Африкийн хамгийн их хүн амтай Нигери улсад коронавирусын халдвар бүртгэгдлээ

Twitter Print
2020 оны 02-р сар 28-нд 13:54 цагт
Мэдээний зураг,

Коронавирусын халдварын голомт болоод буй Хятадад энэ баасан гарагт уг вирусын халдварыг авсан 327 тохиолдол шинээр бүртгэгдсэн байна.

Ковид-19 коронавирусын халдвар авсан нийт иргэдийн тоо 83 мянгыг даваад байгаа бол уг вирусын халдварын улмаас нас барсан иргэдийн тоо 2800-д хүрчээ. Ройтерс агентлагийн мэдээлж байгаагаар сүүлийн 24 цагт коронавирусын халдвар бүртгэгдсэн улс орнуудын тоо 10-аар нэмэгдсэн ба Африкийн хамгийн олон хүн амтай Нигери улсад коронавирусын халдварын анхны тохиолдол бүртгэгджээ.

БНХАУ-аас гадна дэлхийн 46 улсад коронавирусын халдвар авсан 3700 орчим тохиолдол бүртгэгдээд байгаа ба эдгээр улс орнуудад уг вирусын халдварын улмаас 57 хүн нас бараад байна. Италид Ковид-19 вирусын халдварын улмаас нас барсан иргэдийн тоо 17 болтлоо өссөн ба коронавирусын халдвар авсан нийт 650 тохиолдол бүртгэгджээ. ХБНГУ-д коронавирусын халдвар авсан 27 тохиолдол, Францад 18, Испанид 15 тохиолдол тус тус бүртгэгдээд байна. ДЭМБ-ын Ерөнхий захирал Тедрос Гебрейесус Иран, Итали, БНСУ зэрэг улс орнууд коронавирусын халдварын дэгдэлтийг хяналтандаа авах "шийдвэрлэх үе" - дээрээ ирээд байгааг онцолжээ.

Шинэ Зеландын засгийн газар коронавирусын халдварын дэгдэлтээс урьдчилан сэргийлэх үүднээс Иран улсаас ирж буй иргэдийг хүлээн авахгүй байх шийдвэр гаргажээ. Түүнчлэн сүүлийн 14 хоногт Иранд зорчсон иргэд өөрсдийгөө бусдаас тусгаарлах шаардлагатай болохыг тус улсын Эрүүл мэндийн сайд Дэвид Кларк мэдэгдсэн байна. Иранд коронавирусын халдварын улмаас нас барсан иргэдийн тоо 26-д хүрснээр нас баралтын тоогоороо халдварын голомт болоод буй БНХАУ-ын дараа бичигдэж байна. Шинэ Зеландын Эрүүл мэндийн сайд Дэвид Кларкийн мэдэгдсэнээр Хонгконг, Япон, БНСУ, Сингапур болон Тайландаас Шинэ Зеландад ирж буй шууд нислэгүүдийн хяналт шалгалтыг чангатгах аж.

World prepares for coronavirus nigeria-н зурган илэрц

Өмнөд Солонгост баасан гарагийн байдлаар коронавирусын халдвар авсан 256 тохиолдол шинээр бүртгэгдэн, Ковид-19 вирусээр өвчилсөн нийт иргэдийн тоо 2022-д, уг вирусын халдварын улмаас нас барсан иргэдийн тоо 13-т хүрээд байна. Коронавирусын халдвар шинээр авсан тохиолдлуудын 182 нь Дэгү хотод бүртгэгдээд байна.

Korean Air компанийн зүгээс АНУ руу зорчих зорчигчдын биеийн халууныг онгоцонд суулгахаасаа өмнө хэмжиж, 37.5-аас дээш халуунтай иргэдийг онгоцонд суулгахгүй байх шийдвэр гаргасан гэдгээ мэдэгджээ. Түүнчлэн Өмнөд Солонгосын зүүн өмнөд зүгт байрлах Ульсан хот дахь Hyandai Motor үйлдвэрийн ажилчин коронавирусын халдвар авсан нь тогтоогдсон хэмээн Ёнхап агентлаг мэдээлжээ.

Эх сурвалж:Reuters

Содномцэрэнгийн Энхззаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.