Голын хий хуримтлагдсан үед амархан даарч бээрэх, толгой эргэх, шүдээ хавирах шинж илэрдэг

Twitter Print
2021 оны 01-р сар 28-нд 11:49 цагт
Мэдээний зураг,

Голын хийтэй хүмүүсийн зовиур нийтлэг санагдах болов. Миний уншиж ойлгосноор аорта буюу голын судас зангирч томорсонтой холбоотой юм шиг санагдсан. Амьтны гаралтай уураг иддэг хүмүүст түгээмэл эмгэг ч гэх юм билээ. Эмч биш тул анагаах талаас нь сайн тайлбарлаж мэдэхгүй юм. Өөрт мэдэгддэг шинж, өөрөө яаж аргалдаг туршлагаасаа л хуваалцаж чадах юм даа.

Бие махбодын шинж гэвэл амархан даарч бээрэх, өтгөн хатах, толгой эргэх, юм давхар харагдах, даралт их буух, зарим үед нойр хулжих, орой унтахад хөл өөрөө хөдлөөд байх, зүрхний хэмнэл алдагдах, гар хөл дараагүй байхад бадайрах, шөнө гүн нойрондоо шүдээ хавирах гэх мэт. Багаасаа бодит юм шиг тод зүүдлэдэг, одоогоороо тийм. Юмыг зөнгөөрөө мэдэрдэг. Үүнээсээ өөрөө ч гайхаж айх үе бий. Тээр жил нөхөр маань Эгиптийн аялалд охин бид хоёрыг цуг авч явсан юм. Цөл дундуур давхиж яваад үдэд нэг их цагаан өнгөтэй хад чулуутай газар бууж боож авч явсан хээрийн хоолоо идэхээр сууцгааж байлаа. Охин маань 6 настай, эрэгтэй хүүхэд шиг их хөдөлгөөнтэй хүүхэд байлаа. Нэг том чулуу бариад авахад л доор нь хилэнцэт хорхой байгаа гэсэн бодол толгойд зурсхийж бүүр нүдэнд харагдаж билээ.

Байг гэм ээ доор нь хилэнцэт хорхой байгаа гээд хэлээд байхад ноцолдсоор байгаад өргөтөл жигтэйхэн том хилэнцэт хорхой гарч ирж гүйгээд би цочиж хашгирч хажуу тийш холби үсэрч унаад хөл гараа чулуунд ураад хаяж билээ. Нөхөр маань анх миний энэ онцлогийг сайн мэддэггүй тул уурлаж аашилдаг байсан. Миний зөнгөөрөө хэлсэн юм маяг биш, би өөрөө хүссэн хүсээгүй эрхэнд нь байдгийг, мөн бодсон хэлсэн шиг минь явдал яг тохиогоод байх тусам ойлгодог болж эерэг ханддаг болсон. Голын хийг гаргаж сурах хэрэгтэй. Энгийн физиотерапины аргаар. Харин нэгмөсөн ангижирч боломгүй бие махбод, хувь заяаны нэг хэсэг юм гэдгийг эртнээс ойлгож өөрийгөө анхаарч, зан авираа залж зохицуулж амьдрах зүйтэй гэж бодно. Ийм хүнд байгалийн гал их хэрэгтэй. Гэрт зууханд түлсэн гал эсвэл хээр гадаа түлсэн ил гал. Арвайн гурил монгол элстэй хольж бараан уутанд хийж жинтүү болгоод хэвлий нуруундаа шар тос түрхэж халаасан жинтүүгээрээ халуун жин тавих.

Зайдас шиг хэлбэртэй хатуу гудсан дээр нуруугаа тааруулж хэвтээд сунгалтын дасгал хийж хэвлийд хурсан хийгээ тогтмол гаргаж сурах. Гартаа халуун чулуу, хуушуур гэх мэт халуун хоол барилах. Их хүйтэн салхитай өдөр гадуур их явахгүй байх, хүйтэн чийгнээс зайлсхийх. Сэрүүн улиралд толгой нүцгэн явахгүй, чих дарсан дулаан малгай өмсөх, энгэр заам задгайлахгүй явах. Нуруундаа долоо хоногт нэг хоёр удаа бумба тавих. Хүйтэн хоол ундаа эрс цээрлэх. Түүхий ногоо идэхгүй байх. Халуун бүлээн юм ууж зурших. Халуун элс, халуун рашаанд суувал хэвлий, энгэр заам, толгой чихээрээ салхи оруулахгүй битүүлж, хүйтэн юм, мөхөөлдөс, хүйтэн хийжүүлсэн ундаа цээрлэх хэрэгтэй. Барих ёстой гам нь энгийн юм. Гоньд гэх мэт дотор хий гаргадаг эмийн ургамалтай цай уух. Өөр нэг сайн арга бол аман хуур татаж сурах. Аман хуур татах нь зүрх, уушиг, элэг ба бөөрөнд их сайн. Зүрх амирлуулж, уушиг нээж, элэг дэвтээж, бөөр анагаах увьдастай. Төв азийн нүүдэлчин малчин ард түмэн аман хуур буюу хомус татаж ирсэн нь санаандгүй явдал биш. Хомуст их хүндэтгэлтэй ханддаг.

Анх татаж дуу авиа гаргасан цагаас өөрийн хүлэг гэж үзнэ, өөр хүний ам хүргэх байтугай гарт ч бариулахгүй. Эмэгтэй хүн биений юм ирсэн үед татахгүй ёстой. Айж цочих, давхийх, бие зарсхийх, уур хилэн бадрах, гутарч сэтгэлээр унах, уйлж унжих зэрэг сэтгэлийн сөрөг хөдлөлгүй болоход маш хэрэгтэй байдаг юм даа. Сайн тал нь эвтэйхэн залж чадвал бүтээлч чанараар шагнах эд. Голын хий тэр чигээрээ муу биш. Чарьлз Бодений толинд "голын хийтэй" гэсэн үгийг quite crazy гэж орчуулсаныг хараад их инээж билээ. Хийгээ гаргаж тайлж сурахгүй бол нээрээ л галзуу солиотой болгож мэдэхээр эд. Аргадаж аргалаж чадвал байгалийн том шан. Аюурведийн тухай буруу ойлголт их байна аа. Монголчуудыг хий дошатай гэж ярих буруу ойлголт. Голын хий хий дошатай гэсэн үг биш ээ. Гол хүнс нь малын мах, сүү, цагаан идээ болох, эрс тэрс уур амьсгалтай, маш хуурай, далайн түвшнээс ийм өндөр нутагт амьдардаг хүмүүс хий дошатай бол үр удмаа үлдээх аргагүй еэ.

Би хувьдаа монголчуудын ихэнхи нь доша нь тэгш талдаа хүмүүс гэж үздэг. Аюурведэд ийм хүнийг эрүүл хүн гэж үзнэ. Бага насандаа бадгана, дунд насандаа шар, өтөл насандаа хий дошатай байх нь эрүүл хүний шинж. Монголчууд өөрсдийгөө цөс ихтэй гэж ярьдгийг санана уу. Шар буюу пита гэсэн үг санскрит хэлний үг, "цөс" гэсэн утгатай. Цөсний шар их ялгаруулахгүй бол мах цагаан идээ өөх тос боловсруулах аргагүй. Тиймээс их хэмжээний цөснөөс болоод элгэндээ цөсний чулуу их хуримтлуулдаг, түүнээсээ болж бодисын солилцоо нь хямарч, биеийн хор гадагшлахгүйгээс үе мөч, зүрх судасны хуучтай болдог нь түгээмэл. Аорта буюу голын судас томрох нь үүнтэй шууд холбоотой санагддаг. Голын хийтэй бол сэрүүн улиралд үхрийн мах идэж болохгүй. Өвлийн цагт хонины мах нь өлзий гэдгийг анхаарвал зүгээр сэн.

Монголчууд хий дошатай хүмүүс гэж ярих нь өөрсдийгөө халуун орны ширэнгэн ой, монсун гэж борооны улиралтай, далайн уур амьсгалтай зүүн өмнөд азийн тай, кхмер, лаос камбож гэх мэт усны хүмүүс гэсэн хочтой хүмүүстэй андуурсантай адил. Ийм хүн төрөлхийн маш нарийхан зэгзгэр ястай, эмзэг хэврэг биетэй байна. Ийм монгол хаана харсан? Аорта буюу голын судас өргөссөн байгаа зураг энд хавсаргав. Энэ судас хагарахыг аортик анюризм гэнэ. Амь насанд аюултай. Дотуур их хэмжээгээр богино хугацаанд цус алдаж эндэх эрсдэлтэй. Хоол ундаа маш их тааруулж, гамнах ёстой.

Б.Алтантуяа

 

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.