Ч.Сайханбилэг: Цаашид энэ байтугай хэмнэлтийг хийнэ

Twitter Print
2014 оны 12-р сар 04-нд 16:58 цагт
Мэдээний зураг,

УИХ-ын чуулганаар яг одоо Засгийн газрын бүтцийг хэлэлцэж байна. Ерөнхий сайд Ч.Сайханбилэг нь шинэ Засгийн газрын бүтцийг  15 яам, 19 сайдтай байхаар өргөн барьсан. Одоо гишүүд Ерөнхий сайдаас бүтэцтэй холбоотой асуудлаар асуулт асууж байна. 

УИХ-ын гишүүн Х.Тэмүүжин өөрийнх нь оруулж ирсэн Тахарын албыг буулгах асуудлыг оруулж ирсэнд шүүмжлэлтэй хандсан бол УИХ-ын гишүүн Ц.Оюунгэрэл ч мөн ССАЖЯ-ыг татан буулгаж байгааг эсэргүүцсэн юм. Мөн Цөмийн энергийн газрыг огцруулах эсэх асуудлаар "Шудрага ёс" эвслийн зүгээс эсэргүүцэн шүүмжилжээ. Ерөнхий сайдын оруулж ирсэн хуулийн төсөл байнгын хорооны гишүүдийн дургүйцлийг хүргэж нэлээдгүй эсэргүүцэлтэй тулгараад байгаа юм. 

Үүний хариуд Ерөнхий сайд Ч.Сайханбилэг "Засгийн газар үйл ажиллагаагаа явуулж эхэлмэгц энэ мэт асуудлууд тулгарах болно. Санал ч зөрөлдөнө. Бүгдээрээ асуудлыг шийдвэрлээд цааш явъя. Хэмнэлт хийх гэж ийм шийдвэрүүд гаргасан гэж ойлгож болохгүй. Өмнө нь ч Засгийн газрын бүтэц 19 сайдын дотор л явж ирсэн. ССАЖЯ-ны тухайд хамаарах салбаруудад нь л хариуцуулсан. Яахав энэ удаад Засгийн газрын бүтэц, бүрэлдэхүүнээ шуурхай шийдвэрлүүлэхийн тулд би Тахарын алба болон Цөмийн энергийн газрыг татан буулгах тухай хуулийн төслөө татаж байгаа ч нийт 57 байгууллагын асуудал яригдах болно" гэсэн хариултыг өглөө. 

Түүнчлэн “Шударга ёс” эвслийн бүлгийн дарга Н.Батцэрэг “Тэргүүн шадар сайд, Шадар сайдыг хамтарч хашихаар санал тавьсан. Бидний саналд хүндэтгэлгүй хандлаа” гэсэн бол УИХ-ын гишүүн З.Баянсэлэнгэ “АН, “Шударга ёс”  эвслийн байгуулсан гэрээ үргэлжилж байгаа. Тиймээс Шадар сайд эвсэлд байх ёстой” гэсэн байр суурьнаас чуулганы хуралдаан үргэлжилж байна. 

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.