Татвар бүрдүүлдэг хувийн хэвшлийнхэн орлогогүй сууж, тэтгэмж, халамж, төрийн албаныхан амарсаар л байх юм уу?

Twitter Print
2021 оны 03-р сар 30-нд 15:05 цагт
Мэдээний зураг,

Бэлгийн морины явдлыг бид мэт нь асуух эрхгүй...

Иргэдээ 14 хоног хатуу хөл хорионд дахин суулгах тухай яригдаж байна. Амь тавихын наагуур байгаа хувийн хэвшлийнхэнд энэ шийдвэр яаж ч бодсон хүнд тусна. Тиймээс Улсын онцгой комисс, Засгийн газраас "14 хоногийн хөл хорионы хугацаанд вирусын эсрэг яг ямар арга хэмжээ авах гэж байна вэ" хэмээн тэд нэхэл хатуу асууж байгаа юм.

ЭМЯ-ны өнөө өглөөний мэдээгээр одоогоор нийт 280 мянган хүн эхний вакциндаа хамрагдсан, давтан хийх "Синофарм" вакцин дөрөвдүгээр сарын 10-аас эхлэх юм байна. Араас нь "Астра зенека"-гийн давтан вакцин 23-ны өдрөөс эхлэх аж. Одоогоор өдөрт 30 орчим мянган хүн вакцинжуулж байгаа бөгөөд гэвч энэ нь хангалтгүй, орон нутаг, зарим дүүрэгт хүлээлт үүсгээд удлаа. Вакцины захиалга үндсэндээ аль ч төвшинд өгөөгүй, Орос, Хятад, Энэтхэг, Японы тусламжийн вакцинуудын түрүүлж ирснийг нь иргэддээ хийж эхлээд байгаа нь нууц биш. Япончуудын гар сунгасан 1.0 сая тун вакцин хэзээ орж ирэхийг одоогоор мэдэж байгаа хүн үгүй.

Хятадаас 300 мянган тун орж ирсэн, бусад бэлгийн морины явдлыг бид мэт нь асуух эрхгүй. Үлдсэн тусламжийн вакцин урд хөршөөс 300, 300 мянгаараа хэд хуваагдаж ирнэ гэсэн горьдлого л байгаа нь үнэн юм. Тусламж бэлэг, хандив гуйгаад, тэр нь удаашраад, гуйсан нь гутамшиг, гуйлгасан нь гайхамшиг болоод уймарч суугаа явдалд иргэд дургүйцэж байна. Ялангуяа хувийн хэвшлийнхэн үнэ өртгийг нь төлөөд ч болсон вакцинжуулалтад өндөр хурдтай хамрагдахыг хүсч эхэллээ. Өөрөөр хэлбэл цаг, мөнгө, вирус гурав уралдаж байна гэсэн үг. Компаниараа өвдчихөөд сууж байснаас бөөндөө мөнгөө төлөөд вакцинд хамрагдах нь яаж ч бодсон зөв шийдвэр. Ийнхүү вакцинжуулалтын хурд, нөөц хаа хаанаа гологдож буй үед дахин хөл хорих тухай яригдаж эхэллээ. Нэг асуулт байна. Бид 14 хоног гэртээ хоригдох хооронд вирусын эсрэг ямар ахиц дэвшилтэй алхам хийгдэх вэ? Одоогоор юу ч харагдахгүй байна.

Дахин вакцинжуулалтаа сансрын хурдаар хийе гэсэн ч нөөц үгүй. Эхний тунгаа тариулж буй хүмүүсийн вакцинжуулалтыг гэрлийн хурдад шилжүүлье гэсэн ч бас хэдхэн хоногийн нөөцөөс цааш юу ч үгүй. Ингээд ЭМЯ, энэ Засгийн газрын ажил ам хоёрын хурд зөрөөд, худал болоод байхаар хэрхэн, юу хүлээж хорионд суух вэ? Цоожтой хаалга, хаалттай цонхны цаана орлогогүй, ажилгүй суугаад юу алдаж, юу хожих уу? Эсвэл бүх байгууллага, компаниудаа ариутгах гээд байна уу? Тэр ариутгал өнөөх PCR шинжилгээтэй адил эргээд харахад, энд хаалга савахад л хүчингүй болно. Элдвийн вирус үүрлээгүй гэдэгт үнэмшихэд хэцүү, үглэхэд хожимдсон байна. Энэ мэтээс шалтгаалан хатуу хөл хорионд эргэлзэж, удаа дараа хоригдсоны улмаас итгэл алдарсан иргэд төрөө гайхан ширтэж байна. Татвар бүрдүүлдэг гол хүч болсон хувийн хэвшлийнхэн орлогогүй, ажилгүй сууж, тэдний төлдөг татварыг хувааж авдаг тэтгэмж, халамж, төрийн албаныхан хэвийн амьдарч, хэтийдэн амарсаар л байх юм уу?

Энэ шударга бус байдал ч бас олон хүний дургүйцлийг төрүүлж байна. Өвлийн хорионы үеэр лангуу ажиллуулдаг охин "Бид яагаад ажилгүй, орлогогүй суугаад, тэд яагаад ажилтай, мөнгөтэй байгаад байгаа юм бэ" гэж асуусан нь санаанаас ер гардаггүй юм. Нэг л асуулт байна, хагас сар иргэдээ хорихдоо Засгийн газар гарт баригдаж, нүдэнд харагдах, вакцинжуулалтыг хурдасгах юу хийх вэ? Нэг сая төгрөг өрх бүрт өгөх тухай зарим хүн дуугарч байна. Тэглээ гээд тэр мөнгө алдсан цаг хугацаа, алгуурласан гэрээ хэлцлүүдийг нөхөх үү? Юу гээч, вирус, вакцин хоёртойгоо уралдаж амьдрахыг иргэд илүүд үзэж байна. Засгийн газар харин вирустай уралдаад вакцинжуулж чадах уу? Чадахгүй гэж хэлэхээс айж байна.

Гэхдээ үнэн байдал ийм ажээ. Уг нь хоёр сая 83 мянган иргэнээ вакцинжуулах дөрвөн сая 166 мянган тун вакцин л хэрэгтэй цагтаа, хэрэгтэй үедээ ороод ирчихсэн бол болох байлаа. Хүмүүс амьдрал буцалж, бужигнаж байхад дуртай байдаг, тэд зогсох дургүй, хүлээх бүр дургүй.

Р.Эмүжин

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.