Бичгийн цаас хомстсоноос анги дэвших шалгалтуудыг цуцалжээ

Twitter Print
2022 оны 03-р сар 21-нд 11:35 цагт
Мэдээний зураг,

Бичгийн цаасны хомстол үүссэн учраас  сургуулиуд шалгалтаа цуцалжээ

Эдийн засгийн хямралд унаад буй Шри Ланка улсад бичгийн цаасны хомстол үүссэн учраас сургуулиуд анги дэвших  шалгалтуудаа цуцалжээ. 

Шри Ланкийн Боловсролын яамнаас мэдээлснээр бичгийн цаасны хурц хомстол үүссэн учраас энэ даваа гарагаас сургуулиудад авах ёстой байсан анги дэвших шалгалтуудыг тодорхойгүй хугацаагаар хойшлуулжээ. 

Шри Ланка улсын засгийн газар бичгийн цаас болон принтерийн хор импортлох мөнгөгүй болсон учраас нийт 4.5 сая сурагчдын 2/3 нь шалгалтаа өгч чадахгүйд хүрээд байгаа аж. 

Гадаадын валютын нөөцгүй болсон Шри Ланкийн засгийн газар нэн шаардлагатай бараа бүтээгдэхүүнээ импортлож чадахгүй байгаа ба хүнс, шатахуун, эм тариа зэргийн хомстолд ороод байгаа юм. 

22 сая хүн амтай тус улс гадаад өрийн асуудал болон дотоодын нөөцөө нэмэгдүүлэхийн тулд Олон Улсын Валютын сангаас тусламж хүсэхээ мэдэгдсэн ба ОУВС Шри Ланкийн Ерөнхийлөгч Готабаяа Ражапаксагийн хүсэлтийг хэлэлцэж байгаа гэжээ. 

Энэ онд Шри Ланка улс 6.9 тэрбум ам. долларын эргэн төлөлт хийх ёстой ч тус улсын гадаад валютын нөөцөд өнгөрсөн сарын байдлаар 2.3 тэрбум ам. доллар л үлдсэн байжээ. 

Шри Ланка даяар дэлгүүр, худалдааны төвүүдийн гадна, шатахуун түгээх станцуудад урт дараалал үүссэнийг харж болох ба иргэдэд хуурай сүү, элсэн чихэр, будаа зэргийг тодорхой хэмжээтэйгээр олгож, цахилгааны хязгаарлалт хийж байна. 

Энэ оны эхээр тус улсын эрх баригчид  БНХАУ-аас санхүүгийн тусламж дэмжлэг хүссэн ч БНХАУ-аас одоог хүртэл албан ёсны хариу өгөөгүй байгаа аж.
Эх сурвалж: The Guardian

Содномцэрэнгийн Энхзаяа

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.