Вьетнам хоёр жилийн дараа анхны жуулчдаа хүлээн авлаа

Twitter Print
2021 оны 11-р сар 23-нд 10:14 цагт
Мэдээний зураг,

Өнгөрсөн амралтын өдрүүдэд Вьетнамын Фукуок арал БНСУ-ын 200 орчим жуулчныг хүлээн авсан нь коронавирусын цар тахалтай холбоотойгоор тус улс хилээ хааснаас хойш хүлээн авсан анхны жуулчид болоод байна.

Олон улсын аялал жуулчлалын салбараа сэргээх Вьетнамын засгийн газраас гаргасан төлөвлөгөөний дагуу коронавирусын эсрэг вакцинд бүрэн хамрагдсан гадаадын жуулчид Вьетнамын Фукуок арал дээр шууд болон аяллын багц бүхий хуваарьт нислэгээр ирж, тусгаарлалтанд оролгүйгээр амрах боломжтой юм.

Арал дээр буусныхаа дараа жуулчид түргэвчилсэн шинжилгээ өгөх ба хариу нь сөрөг гарсан тохиолдолд Фукуок арлаар чөлөөтэй зорчиж, худалдаа үйлчилгээний болон энтэртэйнмэнт төвүүдээр үйлчлүүлэх боломжтой аж.

Вьетнамын Эрүүл мэндийн яамнаас мэдээлснээр Фукуок арал дээр ажиллаж буй үйлчилгээний салбарын бүх ажилчид болон арлын хүн амын 99 хувь нь коронавирусын эсрэг вакцинд бүрэн хамрагдсан ба эрх баригчид ирэх сараас 12-17 насныхныг коронавирусын эсрэг вакцинд хамруулж эхлэхээр төлөвлөжээ.

Коронавирусын цар тахалтай холбоотойгоор Вьетнам улс өнгөрсөн жилийн 3-р сараас хойш олон улсын нислэгүүд хүлээж авахаа зогсоосон ба тус улс зөвхөн гадаадын дипломатууд, мэргэжилтнүүд болон иргэдээ татан авах цөөн тооны нислэгүүдийг хүлээн авч байсан юм.

Вьетнам улсаас гадна Азийн улс орнуудаас Тайланд, Индонезийн Бали арал, Малайзийн Лангкави арал гадаадын жуулчид хүлээн авч эхлээд байгаа билээ.

Түүнээс гадна Вьетнам улс ОХУ-ын Спутник-Ви вакциныг хүлээн зөвшөөрөөд байгаа юм.

Вьетнамыг зорих жуулчид коронавирусын эсрэг вакцины хоёр дахь тунгаа Вьетнамд буухаасаа багадаа 14 хоногийн өмнө, PCR шинжилгээг 72 цагийн өмнө тус тус хийлгэж, даатгалд хамрагдсан байх ёстой аж. Түүнээс гадна жуулчид утсан дээрээ тусгай аппликэйшн татаж, 2-3 өдөр тутам түргэвчилсэн шинжилгээний хариугаа тус аппликэйшнд бүртгүүлэх ёстой гэжээ.

Эх сурвалж: interfax.ru

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.