, Орегон, Вашингтоны оршин суугчдаас цуглуулсан сорьц байсан аж.

Эдгээр үр дүнгээс харахад 2020 оны 1-р сарын дундуур Хятадын Ухань хотод дэгдэлт гарах үед АНУ-д огцом гэнэт ихээр биш юмаа гэхэд алаг цоог халдварын тархалт дэгдсэн байх магадлалтай юм. Мэдээж хэрэг ердийн ханиад үүсгэгч коронавирус зэрэг бусад төрлийн коронавирусийн эсрэг бий болсон эсрэгбие олж илрүүлсэн байх магадлалыг бүрэн үгүйсгэх аргагүй гэдгийг бас анзаарахгүй байж болохгүй.

ЕВРОПТ 2019 ОНЫ 12-Р САРД SARS-CoV-2 ВИРУС ИЛЭРЧЭЭ

Европийн анхны тохиолдол Италаас эхэлсэн байдаг. Италид 2019 оны 12 дугаар сард Милан, Туринаас цуглуулсан бохир уснаас SARS-CoV-2 вирус илэрсэн гэсэн мэдээлэл байна.

Эх сурвалж: https://doi.org/10.1016/j.scitotenv.2020.141711

SARS-CoV-2 вирус өвчтөнүүдийн өтгөнд бас илэрдэг болох нь тогтоогдсон байгаа бөгөөд бохирын шугамны уснаас вирус илрүүлснээр тухайн бүс нутагт халдвар тархалтыг эрт үед нь илрүүлэх магадлалтай гэж үздэг. Энэ талаар Голландын судалгааны баг хотын бохирын шугамаар урсаж байгаа бохир уснаас коронавирусийн халдвар (COVID-19) гарч байгаа болохыг илрүүлсэн судалгааны өгүүлэл нийтлүүлсэн байдаг бөгөөд судалгааны багийнхны хэлж буйгаар тус хотын эрх баригчид вирусийг албан ёсоор батлаагүй байхад хотын бохир уснаас илрүүлсэн бөгөөд энэ шинжилгээний арга нь халдварын дэгдэлтийг эрт үед илрүүлэхэд тусална хэмээн үзсэн байдаг.

2019 оны 12-р сард Италийн Милан хотын Турин хотын ус зайлуулах хоолойноос шинэ коронавирус илрүүлсэн гэж үзэх юм бол энэ цаг хугацаанд Италид аль хэдийн хүнээс хүнд шинэ коронавирусийн халдвар дамжин тархсан байсан болохыг харуулж байх магадлалтай. Түүнээс хойш Италид томоохон хэмжээний дэгдэлт гарсан бөгөөд энэ нь 2019 оны 12-р сарын халдварын тохиолдол байсан эсэх нь тодорхойгүй байгаа хэдий ч АНУ-ын адил 2019 оны 12-р сар гэхэд Италид хэзээний халдвар авсан хүмүүс байсан байж болзошгүй юм. Францад анхны коронавирусын халдвар (COVID-19)-ын гурван тохиолдол болох Парист Хятадын нэг аялагч, Бордо-д Ухань хотоос буцаж ирсэн 2 оршин суугч, 1-р сарын 25-нд бүртгэгдсэн байдаг.

Гэтэл, Францад 2019 оны 12-р сарын үед үл мэдэгдэх шалтгаантай уушгины үрэвслийн үед хадгалагдаж байсан хамрын залгиурын арчдасны дээжийг судалж үзэхэд шинэ төрлийн коронавирус илэрсэн гэсэн тохиолдол байдаг. Тухайн өвчтөн ойрын хугацаанд гадаадад аялаагүй түүхтэй байсан тул Франц дотор халдвар авсан гэж үзэж байгаа бөгөөд энэ нь 2019 оны 12-р сар гэхэд хүнээс хүнд халдвар дамжсан байж болзошгүй гэсэн үг болох нь.

Эх сурвалж: https://doi.org/10.1016/j.ijantimicag.2020.106006

Ийнхүү шинэ коронавирус гарч эхэлснээс хойш өнөөдөр яг нэг жил өнгөрч байна. Манай улсад COVID-19 тархалтын тархварзүй удалгүй ил болоосой хэмээн найдаж байна. Чухам хэзээнээс вэ? ....

Гэхдээ аль нь ч байсан иргэд бидний хувьд

- Маскаа тогтмол зүүх

- Тодорхойгүй олон хүн цугласан, битүү агааргүй орчинтой газар өндөр дуу авиа гаргаж ярьж хашгирч, дуулахгүй байхаас зайлсхийх (ялангуяа ажил дээрээ өдрийн цайны завсарлагны цагаар амралтын өрөө энэ тэр, мөн гэр орон гэх мэт орчинд)

- Гараа тогмол хичээнгүйлэн угаах нь чухал байна шүү.

О.Батгэрэл

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.