Япон улсад Омикрон хувилбарын анхны тохиолдол илэрсэн талаар мэдээлжээ

Twitter Print
2021 оны 12-р сар 01-нд 08:33 цагт
Мэдээний зураг,

Мягмар гарагт коронавирусийн Омикрон хувилбарын анхны тохиолдол илэрсэн тухай Япон улсын засгийн газар мэдээлжээ.

Тус улсад Африк тивийн Намиби улсаас ирсэн 30 гаруй насны эрэгтэйгээс халдвар илэрсэн юм байна. Өвчтөнийг тусгаарлан эмчилж, ойрын хавьтлуудыг нь бүрэн тодорхойлсон тухай Японы засгийн газрын танхимын нарийн бичгийн дарга Хироказу Мацуно хэвлэлийн хурлын үеэр мэдэгджээ. Өвчтөн ямар улсын иргэн, ямар үндэстэн болохыг нууцалсан байна.

Өнгөрөгч Даваа гарагт Японы Ерөнхий сайд Фүмио Кишида коронавирусын шинэ хувилбарын халдвар бүртгэгдсэнтэй холбоотойгоор Япон улсын хилээр гадаадын иргэдийг нэвтрүүлэхгүй хэмээн мэдэгдсэн.

Уг журам өчигдрөөс буюу мягмар гарагаас хэрэгжиж эхлэсэн юм. Омикрон вирусын халдвар бүртгэгдсэн улс орнуудаас ирсэн Япон улсын иргэд Японы засгийн газраас зааж өгсөн тусгаарлах байранд 10 хоног тусгаарлагдаж байгаа ба тусгаарлалтанд байх хугацаанда 3 дахь, 6 дахь, 10 дахь өдрүүд дээрээ коронавирусын шинжилгээ өгөх аж.

Ерөнхий сайд Фүмио Кишидагийн хэлснээр Япон улсын хүн амын 76 гаруй хувь нь коронавирусын эсрэг вакцинд бүрэн хамрагдсан ба ирэх сараас коронавирусын эсрэг вакцины нэмэлт тунг хийж эхлэхээр төлөвлөжээ.

Нэмэлт тунд хамгийн түрүүнд ахмад настнууд болон эрүүл мэндийн салбарын ажилтнуудаа хамруулна гэжээ. Япон улсын хувьд бусад улс орнуудтай харьцуулахад коронавирусын халдварын тохиолдол цөөн бүртгэгдсэн ба тус улс хэдхэн долоо хоногийн өмнө гадаадын зарим иргэдийг хүлээж авч эхлээд байсан ч шинэ вирусын тархалт дахин хилээ хаахад хүргээд байна.

Омикрон вирусын халдвар Европ, Африк, Ази болон Хойд Америкт бүртгэгдээд байгаа ба улс орнууд уг вирусын голомт болсон Өмнөд Африкийн нислэгүүдийг хүлээж авахаа зогсоогоод байгаа билээ.

Үүнтэй холбоотойгоор Өмнөд Африкийн Ерөнхийлөгч улс орнуудыг ямар ч шинжлэх ухааны үндэслэлгүйгээр яаран хилээ хааж, улс орнуудын эдийн засагт ноцтой хохирол учруулж байна хэмээн буруушаажээ.

Эх сурвалж: The Guardian

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.